منتديات الزجل اللبناني الشاعر: عمار البراضعي

أهلا وسهلا بزائرنا الكريم
عليك بالتسجيل لكي ترى كافة المواضيع المخفية
=====================
الزائر رحبنـا برسمــــو = وع التسجيل دعينا يفوت
وغير اللي مسجّل إسمو = عنو منخفي يقـــرا بيوت
=====================


لقاء تحدي أنا وسليمان طراد بغروب زجل ف ب

اذهب الى الأسفل

لقاء تحدي أنا وسليمان طراد بغروب زجل ف ب

مُساهمة من طرف عمار البراضعي في 1/20/2015, 4:34 am


لقاء مزعوم من سليمان بيناتنا
بتصفاية حساب لغير على ظهري
=================
افتتاح الحوار بقصيدة من الشاعر ياسر حجار

اهلا وسهلا بالجميع باجمل لقاء
بين احباب القلب
واكلت الضرب يا سليمان

ما بحب ..شوف تنين مختلفين
ولا بحب عادي بحب اتعدّى
عا الشعر عا النسوان عا الحلوين
وغير المحبة بموقع الاشعار
ممنوع بعد اليوم نتغدّا

موقع زجل فوق السحابي طار
جمّع ورود الشعر باقة ضو
وما زال في سليمان او عمار
بدو يضل مشعشع بها الجو
شعر ومحبة ..وكلنا بها الجو

بعرف انا سليمان قلبو كبير
وعمار مارد منبر وحسّاس
عا جناح عاطفتو الوفا بيطير
وما يوم متمترس ورا متراس
قلبو طفل بيحب كل الناس

وموقع خوابي مش رح بننساه
فيه كتبت اشعار حلوة كتير
وبعرف انا ما بتعرفو لولاه
ما في قوافي مخمرة تخمير
وكل المواقع طير عم بيغط
ونسر الزجل بيضل وحدو يطير

وعدنان رافقتو انا من زمان
وما يوم منو سامع مسبي
قسمنا الدني ورد وهوا والوان
وما ضل معنا غير المحبة

وفادي متل خيي الزغير وكيف
خيي الزغير وعارف بحبو
رح يندبح بالموقع خواريف
واشرب انا وانتو معي صبّو
نهر الوفا بالموقع مصبو

يا شعر شو حليان بالسهرة
وبلا حقد يا شعر ما احلاك
عا كل عروي شكلو زهرة
وضووو النجوم وشعشعو الافلاك

بحر الزجل جايي على المهرة
وعمار ما في واجب بينساك
ومعبد صلا الأبداع والشهرة
خلى القلوب بها المسا نسّاك
**
الحوار وافتتاح
سليمان طراد
اووف اووف

ما بعرف ليش ..؟يا مجدي بغيابي
نزل اعلان شعري ...والغرابي

لقيتو لأزمة الموقع ..المخرج
وعملتو ضرب مذوق عا حسابي

ياخوفي بالمواقع هيك يدرج
عا جدول ها الأدارة يا صحابي

عرفتو ما بحاور مهر اعرج
ولا بفتح ل غير الشعر بابي

تركت طيارتي تغفا عا مدرج
لأنو جوّكن كلو ضبابي

انا قبلت التحدي وكنت محرج
وما بدي تفتكر انو اختلفنا
انا وعدنان وتركت الخوابي
ههههههههههههههههههه

اووف اووف
انا ما زعلت الا من الأناني
الما شاف الحق الا من البطاني

سكت عن حق ملكوت التحدي
وهرب لم حس رح افلت لساني
خخخخخخخخخخخخ
انا ما كان حاور هون بدي
لأنو بحس بزغر بالمكاني

وبعرف بالخوابي الكل ضدي
وقالو البحر تا يحاور خياني

بس بيعرفوا عندي مودة
ل صديقي بو اسامة وبأمانة

الي ما كتبت ضدو شعر مدي
ان رفضت بيعتب عليي زمـــــانــــي

انا ما بين ردة وبين ردة
بسافر بالوحي عا كون تاني

تا لاقـــي بالشعر عملاق ندي
بخجل بالوحي اسرج حصاني

قلت يا بحر ما في بحر قدي
وكيف بتبعتولي رفيق عمري
هيدي بحقكن اكبر اهــــــانـــــي

تابع سليمان

وتا نرجع للزجل والأخ فادي
وقلو كيف بتكون القيادي

القيادي مش تجني عا الحقيقة
وجوخ نمسّحو ّبوس الايادي

القيادة... احترام ومش طبيقة
عا شاعر كان هادي ببحر هادي

القيادي تحترم كل الخليقة
وتحكي الحق مش تقعد حيادي

وبعرف يا زجل واقع بضيقة
والك مدي حنيني عم ينادي

حتى انشلك من كل ضيقة
وانا معروف عني ما بعادي
ولولا رجعت ليك بها الطريقة
وصرت غنّج بفادي وغير فادي
انا من غيرتي بغنج ولادي

اووف اووف

وما زال الأخ مجّودة تلبّك
وعا باب البحر تا يقبل شو دبّك

ما شفت الموت يا عمّار قلي
بنار جهنم الحجار دبّك

وتركك تنتفخ متل المظلي
بهوا تتجعلك بعبو ما ضبّك

بعرف في تحت باطو مسلي
وبعدو لهلق مقلق ملبك

بيعشق فاتن وبيحب نيلي
قلو يستحي ختير بربك
واذا عم تحلم تعبي محلي
انا حجمي محيط الكون كلو
ما قدر يقيس حجمي رب ربك

اووف

وعلى زكر الخوابي سامحوني
الخوابي عاشت ببو عيوني

ما فيها غير من خمر المصفّى
عرق بلدي وانتو بتفهموني

الدبش عدنان ب حقّي مكفا
ههههه
واذا عن ها الصداقة بتسألوني

كاسو بينشرب صحي مصفّى
وعريشو متل عنب الفيتموني

عا موقع عز ما في يوم لفّا
الا ناس متلو بيكرهوني

خخخخخخخخخخخخخخخ
بعت رامي نعيم وشو تشفّا
بكسرة رقبتو يا تقبروني

وانا ما غفيت تا شفتو توفى
ودمو بالخوابي نهر صفّى
ونهر جزين وصلو ببحر جوني

تابع سليمان



ويا عمار يا خيي وصديقي
نصيحة لا توقّف ب طريقي

واذا عنّدت يا ويلك يا دلّك
من ضربات حرفي ومنجنيقي

انا لو كنت بالعركة محلك
كنت بحس عم يزغر مضيقي

ّ
هههه
ياسر دركبك تا هون ذلّك
لأنو مجرم الشعر الحقيقي
بهدي رجفتي وبرجع بقلك
كتر ما بضل ارجف من مواجك
لحد اليوم عم ابلع بريقي
--

