خليل روكز و كروان الوادي 1948

عمار البراضعي

حوار بين كروان الوادي وخليل روكز على مسرح بيت مري في صيف 1948 بعد رجوع الكروان من رحلته الاولى إلى نيويورك .وكانت جوقته تتألف من الشعراء خليل روكز وطانيوس الحملاوي وعبده بدران غصن صاحب مجلة الشحرور.

خليل:

لما لبست التاج عا هامي الكبير = ومن كتر ما عندو وفا وعندو ضمير

شــــــــاف عقلي قد تلتين الدني = قلي شلحــني صغير عا راسك كتير

كروان:

حـــــــاجي عيونك بالخليقة مفنجرة = بقطع نفاسك في مجاري الحنجرة

وما زال تاج الفن عا راسك صغير = روح فــــــوّت طاستك بالطنجرة

خليل::

مين متلي مين من الله انوهب = نور المعنى من تكاويني شهب

والطنجرة لو لبستها عا هامتي = بينقلب شحتارها روح الذهب

كروان::

عرشي سفينة وما حدى غيرك غراب = بتحوّل العمــران بوجودك خراب

لو الطنجرة شحـــــتارها تحوّل دهب = بدو الدهب من لمستك يقلب تراب

خليل::

كان المســــيح الحي يجـلي من القشب = والطنجــــــــــرة حولتها حلة قشب

وحيث الدهب من لمستي بيصبح تراب = ان حطيت إيدي عليك بتصفّي خشب

الكروان::

كل العقد كان المسيح يحلّـــــها = ومجموعة عمالك عقد عا حلها

حاجي بقا تعمل عجايب يا خليل = وأنت معرض للعجــايب كلّها

خليل::

الشمس صورة من جبيني جايبي = ولو ضحكت بتشوف الليالي ذايبي

ولو كنت معرض للعجايب كلّها = وشفتك أنا بتهــــــون كل مصايبي

كروان::

الله بضرباتو جبينك خــــــــــــاربو = ما فيش قوة شمس يوم تقاربو

وما في عجيبي بالدني تغطّي عليك = ببشاعتك رقم القياسي ضاربو

خليل::

موقفك بالفن عاكس مـــوقفي = لمّا ظهر عا مسرحك سر الخفي

إياك تنسى في حياتك يا كميل = حتى الحقـيـقــــة بالمعنّى فلسفي

كروان::

موقفك عن موقفي دقيقة وقــــــوف = حداد في جــــنـــــاز تذكار الحروف

ان كنّو المعنّى فلسفي..من الفلسفي = بخلق نبي يعمل عليي فيلســــــــوف

* * * * * * * * * * * * * * * * * * * * * * * *

_________________

----------------------------------------------
" كرمالكم ع النت تابعــنـــــــا = نسقي القوافي من منابعنا "
" بوجودكم معنا امتلت بالذوق = ومندونكم مافي لها معـنا "
----------------------------------------------