اووف
سمعت عدنان؟ وداني بمهمي..؟
جملة انقالت وما بحب سمي

وقالو بنعرف بطبع الثعالب
وبعد ما عرفت مينو فار دمي

النسورة بتنعرف عندا مخالب
الأفاعي بتنعرف انّا مسمي

المدارس كلما بيزيد طالب
بيفتح معهد وبتزيد امي

وانا ما جيت تا حقق مطالب
جايي عيونك من الشعر دمي

انا لبوات غاب الجن حالب
وعندي مقدرة وحنكة وهمي

انا جايي ل موقع شعر سالب
طمو بصحرة الأهمال طمي

وما جايي وحامل هدية وقالب
جايي عا زجل حتى الشبيبي
تعمل للدفن عا النت لمي

تابع سليمان

انا وعمار ها النسر البقاعي
ثنائي والدفع عنا رباعي

بكتوب اربعة وعشرين ساعة
ارتجالي وما بظحّط عا كواعي

بحاور مين ما بدي بقناعة
وبفتح للقا فسحة زراعي

ولأنو الشعر لازملو شجاعة
وطق الارتجالي اختراعي

ورغم ما طلعوا عني اشاعة
مفتن..للقا بزلو مساعي

وافاعي السم صارت كل ساعة
تبخ السم وتكرفت دواعي

وانا بسامح بطبعي يا جماعة
لأني كبير متثّقف وواعي

شفت عمّار ختير أو تداعى
وصار كبير هيدا انطباعي

وعا وجّو الخوف بادي والفظاعة
صار يبلل بخوفو الأواعي

قلت مسكين صار بدو مراعى
وانا بالشعر ما تعودت راعي
وحتى تصدقو جيبو الازاعة
الخوابي بتخلد بشعر المعتق
وبدعس الروس بتموت لافاعي

تابع سليمان

يا موقع ما الك رهجة بلايي
نزل اسمي ..تا يعملك دعايي

صرت بغيبتي عا النت مهمل
وانا تا عيّشك عندي هوايي

عن الاسباب يا موقع لا تسأل
لأنو قصتك متل الحكايي

هيفا عملتك بالشعر جدول
وخلت سمعتك متل المرايي

وطوني وحكمت الماضي تأمل
تا تعرف قصتك من وين جايي

وعلي جعفر بزل جهدو تا كمل
لوحة معرضك تا صرت آيي

تركك غصب عنو وما تأمل
ونقل معزور عا تاني ولايي

وسكت عن جرح بالاحساس عمّل
وكارم شاعر العصر بدرايي

وما رد على الاهانة وشو تحمّل
وقلي ها الولد مش مستوايي

ولما البحر بالموقع تدخل
وشعّل حرب ما الها نهايي

ما كانت نيّتو ولا شخص يزعل
ما كنتوا تفهموني عا زكايي

تركت الموقع وعمّرت منزل
وزعل الكل لكن من عدايي

ورجع بدر الثقافي العمر طوّل
وعملك للوزن شبكة حمايي

ورغم ما قطّع ووزن وجوجل
انرمى متل الحجارة بالقنايي

ورجع عدنان عملك نجم أول
وكتر ما دهّب بحرفك كفايي

طرت متل الفرزدق والسمؤل
وشربت ريشتك حبر الدوايي

ترك عدنان بالموقع ما طوّل
لأنو حس حالو بلا حمايي

وغدر الخي بعرف ما تقبّل
وقال بفل افضلك بلايي

وعمل موقع خوابي الصار أول
وبعرف ما نعمل من اجل غايي

انعمل تا يجمع الشعر المأصل
ومواهب تظهر وتلمع نكايي

وليش البحر يكتوب هون بطّل
انا رح قولها ..فلقتو سمايي

بعد ما راس حسّان المدلل
بسيفي انقص ..خبيتو النتيجة
وما كنتو تنصفوني بالنهايي

تابع سليمان


اذا حسّان ما قاوم حصاري
مش معناتها بخفف عياري

خدعكن عا المنابر مش خسارة
عمرو اقصفو بحفلة تباري

بس العيب ما تحكي الادارة
عن البحر الهزم اضخم صواري

وفادي خاف عا جلدو وتوارى
يمكن كان موعود بمصاري
قعد جمعة المعتر بالمغارة
ل خوابي شربتها صحة لأنو
انتصرت وما علنتو انتصاري

اووف

وانا جايي تا اعمول واجباتي
وحاور بو اسامة وامنياتي

ما يفلت بالشعر عني لسانو
لانو عليه رح افلت خواتي

هوّي وياسر من زمان كانو
عليي جد بمعزة خواتي

بس اليوم بالضدي استعانو
تا اعطيهن بشعري التفاتي

طلبو يفرموني واستدانو
موقع ها الزجل صابن شماتي

وفادي صار يفقد اتزانو
وفكّر صار اقوى من الزناتي
تلاتي بالبحر غدرو وخانو
وانا جايي عا موقعهن مقصّد
تا علّقلن مشانق للتلاتي
===========
===========
===========
===========
===========

افتتاح عمار البراضعي

أووووف أووووووووف أوووووووووووووووووف

ياموقع للزجل والشاعرية
رجعت حاملك بشعري تحية
أنا بحيي الإدارة بهيك محضر
لأنو الضو خي النور خيي

بحيي فيك عين العم بتسهر
وحنش مابرحم بوكرك وحية
أنا بدي بمحيط الشعر إسكر
البحر شربان من مدة قوية

جرّب واقتنع موجو تكسر
جزرتو قبل ماطرطش يديي
البحر غدار وصفو عالمسوكر
شطبتو من القوافي العاطفية

وغيابي كل مااستطول المنبر
شهقلي وين هالطلة هالبهية
بروح الموهبة بضطر إحضر
وقلت كرمالكن ياحباب قلبي
برجع بعمل الواجب عليي
==============
وشو هوي واجبي غير الاجابي
عاشاعر بالزجل لاعب مخابي
بجنيةّ ورق طلّق ضميرو
وحذفلي من سنة أقوى إجابة
ومن غروب الزجل لعلع صفيرو
تاريحو لجمت بحضوري وغيابي
مشربط هج بتخرمش ظفيرو
وبرو نافش ولقبو إعابة
وبموقع قرروا صحابو يديرو
الإدارة وجددًوا فيها صحابي
لأنو ماطلع هوي مديرو
بدل مايبارك ويبقى يهني
هرب تايكسّر جرار الخوابي

===========
تابع افتتاحية عمار

أووووووووووووووووووووووف

وياموقع للزجل والضو صانو
البيحقك غلّط بكسّر سنانو
الشاعر منطقي برأيو تفرّد
قاضي عادل بحكمو وميزانو

إذا الشاعر شفت خدو ماورّد
وقصد فرط الحيا مع ناس كانو
بيحقّلو إذا بفخرو تمرّد
مايذلل شموخو وعنفوانو

أنا برأيي إذا الشاعر تشرد
وشرودو ماقدر يجمح حصانو
انوصف معناتها بشعرو ماغرّد
وبحجمو الوزن فاقد إتزانو

أنا مابجرح رفيقي بمجرد
لفظ كلمة بذيئة عالسانو
وإذا من المنطق بشوفو تجرد
برأي الجمهور ضل الشعر أول
الناس بتعرف الشعر وكيانو
===========

تابع افتتاحية عمار

وأوووووووووووووووووووف

يابو طبخ تقليدي مافيي
عنك عف لو بتدق فيي
بعدو بيرعبك برقي ورعدي
وزئيري بغاب أهل الشاعرية

بعدك متل ماعرفتك يابعدي
قوي بالبهورة والعنترية
بساعةّ الجد خفت الناس تعدي
بهريبة قبال هجمة براضعية

غلطت فكرت رح قلك ياسعدي
معك إخرب مواقع عبقرية
لا لا قطعت ياسليمان وعدي
مابهجي شب وبهاجم صبية

ولأنك ماتبعت بالشعر قعدة
غير الزغزغة في كل نية
لقب غدّار سميتك وبعدي
تاحفظوا مَيةّ الوجه بغيابي
سموّك البحر أهون شوية
===================
أووووووووووووووووووووووف
ياعامل من الشعر تصفاية
حسابك رصيدو مارفع راية
وقت اللي بدك تلتقي بعمار
الموضوع حصري يكون مش غاية

اللي باعثينك طبعهم غدار
بس انتبه شو قصد لحكاية
مش قد عمار وإبن حجار
منهم حدا بيعزك كفاية

تزحلقت عملولك فلام كبار
تايغيروا الشنكاش بوصاية
وموضوع قابل دربهم تختار
لوما الجسم لبيس مابينقال
لقب البحر غدار وكفاية

تابع افتتاحية عمار

أوووووووووووووووووووووووف

مش عادتي خيي أنا عادي
إلا إذا بدربي سلك عادي
وكان النصيحة المن قبل نسيان
فيها تاإرجع ذكرو بنادي

ولولا تناسى وكان مش سئلان
وجايي تايضرب وج متمادي
متل خيي وصاحبي سليمان
لما بشوفو بعين نقادي

ع معلمك وصيتك من زمان
ودروس مني ملقن زيادي
بتعرف حرف لو فات بالميدان
صرتوا ببرحليون ردادي

أمتين كنا نوضع الأعلان
ومانفوت نعطي الشعر زوادي
ومن بعد ما الإعلان شفتو بان
تناسيت بعرف عادتك عادة

معليش لاتنكر حكيت فلان
تركت الجبال ورحت للوادي
وسماع شو بقلك بهالقصدان
حاجي بقا أفلام ميادي

وكرمال تاتكبر بهالميزان
الحجّار ماخصو ولافادي
ركز معي ولاتمزج الألوان
تاتدعي تلاتي عم تعادي

بتحب نرجع عا زجل إخوان
اللي كان يمحي صار عضو عادي
إنسى الكره والحقد والطغيان
ونادي الشعر إهدي زهر نادي

إسمعني اتكل عا ربنا الرحمن
وبالشعر إحفظ درس إرشادي
خلّي القصيدة تعيش بالأذهان
ماتعيش هيصة بصوت ولاّدي

إصحك تبهدل في زجل لبنان
تنافش معي شرط بفكر هادي
عمّد الكلمة بذمةّ الوجدان
بتقشع حروف العطر بتنادي

ولما منرجع كلنا خلان
رصاصةّ الرحمة الناطرة زنادي
حقدك إذا بتقشع بعد زعلان
باخذ لوحدي بحتفك شهادي

ومنشان تعرف شو بعد منشان
سرّين خلقوا بدرب لعمادي
الاول بيبقى طهر بالأديان
الثاني أنا المابعمّدو بالشعر
مش شاعر ولابيقبلو الفادي
===========
أوووووووووف يتبع...... إذا دعت الحاجة
===========
تابع افتتاحية عمار

هاهاهاهاهاهاهاهاهها
عامهلك رد بس ترجع عشية
بشرط إياك تتبهور عليي
قضية ان شفت أبياتك تبنوا
أنا قاضي قضايا الشاعرية

إذا بدك صلح أهلا تمنوا
أرباب القوافي العنترية
وإذا بدك حرب مفتوح جنوا
معي بتضل تنحل القضية

وإذا بترد وبيوتك تدنوا
مع العمار ماعندك هوية
أنا ضدي إذا ألفين غنوا
وقفوا بالدور ياولاد المنية

وإذا القاري عيونو ماتهنوا
بحفلة شعر كانت حربجية
الضمايرهم على الذمة تجنوا
لاتطلبهم عاعركة سرمدية

لأنو بتعرف العالم لأنو
العدل والحق بيضلوا سوية
الحلـّفتو وماعندو كان منو
يمكن يحلف برحمةّ ضميرو
بصفك يوقف الصبح وعشية
===========
تابع افتتاحية عمار
هاهاهاهاهاهاهاهاهاهاهاها
وعشية انعدت من شغلي ولقيتك
معمّر شعر عامدماك بيتك
أنا وهالموقع الكلو منارة
بدنا نقول هيذا البيت بيتك

وإذا بالعكس مفعولك توارى
وجهالة كتبت للنعوة دعيتك
جاوبني قد ماعندك جسارة
وياريتك ماكتبت ضعفك ياريتك

أنا ماكان بدي تشن غارة
ومن سمك أنا ياما سقيتك
وتهرب كنت من حارة لحارة
لحتى يزقفولك عيب تنسى
أنا الإلهام من شعري هديتك
===========
تابع افتتاحية عمار

عممصكبنرعش ياصديقي جبال مابتتزحزح
--
بتحيةّ إفتتاحي وإحترامي
ثلج عاجبالنا نلت العلامة
عممصكبنرعش شمخةّ جبيني
بجبل عكار عم بقصد كلامي
وبأول ميم بالمكمل يقيني
لاخاب ولاعرف مرة الملامي
وبثاني ميم وشموخو الرزينة
كتبت المنيطرة بحبي ووئامي
وبحرف الصاد صنين المتينة
بوج الريح مابتحنيش هامة
متل طود الكنيسة بسر ديني
أخذ إسم الديانة بالأسامي
وبقي الباروك مع نيحا الأمينة
ريحان وعامل القامو القيامة
وبطود الشيخ من أول سنيني
بحضنو ربيت عاراسي عمامة
جبل للشعر والمولى عطيني
المحبة والشهامة والكرامة
وجبل للموهبة لما لقيني
زنابق شعر شكشكلي كمامي
ولأني سبع ربيان بعريني
على خدود الصداقة وضعت شامي
وكنت بو شربل بمسك الختامة
افتكرت بصحبتو متلي مجسّد
الزغبي الذياب والأسمر سلامة
**
ملاحظة : عممصكبنرعش اسم مختصر لجبال لبنان

ع عكار
م مكمل
م منيطرة
ص صنين
ك كنيسة
ب باروك
ن نيحا
ر ريحان
ع عامل
ش الشيخ
===========
تابع افتتاحية عمار
دفرونميا
هاهاهاهاهاهاهاهاهاهاهاهاها
انزلي يانجوم من أعلا سمايي
بدالك للزجل عنا كفاية
قمار كثار ونجوم ومجرة
بسما الإلهام شفت بمستوايي
على لبنان مر ظروف مُرة
وصايات بعهد تركي وجناية
وعهد متصرفين وكل مرة
إقرا وعد أسمائن ورايي
عن داوود وفرنكو تحرا
ورستم عاد من بعدو الرواية
ورجع نعوم واصا دروب مرّا
ولحقو مظفر ويوسف نكاية
وعاآخر إسم أوهانوس تبرا
لقب باشا لقبهم بالبداية
وراحوا ورجعت ليالي المسرة
ورجع لبنان إلنا بالنهاية
وهيك مواقع الكلمة بمقرة
إذا عليها انفرض حفلة جناية
بتبقى بالنتيجة مستمرة
وألف مدسوس رايح ألف جايي
وإذا بعصر الزجل إنسان عرّا
معو جايب وصاية لأجل غاية
إذا جوّا هدم بيصير برّا
ومتلي البالزجل ماشح نبعو
معو مش فارقة جيوش ووصاية
==============
دفرونميا إسم مختصر
لمتصرفو جبل لبنان من قبل العثمانين
د = داوود باشا
ف = فرنكو باشا
ر = رستم
و = واصا
ن = نعوم
م = مظفر
ي = يوسف
أ = أوهانوس
===========

عمار يتابع الهجوم

أوووف أووووووووف أووووووووف

ياخيي بالحياة وياغريمي
على المنبر تعا وشد العزيمة
من عمار بالعركة لاتفزع
الصداقة تنمحي بتبقى حميمة

بدي اياك شو بحاكيك تسمع
انا عالحرب مابدي عزيمة
اذا هددتني بتكتب شي مطلع
انا ألفين بكتب يانديمي

شو صابك صاير الرعبة بتكرع
تاتضيع حواراتي العظيمة
وعند ماشفت إسمي صرت تخلع
قشاطك عالفزع حل البزيمة

قلتلك تعا قبالي تموضع
وحارب خفت تاأعمل جريمة
صرت تدّخل رفاقي وترجع
غيري تهاجم وتنقل نميمة

وحتى المستوى عنجد ترفع
بدورات القوافي المستديمة
انا باب البوجي انسد بخلع
وامو الموهبة البتكون ناوي
ترجع فيه تبقى مستقيمة
===========
تابع افتتاحية عمار
ركّز قبل ماتكتب جوابك
حاجي خايف مبلل ثيابك
إذا بتخلص معي من هيك ورطة
صفّي روح مع غيري حسابك

إذا طليت بامخروط خرطة
بتشبه توم خايف عاجنابك
بقرب الطاولة مخوّر عافرطة
ناطر بس يرموها صحابك

قلت بيتهموني وجبت أرطة
معك تايهندسوا حنكة بوابك
متل اللي سبق عابواب شرطة
القتيل بيقتل ويوم الجنازة
صرخ عامدفنو يرحم ترابك
وززززززززززززززززززززززز
===========
الشعر يارفيق عنوان الوثيقة
غذاء الروح بتعدوا الخليقة
وجوابو كل تنقـّخ تخمر
ان ختير أطيب بخابة عتيقة

الشعر رغيف عالصاجة مقمر
انكتب للروح لو جاعت رفيقة
الشعر نغمة الشعر ألله أكبر
الشعر مشعال عادروب الحقيقة

الشعر مش خرطشة عاوراق دفتر
كتبها الجهل تغزيها الحريقة
الشعر كلما كبر نحنا منكبر
وفينا بيزغر بقافي مبيقة

نصيحة عطيتك تققف تحرر
تاتبقى بحر مس بركة بنقيقة
متل الصفدعة لاتضل أزعر
عاري مزلطة خافت خنيقة

شفت عمار عم بتقول ختير
لأنو أشعر وأرزة طليقة
الشاعر زاد عقلو لو بيكبر
إلا إنت كل ماكبرت أهبل
عم بتزيد كل تكة ودقيقة
==========
تابع افتتاحية عمار

تاع لقلبي يانقعة مصوصة سدقت حالك بحر
أوووووووووووف أوووووووووووف أوووووووووووووووووووووف

عا صوت الموهبة ياشعر صحي
ضمير المنبر الصابو تنحي
انا بحب الوفا وللخصم علة
برقاب الغدر معتاد ضحي

انبدل نسر الشمالي بالتجلي
حمل أفعى بنفسو وقال فحّي
وطلع لص الشمالي بدون غلة
وياموهبتي النعق بالصوت بحي

لجنبي ماحدا بيقدر يعلي
ولانبعي توقف وهدد بشحي
ولأني بعد ماعرفت المذلة
غيري بخوف ماحي إفتتاحو
وانا بكتب مابعرف كيف محي

وزززززززززززززززززززز
تاع هاهاهاهاهاهاهاهاهاهاهها

سمعت ضفدع بثاني غروب نقنق
معو بطة اختبت والصوت فقفق
القوة عرفت خلقت في حناكو
وزلعومو ع كثر النق طقطق

إذا ثوب الغدر تفصيل حاكوا
بقي شفّاف ماتخبى مرقرق
عامل ديك ومفكر صياحو
وعّى الفجر لما الضو شقشق

ولما النور بيشوف انشراحو
تخبى خواصري من الضحك طقطق
ولما غروبنا بيشرق صباحو
مصاص الدما بيلعب مخابي
ومحى اللي كاتبو وع اللوح دقدق

وزززززززززززززززززز

اعتزر ياخنس مابتحمل هجومي
ولاتمشي ع درب حربي وتومي
معك لو كاسحةّ ألغام جايب
خسارة فيك تافجّر لغومي

اذا خانوا العهد مرة الحبايب
الغلطة مكررة إدرس علومي
بتخليك بكرة نهار غايب
ولثاني غراب بتعيط البومة

هيذي طبعها خلقان سايب
قناني بتبلع دوالي كرومي
عليها لو كنت شي سجن جايب
بتقلك فتحلي حبس ثاني
حرام الناس محرومي برومي


عمار ايضا
في ناس خانوا الود والعشرة
وإنسان لحقوا بهالدني حشري
نسيوا التطبع مابيغلب طبع
فيهن مرض خلقان مستشري
وبلسان سوقي الحب يطبع طبع
كلمة بذيئة بتهدف لنشري
قاصد يسّود سمعتي والربع
بيقرا الضباح وزئرةّ المكتوب
واللب بيميّز من القشرة
===
ضباح صوت الثعلب للي مابيعرفها
=====================
وززززززززززززززززز تاع لقلبي تاع

وكاسي خمر دهقان كاساتو
حروف الشعر خمّرت كلماتو
الإيناء تاينضح بترم الفصل
بيبيّن المسكوب جواتو
ياوصل بقطعلو ياقطع بوصل
حسب النتيجة وطيب نياتو
يابخصلو من الشعر كلو خصل
ان ماشاف حالو علا مراياتو
بيحكي بصفاتو بس إبن الأصل
وغير بصفاتو الباع عقلاتو
وللمش أصيل من الأصل في نصل
برماح شعري مشكشكة وإعدام
حتفو بيلاقي بعد حكياتو

والله تاحرمك تاكل دجاج هاهاهاهاهاهاها
وززززززززززززززززززززززززززز

وياشعر لما للمجد ترجع
بتعرف سيادك مين والمرجع
الله خلقتي للزجل صنديد
والا لربي ماقبلت اركع

خلقان متل البلبل الغريد
وع منبري كلما نويت اطلع
وقت اللي بدي بقيم فرحة وعيد
وببعث قوافي المستوى بترفع

وحسب العوايد متل مابيريد
البدو يحارب بالعلن يسمع
لابخاف لابفزع من التهديد
ولما هجومي بفتحو ع الكل
الا بروس الكل مابرجع
===========

سليمان طراد

هجيتوني ومش حابب رد
وبحري مش ميّت هادي
وكلما ايدي عليكن شد
بتتشكو لمجدي وفادي
ههههههههههههه
هي الشرحة يا شباب
**
سليمان ايضا :

يا عمار فتاح حساب
بيني وبينك سكّرتو
بدك تركب عا الدولاب
قشاط الكلمة حضّرتو
هههه
عم تتهمني بالأذناب
وبحري بتعرف مقدرتو
مجرّبني وعارف ما بهاب
سبع ال بالغاب قبرتو
هه
هجمتوا عليي متل دياب
وغرتوا ومن مجدي غرتو
وهجيتوني بلا اسباب
وموقع فادي دمّرتو
هههه
وياسر حجار الكذّاب
ما بيخدعني ببهورتو
لوما العيب وفي احباب
كنت تشكيّت ل مرتو
هههههه
حرب القرادة اعصاب
وانتو قبالي توتّرتو
لا تعاندني طعاج ركاب
وقلي حلوة ومنعادي

===========
عمار قرادي


الباري خالقني فنان
أفكاري نسور يحوموا
مابتهجّم كيف ماكان
وجوي كشحت غيومو

ولورجح كف الميزان
ويعصر عنقود كرومو
صبينا كاسو المليان
ونخبو شربنا بقدومو

جايي تايحامي عن مان؟
مابيعنيني بهمومو
بدو فليتاني وفلان
وبغروب الثاني يقوموا
هاهاهاهاهاهاها
لكن صاحبنا التعبان
سدّق حالو بمعلومو
عاملي بحر ونسيان
حروفو ببحوري يعوموا
هاهاهاهاهاهاها
جايي بنفسيةّ ثعبان
وعليي بخ سمومو
لاتلوموني ياإخوان
بدي إسحب زلعومو
وزززززززز
بحبو بعد ومش زعلان
صوص النقعة مابلومو
معوّد عاالقتل سليمان
طبعو متل السجادة
===========

سليمان

عا الموقع فت ..وعرفان
انو الكل بيكرهني
وافضحت السر وما كان
يا حبابي سر المهني
ههههه
وبخوابي الشعربلبنان
خمر الكلمة نهنهني
وصبيّت الشعر الخلقان
مخمر بخوابي دهني
هههه
شبّهتو شعري بعدنان
وكتر خيرو الشبّهني
وما زعلت وقلت سليمان
بالشعر الراقي بيهني
هههه
وبس الاكتر يا اخوان
اللي ضحكني وقهقهني
غيبة فادي ..شو فزعان
يرد عليي قرادي
ههههههههههههههههههههه

ألشاعر سليمان طراد

يا عمّار البحر كبير
قلبو وتهجي من حقّك
مهما تهاجمني رح دير
ضهري ومش ممكن طقّك
هههه
ومهما الدفشك يعمل زير
عا جهنم بحري وزقك
بيضل معتّر وزغير
وبعقلاتو ولادي
هههههه
================
عمار البراضعي

اللي معوّد يطلع عالمهر
عدّو فارس مش حشري
بحر المنبر سر وجهر
كشّف عن وجو القشرة
أول صوت نهرتو نهر
ضدي اجتمعوا عانشري
لابحر لقيت ولانهر
ولابركة ونقعة بنشري
بتعرف مابطعن بالظهر
ولا برضى خون العشرة
جمّع شعر طنعشر شهر
وعبي الجعبة حتى تصير
قد الحملة وبزيادة

باي عمار يتابع

=====================
يابحر عرفتك ع إصول
ع حالك منّك ماين
اللي دفشك صوبي مسطول
ومديون ومنّو داين
كان بدنا بالعركة تصول
وتجولوا بأرقى مداين
لاتدير بظهرك معقول
ماتببقى غيابك صاين
بلكي شكوك بفورمول
بطعنة أو أبرةّ خاين
وتاتشبع بالشعر عقول
والعطر يغذّي جناين
اللي بدو فادي المسؤول
كان من الأول بيقول
لايهاجمنا ولا يعادي

وياويلييييييييييي عليك قلي هيك
عمار البراضعي
يتابع
أووووووووووووووووووووووووف


ياشعر عدلك بعرفو قاضي
عذرني إذا قوّيت ألفاظي
خصمي جبرني جاوبو بهالخط
وإبقى ع روح المعتدي قاضي

حاولت علّلي مركز المنحط
من قبل مدة ومن زمن ماضي
حفرة حفرلي راح يكتب خط
فيها وقع ع شفرةّ الماضي

حفرة لخيو اللي حفر ع الشط
فيها بطمو ونعوتو ماضي
مخو شباطي نط متل القط
بلقب البحر سمعة بوهم حاضي

بذات الوتيرة ضلو عندو محط
يعرّم بكذبة وعامل رياضي
وماكان يعنيني الوضع لو غط
ريشة بحبر الوهم متغاضي

لكن عند مادق فيي ولط
متل الأفاعي كنت مش راضي
والنسر مابيرحم فروخ البط
تاتعرفوا مين البحر عنجد
حاجي بقى ألقاب ع الفاضي
============
وياويليييييييييييييييييييييييي
وزززززززززززززززززز

أنا مسلخ شعر عني ابتعدوا
هزيمي بيرعب ببرقو ورعدو
زجرت البحر ساعةّ مابقرر
ومديتو وقت مايحين وعدو

أنا نبع القوافي ومابّرر
قواس النصر بفكاري انوعدوا
وكلما قافية عاقوس مرّر
لخصر القافية ماطال سعدو

بيجيني شط كم كلمة مكرر
بيحب يعيدها من زمان بعدو
مركّب فيلم أخراجو محرر
نسي لو ساعدو ألفين موقع
أنا اللي بقرر وجودو وبـُـعدو
=============
وووزززززززززززززززززززززز

يابحر علّي وكبّر محلّك
عافلاك فكري حاج تتفلك
بتتفزلك وعم تدّعي الأشعار
وقد القمع بالعين بتضلك

حاولت نمّق مركزك بنهار
تاتصير متلي وعالعدل دلك
لقيتك أناني خايف ومحتار
من خيال ذينيك وزغر ضلك

خليك بالموقع مع الشعار
فتّح عيونك إعرف محلك
هون بتلاقي ألف عمار
وأوفى الخلايق تنتقي خلك

ماقبلت مني ورجعت ثرثار
ومليون مرة برجع بقلك
بتطلع جنب غيري بطل مغوار
وبساحتي انغلطت ياذلك

بغروب مجدي هون نور ونار
مافي حدا بيمحي إذا بشلّك
وكرمال خلّي صورتك تذكار
ثوب النصيحة بيكره الغدار
ولولا غلطت عنجد ياذلك
===============
عمار يتابع
قرادي

ويلا دوري وهزي وطجججججججججججج
تت تت تتت تتتتتتتتت تيشرشتيرشراش

اللي بيفتح طاقة وشبّاك
بين البصلي وبين الثوم
شم الريحة ع الافلاك
وياربي بيصرخ ياقرووم

شو دخلني بهالأسلاك
وعارف حالي مش مهضوم
فتّ بهالعلقة بإرباك
وبالحملة مش قادر قوم

بسيارة مافي إير باك
بيلعب فيها جيري وطوم
ان سارت ع درب الإهلاك
حادثها صفا محتوم

وع الورد انعمشق أشواك
من كعبو بيرجع مقروم
ع بالي إطبخ بفتاك
مشوق إفطر مش رح صوم

ويانقعة عم بستناك
من مبارح تاتصد هجوم
ساعةّ مابدي إلقاك
بتتهرب ياعيب الشوم

ضلك ماروني بملقاك
وكاثوليكي ومتل الروم
رحب فيي مابنساك
مسلم درزي بوجه عموم

ويامدخّل غيرك شوباك
بين الإخوي مش معزوم
ع مطبخنا مادعيناك
لا مع صلصة ولا مع زوم

أسمر لو بدو ربّاك
ورّدك ع الحارك مهزوم
روح وودييلي الوداك
يفوت بناري الوقّــــــادي
============
عمار البراضعي وينك خيي فادي؟

وينك يافادي اليوم طل من الخبي
اشتاقت عروس الشعر ترقص حوربي
مخمّر عرفتك مقلعك شهم وأبي
وبعد الخبى بتطلع الخمرة طيبة
حدك أنا شاعر نبي وعن تجربة
من لفحةّ سياطي الغزارة مرعبة
زغر الصبي لاتخاف والبحر الزغير
قال المعري من الذكا مات الصبي
====================
أوف أوووووف أوووووووووووووووف
رح عيدها الأبجر حصاني وماكبي
وبزيدها وإخنق صأيّ العقربة
المابتجرحو الكلمة الجميلة الطيبة
مابتجرح بجلدو السيوف الطيبي
من هيك بدي شعر روحو طيبة
مش ميتة وتجريح فيها وسبسبة

==================
ألشاعر سليمان طراد اوف اوفف

يا بو اسامة ليش دشّرت الغروب
وقصدت موقع للزجل بلش يدوب
لو جيت عا نصيّتي اعطيتك حبوب
ولو رحت تسهر بالخوابي لبست روب
صحصح معي ولا تضل تايه عا الدروب
وارجع على الزنّار وتراك الحروب
موقع زجل من بعد ما اتركتو انتهى
وشمسو بلعها البحر بخوابي الغروب

تشتك تشتك تشتك
===========

عمار البراضعي
أووووووووووووووووووووووف
يابحر ردك ماقشعتو بمطرحو
ولحبوب فكرك هلوسوا وماصحصحوا
حسابك نقص بغروب ضرب منطرحو
الموقع الفتلو وهج شعري بيبربحو
بتحكي بروب الجسم يمكن شفلحو
واللّي تفرعن بالمواقع بنصحو
إبلع من الإيمان حبةّ خردلة
تاتصيرتنقلي الجبل من مطرحو
==================

ألشاعر سليمان طراد
انصحتك تجي ..صوب الخوابي وتلتجي
وبالشعر يا عمار تتبع منهجي
ضيّعت وقتي وما كنت تعرف تجي
وضليت تعمل بالمواقع بسطجي
بموقع زجل ما في ولا شاعر نجي
من بحر بيخلي الحسورا مطعّجي
ومش بس خردل وهم صرتو تبلعو
بلعتوا المناجل خوف قلتو رح اجي
===========

عمار البراضعي أووووووف آآآآف


سليمان شوف. الشعر حكمة للنفوس
الأرواح غذّى ونبرس ومنهج دروس
من غروب ثاني الباعثك لينا جاسوس
تعبّوا الكؤوس بترجعوا من دون روس
بلعنا المناجل والحرب صارت ضاروس
وصوتي سمعو متل اللي بالع ألف موس
دقني تحت والفوق منها شواربي
وإنتوا سوا الأخلاق بعتوا والناموس
=================

عمار البراضعي ولاد ياخاين
ولك حل عن ربي مابتشبع قتل
هاهاهاهاهاهاهاهاهاهاهاهاهاها

في ناس صاروا فكارهم جعبةّ نفاد
وإيدي برصاص الإرتجالي عالزناد
الختير بشعرو من الوقت تايستفاد
بيتحجج وبيقول جايي ياولاد
وياطراد شو نصحتك تاتبقى عاحياد
مع حرف مافرّق عبيد من العباد
بعدلو على القبّان بيضة بيوضعك
ان عرفتها من حي خلقت أو جماد
===============
بكلماتكن يارفاق قد الكون
لو كان فيها القلب متعلّق
الصفحة النقلناها بقصد لهون
طلبنا عليها ما حدا يعلق
=============
عمار البراضعي وانا قررت اختم هالحوار
وبالنهاية كلنا إخوي وسماع ياسلو

===========
شكر كبير ياخيي وحبيبي
عاهالكلمات وبيوت الأديبة
صليبي حملتك وكنت البدادي
ضربت مسمارك بكفي وصليبي

مسيح الدين طهرو نور هادي
وأنا للشعر والعتمة الرهيبة
وهالنورين خلقوا بسر بادي
الأول نور والثاني مصيبة

بعيد الشبه ههههه رح جبلك شهادة
عني وعنك القصة قريبة
يوظاس الباع من قبلك الفادي
ومتلو بعتني طوارك غريبة
هاهاهاهاها
ومسيح الشاف تينة بلا إفادة
وحلا أغصانها كانت رطيبة
حلل قطعها وصرّح منادي
حلاها مابيكفيني زيادة

وتاأعمل بالشعر ذات العجيبة
بشعرك ماشفت طربون نادي
هيك نهايتك صارت قريبة
ناوي قصقص رقاب و أيادي

أنا كروم العطى منافع بلادي
الدبس والحصرم بوصفة طبيبة
وخمرو لو صفي الموسم حيادي
من خيرو بقي يطعم زبيبة

ياسلو سماع لاتضلك منادي
بإسم البحر دفعتك ضريبة
في رمانة بجنب بيتي محادة
بتعرفها ونوا نبع القصيدة
منها يقص لجنابك قضيبي
====================
ألشاعر سليمان طراد
لا تهرب رد..ناوي قص راسك
وخلي الناس تعرف شو قياسك
اذا في شخص دفشك عا التحدي
وبراسي جيت تا تفرغ قواسك
انا ما هربت منك قلت بدي
حطم مجدك ودمر اساساك
الي ما فركت يا عمار مده
قرمة رقبتك هيك التحدي
وبعد الدفن بدي دق كاسك
============
عمار البراضعي
وأوووووووف يانقعة خوووذ


ياناوي تقص راسي وراس فادي
ياجندي غر بقبال القيادة
فادي ياحبيبي بالإدارة
وشاعر عبقري وعندو مبادي

وحرف معروف من ضدو تبارى
عرف بالشعر مابرحم ولادي
بخّرتك على ناري بحرارة
وعافادي ماقدرت ترفع أيادي

بي بوست جديد طقك عن جدارة
بيتين وطفى بحرك زيادي
رجعت تاترمّد الموقع بنارة
تكحّل من رمادو ومن رمادي

فادي الإربعا عنك توارى
وأنينك خرسن طيور الشوادي
معك جمعة ابتدى صوم الطهارة
حتى إربعينك عود أعمل
وبسبت النور ماتنال الخسارة
====================
بحر الزجل الشاعر الكبير سليمان طراد

اووف اووف

بعدك متل ما بعرفك شاعر حقود
وشعرك بيجرح بالعرب متل اليهود
ل موقع زجل مين اللي بعتك تا تجود
وتوقاف ضدّي وبينّا تقطع حدود
فادي حسابو بيدفعو والله شهود
بالشعر مش بالشتم أو عرض الزنود
ولو شك راسو ريش من ريش السما
ل موقع زجل الا برضايي ما بعود
ههههههههههههه

===============
عمار البراضعي
كرمال الخبز والملح بس

لوما أنا ويّاك نشرب كاس
وعالشعر رجعتك تاتطلع راس
كان ضل إسمك بالغرب هونيك
بالشعر والشهرة شكي الإفلاس

بياع أو تاجر غني ناسيك
شحاحيط عم تحمل كنت ومداس
شعرة من العجنة سحبت لوفيك
ترجم إلو الحرف بلون حسّاس

عملتك صديقي وماقبلت عاديك
ولا خانك العندو الوفا نبراس
تقلي بلقب فوت وأنا بلاقيك
نكسّر الوقفوا بدربنا حرّاس

ومن طيب قلبي قبلت تاعليّك
ماعرفت في حقي كنت خنٌّاس
الvirus من عيون المرا بتغويك
وفضحت ألقابي بجرح ماانقاس

إرجع لحجمك نسمتي بترميك
وبيناتنا في فرق بالمقياس
بالعزم بتضلك قبالي ركيك
وبجهنم شرودي طلعت وسواس

الجنة عملت وطلعت وحدي ديك
ولولا بدون العالم بتنداس
تاكنت عامنظر حلو فرجيك
وعليك ضحّك قصد كل الناس

ماعدت غيربحر الغدر سميك
ولوما الخبز والملح والقداس
تاكنت بلّش إرتجالي فيك
تاتشوف منّا الناس أيّا بحر
ميّت.. ومين الممتلي إحساس

====================

عمار البراضعي
وزززززززززززززززززززززززز
مازال صارت الشغلة علنا هات يانقعة
أوووووووووووووووووووووووووووووووووف


مازالو كشـّف لقابي بو صنفة
اذا مسحتو اشهدوا مايعود ينفي
أنفو بفرفك وبسحب لسانو
أنا بعطر الشعر مرمغت انفي
المش قد الحمل يترك ميدانو
انا غصبتو بحربي يصير منفي
ومن ضعفو كبى بسرجو حصانو
اذا لسانو ماصانو رح بشيلو
من الزلعوم وبحمّي الفرن في
==================
وياويلي هههههههههههههههههههه
عمار البراضعي
أووووووووووووووووووووووووف
وينك ياخاين .


مازال موج البحر حولتو حبوب
حمّل على ظهرك خياشي عالدروب
عمار انت بتعرفو يوم الحروب
شمس المعاني رد من بعد الغروب
وكلما معي غنيت لاتعد الهروب
ثلثين صفا للمراجل والعيوب
نقي خصم بالمعركة حتى تتوب
بقلبي صلا مكتوب مغفرةّ الذنوب
الشيطان كلفني محامي بغيبتو
ومتل العلى كتافي أنا حملت الغروب

عمار وززززززززززززززززززز
أوووف أوووووف أوووووووووووووخ
تاع لقلبي تاع هههههههههههههههههههه

إذا للحرب مرة نفخت بوقي
وقلت للشاعرية نهار فوقي
بيجيني خصم مش قدي بعدّو
بدو يهاجمك يانفس روقي

قلت بشوف بالأول شو بدو
وإذا بيوعد ويوفي شي خلوقي
لقيتو بسوق جهلو حط ردو
بسرعة زلحفة بقبال نوقي

هجيتو تاه وفكارو استبدوا
تحجج قال لاتهدر حقوقي
واذا حرفي قسي وبطّل يودو
تايخلص من بطش غضبةّ هجومي
بيهرب عم يقول الشعر سوقي
===================
شو مين هرب ؟ ههههههههههههه
ولك وينك وينك وينك وين
عمار البراضعي أوووووووووووووووووف
والختام يا سلو وداعاً

الحرف بين الخوابي والزجل
==========
يابحر منقشع بسيرة وفيرة
بنفسك في أنانية كبيرة
ع شطك ليش شفنا الغدر كلو
عنك كل ما منجيب سيرة

إذا شايف مساعي الخير قلّوا
وأهالي الصلح لو وقعوا بحيرة
النقلتلو الحكي من قبل قلو
قبالي موجتك منها خطيرة

ولوما بخاف وضعي تستغلو
وتعمل بو علي في كل ديرة
مابرضى فيك زندي كنت بلو
ولا ركعتك قبالي ع الحصيرة

أنا الموقع محبة بستحلو
مابهجي الكل وبسخر ضميري
وإذا سيفي ياسلو نويت سلو
البحور بنشّف وياروس طيري

كل عركي بجي لغزك تاحلو
بتدخّل حدا غيرك نظيري
حتى بمزح من دربي تفلوا
بفيلم من طوم مستخرج وجيري

وبالنسبة إلي الزرعات غلّوا
بكل مطرح إلي خصمي ونصيري
وبغروب البيدفينا بظلو
لازم نلتقي ونبقى عشيرة

إذا صوب الخوابي الناس طلوا
أنا بقصد مع كرومي وعصيري
تعوا بذات الهدف والمر حلّوا
عيب نكون شحمة ع فطيرة

حرام الشعر يتبهدل محلو
لأجل قصة بلا غصة كبيرة
وإذا مسحت البحر للشعر صلوا
يترك ماردي للصلح مطرح
أمامو الوقت والبّرهة قصيرة
===========
وهون ختمت بهالقصيدة ونقلتها على غروب خوابي الشعر

تحية للغروب وللإدارة
ونشالله على لقاء دائم منبقى سوا . وهالقصيدة حبيت إنشرها
بعد العركة بيني وبين سليمان طراد بغروب زجل اللي سماها لقاء
بيناتنا وطلعت بالحقيقة تصفاية حساب بينو وبين إدارة غروب زجل
أوووووووووووووووووف
والختام ياسلو


الحرف بين الخوابي والزجل


يابحر منقشع بسيرة وفيرة
بنفسك في أنانية كبيرة
ع شطك ليش شفنا الغدر كلو
عنك كل ما منجيب سيرة

إذا شايف مساعي الخير قلّوا
وأهالي الصلح لو وقعوا بحيرة
النقلتلو الحكي من قبل قلو
قبالي موجتك منها خطيرة

ولوما بخاف وضعي تستغلو
وتعمل بو علي في كل ديرة
مابرضى كنت زندي فيك بلو
ولا ركعتك قبالي ع الحصيرة

أنا الموقع محبة بستحلو
مابهجي الكل وبسخر ضميري
وإذا سيفي ياسلو نويت سلو
البحور بنشّف وياروس طيري

كل عركي بجي لغزك تاحلو
بتدخّل حدا غيرك نظيري
حتى بمزح من دربي تفلوا
بفيلم من طوم مستخرج وجيري

وبالنسبة إلي الزرعات غلّوا
بكل مطرح إلي خصمي ونصيري
وبغروب البيدفينا بظلو
لازم نلتقي ونبقى عشيرة

إذا صوب الخوابي الناس طلوا
أنا بقصد مع كرومي وعصيري
تعوا بذات الهدف والمر حلّوا
عيب نكون شحمة ع فطيرة

حرام الشعر يتبهدل محلو
لأجل قصة بلا غصة كبيرة
وإذا مسحت البحر للشعر صلوا
يترك ماردي للصلح مطرح
أمامو الوقت والبّرهة قصيرة
=============

ألشاعر سليمان طراد

منعوك تحكي شعر بعرف يا رفيق
وجايي لعنا تشرب الخمر العتيق
بيضل عنا مواج ترحم خيبتك
وما بنتركك يا بو اسامة عا الطريق
============
Adnan R. Said
سليمان يمكن هيك ممنوع المرور
خلّي ما بين الأهل في نتفة جسور
نحنا الخوابينا ليالي مزهّرة
و طرقاتنا دهاليز ملياني خمور
============
عمار البراضعي
تركو خيي عدنان بعرفو بيلتلت عالفاضي هاهاهاها


في بحور ياعدنان خلقت للهدير
بتزعج خوابي الممتلية بالخمور
ولو طل يشرب نخبها قلبي الكبير
بيزيد فيها كنوز أغلا من البحور
============
عمار البراضعي يلا تصبحوا على خير يا أهل الخير

بيغفى النبيذ معتق بخابةّ هنا
وبيناتكن باخوس وصل عن إتزان
بدكن تشوفو البحر عاركابي انحنى
يقلي آله الشعر والخمرة كمان
============

Adnan R. Said

عمّار عمر البحر مع طول العمار
يومين لو إعصار شعري عليه غار
و نخب الخوابي ان جيت حتى تشربو
بيسقيك دلقة نور مش كاسات نار
============
عمار البراضعي حلوووووووو

من وين بدو النور لينا يلتجي
والبحر شايف موج شعرو بلطجي
نبيذك الأبيض متل قلبك بعرفو
وفي نبيذ أحمر رح يصفي بس إجي
============
عمار البراضعي .
عدنان لو فيك الخوابي بترتقي
وردّك على شاعر مخمّر منطقي
شو بيمنع نشكّل سوا كل الخمور
لما بمحبة وطيب قلب منلتقي
============
Adnan R. Said
عمّار لو شي نهار شفت كتابنا
مليان بتشوفو بقصص احبابنا
و قلبي اذا كل يوم بدي افتحو
بتكرج على كفوفي صوّر اصحابنا
============
عمار البراضعي .
قلبك متل ألبوم أنعم من حرير
مخزن صور للشعر سرو ما انكتم
وفي بهالخوابي بحر تايصفي كبير
بعبيه خمرة وشمع أحمر ينختم
============
عمار البراضعي .
قصدنا على خوابي خمور مجمعين
تانعين بالإلهام مش تانستعين
عدنان شفتو صاحب العقل الرزين
والطيبين كثار عالشمال ويمين
ولما وصلت حبيت حيي الحاضرين
والعلّقوا وإعجاب حطوا متابعين
صرتوا بعيوني متل زهر الياسمين
وشفت الخوابي موقع بمركز ثمين
إلا البحر منشان يهدى بالكم
بحكيلكن بعدين عن فعلو اللعين
هاهاهاهاهاهاها
==================

ألشاعر سليمان طراد
شو عملت يا عمّار احكي ولا تخاف
ما في محي ..عا شرط ما تعرّض كتاف
نحنا بنفهم بالوما ومن الشفاف
ان كان سيفك ساحبو او بالغلاف
عنا احترام الخصم رغم الاختلاف
مقدّس بموقع عتق الخمر السلاف
وبحر الزجل معروف عنا بالزجل
بيضل قلبو يحن عا الشعرا الضعاف
هههههههههه
============
Adnan R. Said
بحر و لعين كتير؟ ما بصدّق كتير
غلطان يا عمّار يا شاعر قدير
بحر الزجل ؟؟ بيطُـلّ عم يهدر هدير
مرّة هَدا ، مرّة جنون و زمهرير
مخزن درر بتليق بعيون الأمير
قاعو مدا سطحو غضب قلبو خطير
موجو قلم و الشط ورقة عم تصير
تا المد يكتب و القوافي يستعير
كل الحلا بالبحر ، بحر الفلسفي
بس المصيبي فيه ما عندو ضمير
ههههههههههههههههههههههه
============




----------------------------------------------
" كرمالكم ع النت تابعــنـــــــا = نسقي القوافي من منابعنا "
" بوجودكم معنا امتلت بالذوق  = ومندونكم مافي لها معـنا "
----------------------------------------------
avatar
عمار البراضعي
المدير العام

عدد الرسائل : 1125
العمر : 51
Localisation : لبنان - ضهر الاحمر
تاريخ التسجيل : 22/01/2007

http://7arf.editboard.com

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى