منتديات الزجل اللبناني الشاعر: عمار البراضعي

أهلا وسهلا بزائرنا الكريم
عليك بالتسجيل لكي ترى كافة المواضيع المخفية
=====================
الزائر رحبنـا برسمــــو = وع التسجيل دعينا يفوت
وغير اللي مسجّل إسمو = عنو منخفي يقـــرا بيوت
=====================


محاورة مع الشاعر حرف وابراهيم ياسين

اذهب الى الأسفل

محاورة مع الشاعر حرف وابراهيم ياسين

مُساهمة من طرف salomon في 12/21/2008, 6:56 am

أول شي تحية قلبيي
وانا رح افتح المحاورة
وانقل افتتاحيات حرف وابراهيم
وبطلب من الشعراء يردو بها الصفحة


افتتاحيية ابراهيم ياسين



بلا يا حرف..هات أقوى ما عندك
أووووووف أووووووووووف

غمزت النجم من طاقة عيوني----و طلَقْت الليل من محنة سْجوني
و رحت فتّش على شاعر تبارى----يلاقي كلمتي و يرعب حصوني

شفت عالغيم ...عم تلمع منارة----لْحقتو.. صرت عا جنّة فنوني
بإيدي السيف و يعيني الجسارة----و يا مين يقرّبو و يبارزوني...!
و ما عندي قلب إتحدى العذارى----ولا أنصاف العذارى بيقنعوني

و بعد ما قفزت عاتاني مغارة----سمعت نقّاد عم يستغيبوني
سبع نقّاد... طلعو يا خسارة----بحجّة يِنِقدوني..ينَقُدوني
واحد قال:.. لازملي حرارة----شحيح و بالصدف عم يسمعوني
وواحد قال:.. طلاتي زيارة----بيمرّ شهور حتى يسمعوني
قلت لا تواخذوني يا شطارى----ما فيكن بالقلبل تعيّروني
لإنو قد ما تزيد الغزارة...----بغابة تشربكت.. تا يضيعوني
بكفيها.. من لساني شرارة----يا ويل ال جرّب يشرقط جنوني!!

رجعت و سْحبت عا لساني العبارة----و لعنت بليس و تعدّل سكوني
و قلت معليش.. إحكو يا غيارى----و متل ما بتحسبوني.. إحسبوني
احسبوني خيال تا شقّ الصحارى----و شردق رملها بدفقة عيوني!!
احسبوني مِحْل.. تا خلّي الكوارة----مداها يغص من "عبرا"ل"جونيه"
احسبوني كوخ.. رح بطلع عمارة----احسبوني جليد رح بطلع سخوني
احسبوني رماد... رح فجّر حرارة----احسبوني إجر كرسي و انطروني
تارجّ الأرض.. من مبنى الوزارة----بألف دعسة على البيعارضوني!!

يا نقّاد الدعاية... و التجارة----ما فيكن قد شعرة تزحزحوني
لأنو بعد تاتطالو الجدارة...----ألف هكتار..عِدّو و الحقوني
الجدارة مش أسامي مستعارة----و جبان تْلتّم "بحرف" الليوني
ولا تبطين.. من خلف الستارة----و متل بخّ الأفاعي تلطشوني
الجدارة.. طعنة الغارة بغارة----و حارة تقابل الحارة بخشوني
و إذا بيناتكن(بوشهاب حارة)----تا كنتو بذات إسمي واجهوني

و إلك مني التحية.. يا إدارة----و على المصحف إذا بتحلفوني
ما بدي بمستشار و مستشارة----بعد نصري عا نصري تكرّموني
ما بدي غير عا عيد البشارة----إذا ناقص ببرحليون شاعر...
عليّي تِكْرمو..و تْبرحلوني..!


و قبل ما إسرج المهرة العتيّة...----اسمحولي بالوطن إحكي شويّة
"فلت المْلق" شاشات و صحايف----بكلمة خنجر و كلمة شظيّة

و ما عدت بهالوضع غازل شفايف----و لا إتنغشن بوِلفي عشيّة
لأنو اليوم... صار الوِلف خايف----عم يرتّب الرحلة المهجريّة

لهيك اتيقّظو يا اهل الخلايف----ان حلّو اتنحنح البركان فيي...!!
بدها تقلب حروفي قذايف..!----و صابيعي رصاص..صوتي مدفعية
و من المصنع لشبعا ما بْزايف----رح بمشّي جحافل بابْليّة...!!
تا محّي.. كل مملكة الطوايف----و إرفع عالنيابة و عالسرايا
عا إسم الشعر أول جمهورية


انطلق برهوم و انسنّو نيابو----و سحب هاك المهنّد من قرابو
و بعت إنذار أحمر للتحدي----ما عاد الروح عم تلقى عْصابو

و شلت سبّابتي... متل المهدّي----و رفعتو عالفضا هدّد سحابو
تا صارو يفرفطو النجمات حدّي----كإنو انشق من فوقي جرابو

و قلت يا ناس مين اليوم ضدّي----العابالو طالع يضحّي بشبابو
طلع من تحت هالحرف المصدّي----و لأنو كان طلع من صوابو
بدل ما أدْبو...مدّيت يدّي...!----تا ردّ الحرف عا صفحة كتابو
و بعتلّو "السكون" العم تْندّي..----تاسكّن جرح أوجاعو و عذابو
و "بفتحة" أكتر من السيخ حَدّي----فتحت الزر تا يدلق شرابو
لقيتو اليوم... راجع بعد "مَدّة"----قلت مازال راجع من غيابو
بعبّي بعد... في "ضمّة" مودّة----إذا بالمنطق مْراجع حسابو
و إذا بالعكس... بيحب التعدّي----و حشد "همزات" تمشي بإنقلابو
تا خلّي.. كل "كسرة" مسْتبدّي----تكسر ألف كلمة عْلى جنابو

و إذا يا حرف مارق ألف "شَدّة"----على راسك.. متل لبنان صابو
مع البرهوم رح بتشوف شِدّة----ولا شِدّة حروبو و انتدابو
هدّي انكان رح تقدر تهدّي...----مع اللي عم تهدّيكن ركابو
هدّو... يا نوافير التصدّي...----مع النبع ال طْلعتو من جيابو

و يا حرف لسانك الجربان هدّي----و إذا بيمرمر عليّي خطابو
عليّي طالقة بيوت التحدّي...----إذا ما بْشقلبو..راسو كعابو
أ
أنا بالشعر... ما بحب التردّي----عطيني بيت بيزلغط جوابو
ما بدي صفصفة من عهد جدّي----و حكي تعتير مدري مين جابو
و يابوشربل ارتاح عْلى المخدّي----انت بالسبع أخبر و بعقابو
و مش بصفحة و لا بقصدان عدّة----و لا بمعلّقاتي لو استجابو
إذا اتحدّيت حرف... بْفرد ردّة..----ما رح بتكون هالردة الوحيدة..
سوى ردّة بلاطة عْلى ترابو


يا ملكة قصر شعري العم تفيقي----البسيني بصدرك الطوق العقييقي
لأني بالشعر... ما بريد ساهل----حدا و ان كان خيي أو رفيقي

و بعد ما اتركعّو ولاد و كواهل----بكفّي و كف سيفي و منجنيقي
صرت صوم الفرايض و النوافل----إذا العقبان ما شفت بطريقي
و إذا بيتْنشّفو تلاتة مناهل:...----"البحيرة"و "زمزم" و دم الفوارس
لا غيم و لا بحر...بيبلّ ريقي



و إذا يا حرف خصمك شفت نارو----ضروري تروح تسأل عن عيارو
اسآل الريح... و اسآل المهنّد----اسآل الغامرو و اللي انهارو

أنا الأول... أنا النمر المنمرد----أنا سيّد عرين اللي تبارو
ما بعطي عا فَرَجْ صيّاد موعد----إلا ما يتلّت إعتذارو

و على ذكر الأسامي يا مقدقد...----على جنبك اسامي كتار صارو
عا إسمي ليش عم تنزل و تصعد----متل مكّوك.. فالت من مسارو

أنا ابراهيم... إسمي بكل معبد----بصَمْتو نور باللفظة وقارو
خلقت و حملت هالإسم الممجّد----و بيّي عا إسم بيّو اختارو
و تا إرفع درجتو و يصير أمجد----نزلت عالساح سجلو يا كْبارو...

بإسماعيل... بالكبش الموحّد----إذا "ابراهيم" ما ضحّى بقرارو
إجا سميّو تا ينسخ هيك مشهد----لكن مع كبش من إختيارو

و إذا (ابراهيم عبد العال) شيّد----عا مفرق ضيعتي.. السد و عمارو
أنا مخصوص جيب لهيك موعد----و عليّي يحرم يشقشق نهارو
تا إشلح سد شعري.. بس أعند----و إلا روس جوقات المعنّى
ما رح بيدشّنو مقلع حجارو



يلا هات تانشوف....



وهذا إفتتاحي اللي انحذف

وينك يا ابراهيم يلا ...........
===================



بـشهر أعياد باعتلك تهــــــاني = يامشــــــــــــرف برابيتا الأولانـي
غزلت قصايدي ع فـرد مغزل = وع نول المنتـدى سحبت المـعـاني

قلّي صاحبي سليمان إقبــــــــل = حــــاور شاعر بصف الحــضاني
من تعليق ليلى صـار يجــــفـــل = مـــــــــابدو نـقدها وعايش أنـاني

وانا ما كنت حاورتك بـمـــعـزل = عن اللي قــال عمرو ما هجـاني
بس بخاف كلما الحرف أقــــــبل = تلحق ضعف غيرك بالجـبـــاني

ولولا بيعتبوا عليي بمــحـــفـــل = لشــــو يا حرف تهــبـط بالمعاني
قلت معليش بدي الشعر أجــمــل = من مروج الربــيــــع الأقحــواني

مع غـوار في ياسـين مثّـــــــــــل = القهــــوة يزقها ويحمل صـواني
وجنب الحرف يابرهــــوم إعقل = أوعـى تصير متلو بّدور ثــانـي

مرة بحاور الأعـــقل وأثقــــــل = وبعض مرات من ضعفن بعاني
ومرّة باكل بحربي مـــتــــــــبّل = ووجـــوه بشوف متل البتنجـاني

ولها المستوا مـــا بحـب إنـــزل = لأنــــو كتــــير قاسي يا حنـاني
أنا رح إعترف ضلـيّت أعـــزل = لأنو الشعـــــر يا برهــوم بــدو
سواعد متل عنتورة وهاني

============

يا واقع ليش ما بتكبح غرورك = ليلى كتير .؟جرحتلك شعــورك
يا جايي عا التحدي وقلت قدّي = وبــــــــعد العيد بتظبّط إمـــورك

انا بدّي خصم بالحرب قـــــدي = وبـــقلب المنتدى تلــمــع بدورك
وبعد ما قص رقبتكن بيــــــدّي = لا في شـــاعر يدافــع يا روحي
وما في شيخ رح يقبل يزورك

============

وحياة ربك خبّر البعـــــتــوك = أنو حرف ع الذبح بدو ديـوك
من منتدى سليمان أو عمّـــار = شعّار طلعوا بدون أيّا شــكوك

إياك تقرب ع خطــــوط النار = خليك مـطـرح ما إلي دفـشوك
ان عصّبت بدي دوّر المنشار = وقطّش بقلب المنتدى رقبــات
كل اللي دخلو لهون من فايس بوك

============

وقــبل ما اقبل العركة الجمـــــيلة = انا معروف عنـّـــي بيـن جيـــــلي
واذا رح ارحمك انتي مفـــــــــكّر = طويلي علــيك يا روحي طويــلي

تشكر حرف والخالق تشــكـّــــر = اللي جــابــك هون تا تسمّع متيلي
يمكن فوت عا الموقع منــكــــــّر = ع ظهر حمار مش ظهر الأصيلي

هون بمنتدى الكلمة تذكـــــــــــر = بــــــــــــــدنا رجال فكرتها نبيلي
بدّك تنرعب وتصير اصفـــــــر = هزيـــــــــــل وما إلك باليد حيلي

اركع غصب وتعلّم تحضـــــّر = وخــفـــــــــّف جبلتك حاجي تقيلي
انا ما كان بدّي اليوم تزغــــر = بس حرقـــــت ديني من الرسايل
وجايي اليوم تا إشفي غليلي

==========

بيخبّروني شــــــاعر مهـــذّب = وكل اللي قلّي هـــا الحكي كذّب
مرجي زهـور موّردي أطباق = وزهري جميل بمنــتـدى مشذّب

لكن إنت عن جـــد ما بتنطاق = ولحرب حرف مصـــمم مجذب
قبلك إجاني شي ألف عملاق = وما رجع واحد طيّب من الموت
من هيّك قلّي ليش متعذّب

===========

يا بطيّخ المنابر بالتـحـــــــدّي = مين القــــال إنك صرت قـدي
انا سليمان طقيّتو قصــــــــايد = ودموعــــــو بلّلو وج المخـدي

وِل عمار ربحتو قلايــــــــــد = وراسو بكسرو لو صار ضدي
وعوايد حرف ما يغيّر عوايد = بدو دجـــــــاج بلدي كل مـــدّة

لكن إنت يازيز الحصـــــــايد = جايي محردب ومن عمر جدي
وبعدك شب بس للخلف عايد = طفـل محتار واقــع تحت شـدة

أنا القصـدان بعطيها زوايــد = وصرت رب المعنى بالتصـدي
وثقل الدم صاير فيك زايــــد = وعطوك الدعـــم تنزل للتعـدي

الرسالة بعثتها حاجي تحايـد = تاتجــرّب معي صعـــبة تهـدي
وانا بالمنتدى رح ضل قـايد = جيـبو بو أســــامـــة ليـوم ذاتو
وأبو شربل لحتى يبوس يدّي

===========

يلا ناطرك وينك ؟
avatar
salomon
عضو مميز
عضو مميز

عدد الرسائل : 1087
تاريخ التسجيل : 23/05/2007

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف salomon في 12/21/2008, 6:58 am





تابع حرف
ولوما طلبت مني شعر مـحّـي = كنت ع الشــعر تفكيرك بصحي
ولأنو العكس يامرحوم صفـى = معك بالوقت مش معتاد ضحي

الحافر كلمتو ع الصخر كفـــى = وديوك الفجر ناداهـــــا انبحي
وخبز الروح كل من ذاق وفى = بيجي عن ذمتو يوفّي لأنــــــو
حرف رغيف أهل الذوق صِحي
================

بدك شعر ياطفل بحنـيـنــــو = وخلايا دمـــــــــاغ تفكيرك بجيـنو
منعت عنو التناسخ حيث ألّم = حمل ع شكــــــل دوللي ناسخيــنو

انا بهالفن أجيالك معــــــــلــم = وبعدك ماعــــــرفت الحـرف مينو
كفو بخد أخصامو معــــــــلـّم = الزجل مع هيك جـــيــــــل معلمينو

قبلك طل كم قزلوط سلّــــــــم = وإذا عمـــــــــــارك بيعـــقد جبينو
العشرة بيرفع سليمان سلّـــــم = تاطعمــــــيكم عسل شهـدي بقافي
حرفي لنحلها مخرسن عنينو
============

وألك مابحب اكتب بـعد بندي = وولا كرحــــوت ليّن يـوم عندي
لأنو الحرف بصفوف القيادي = وانت حمـيل جعبة بصف جندي
اصحى تفتكر عندي تمـــــادي = وع راسك ريش تاتهجم ياهندي
اذا مابتفهم اصول المبــــــادي = من حروفي الألف مجـبور ودي
عصاية أدبك فيها ع زندي

===============

وبابا غنوج عم اعمل واشوي = انتبه لاتروح فوق الصحن قشوة
غيري بيرتشي عنـــــك يخفف = وحرف مابيقبل الدفـــعات رشوة

حرف معتاد تاعيونك يكـــفـــــف = النظر بالليل كنو فيك عشوي
وع درب المقبرة خصامو مصفف = معـو لاتعلق وقبرك بجوعــو
ناطر تايحطك فيه حشوي
======

يا برهوم القصــــــــــايد والمعنى = ألهــــــــا سنين من جنّة عدنّا
ما فيك تطّعم البطيخ لوبـــــــــــي = استنى الموسم الجايي استنّى

انتبه عم بفضح الفات بحــروبي = وع باب المنتدى التعليق عنا
وأكبر معركي تحاشت دروبـــي = وما في قوّة ولا شاعر منابر
قدير يخلّصك باالحرب منّا
==========

وخالقني حرف للشــــــــعر ربي = أطفال الزجل تاطـــل ربـي
الجرن من عندك وعندي المدقة = كلما جعت طل نــدق كــبي

انت تاترجل عندك مشــــــــــــقة = وشــــو بدك تلـــبي تاتلبـي
واذا خيالي إلي بيقول بقــــــــــــة = أنا بشــاقط خــيالي بالتنبي

ولا بفضّل معي تحكي بي رقــــة = عليي هب إبــقى بفرد هبة
وع باب المنتدى الشعر المنــــقى = حتى تلزم حدودك ساعتها
ممكن عود إحكيك بمحبة
=============

تعا تا علمك نوسي ونوســي = بعد الجامــــــــــعة بتنفع دروســــي
حوار زغير مع شاعر المتلي = بيسوى شهر من درس النــفوســـي

انتَ من وين منّو مهم تتـــلي = ع درب العتم ضوالك فانـــــــــوسي
بسـرعة زلحفي صح المشتلي = ودشر ع الغلط ركض الجــــاموسة

السبح صوب السفينة عكس سطلي = نطرها وقال رح كثّر جلوسي
وخسارة معركي أو أكــــــــــل قتلي = قديرة تعلــمك بالشعر عندي
كيف النصر وأصول الفروسي
=============
avatar
salomon
عضو مميز
عضو مميز

عدد الرسائل : 1087
تاريخ التسجيل : 23/05/2007

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف IIbrahim في 12/21/2008, 8:08 am

يلا شرّف عالمعنى....

يا شعر... إنزل عا مجالي رهونة----برّر غيابي...إنت أخبر شو بني
مشغول...بالمخبر كنت عم إعتني----و أوقف على المجهر و حلّل عيّنة
و هلق إجو الأعياد يا حرف انحني----طالع عابالي رد عمر الولدنة...
و إزرع على الميلاد لمبة بكل عين----و إلعب "الكِلّة" براسك و راس السنة
avatar
IIbrahim
شاعر

عدد الرسائل : 99
تاريخ التسجيل : 31/05/2007

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف 7arf في 12/23/2008, 4:50 am



قايل جهازك عيب في عنـــدو خلل = ونحـــــنا منــــيح منـعرفك لاعب كلل
عقلك خفيف وجســــمك معبّـى علل = وبالمختـــــــبر خلــيك تا تداوي العلل
اتوقى على الأعياد عنقك ياحـــــمل = وخلي القوافي سطور وحروف وجمل
وتاحرمك تبعث رســــالي للحروف = بردك بلا تـــــــــابوت ع كرسة شلل
=============================


عرفت الحياة بتجربة وكُبـــــر الجراح ... فيها فشل فيها أمل فيــــها نجاح

وطقم السعــــادة اللي عقِل مابيخلـــعو ... لولا استفاد من الخطأ بعد الكفاح

============================
avatar
7arf
admin

عدد الرسائل : 1125
العمر : 50
تاريخ التسجيل : 01/11/2006

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف IIbrahim في 12/23/2008, 8:36 am


بعدك متل ما بعرفك من قبل حين----راجعلنا بستفة كراسي مْدَولبين
كرسي عرش برهوم شيخ الملهمين----اتنعش الكواكب حدّ منها ساجدين
و شو معرّمين و حول منها مدلّلين----و ما بواخذك لو شفتها للمُقعدِيْن
عا قدّ ما عم دلّل بشمس و قمر...----بتشوف دولابيْن.. عاشمال و يمين
avatar
IIbrahim
شاعر

عدد الرسائل : 99
تاريخ التسجيل : 31/05/2007

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف 7arf في 12/24/2008, 2:30 am

عنك اذا بتشوف سبع الغـــاب غاب = إياك تـتـثعلب مابيـطول الغيــــــــــاب
تأخرت عنك قصد تاترد الجــــواب = بتعرف وقـت مابعود ع بملمص رقاب
ولما ع تاني موقع دعيـت الشـــــــباب = وهربت عرشك دمروا وصفى خــراب
ومن يومها وعربة قـديمـة كرستــك = قاعد عليها وشغلتك جــــــــرالدواب
==============================


عرفت الحياة بتجربة وكُبـــــر الجراح ... فيها فشل فيها أمل فيــــها نجاح

وطقم السعــــادة اللي عقِل مابيخلـــعو ... لولا استفاد من الخطأ بعد الكفاح

============================
avatar
7arf
admin

عدد الرسائل : 1125
العمر : 50
تاريخ التسجيل : 01/11/2006

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف IIbrahim في 12/25/2008, 2:19 am


جدّك على الدابة لا تنسى يا دويك----كدّ و فلح حتى اسمرّو جانحيك
و هلق انا عا دابْتو قبلان هيك----شدّيتها... و بعربتي قرّبت ليك
حتى بعد ما تطّق "جوز" بعينتيك----يصيرو اتنين الفرفكولك دينتيك...
قدموس حافر حرف مرة عالصخور----و برهوم حافر طبعة الحافر عليك
avatar
IIbrahim
شاعر

عدد الرسائل : 99
تاريخ التسجيل : 31/05/2007

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف 7arf في 12/25/2008, 5:57 am

قدموس حط الحرف عن عـلم وبــيان = هيذا وســـــام كبير فخري ما انهان
لكن تاتحـــفر انت مع حرف المصـان = مضطر امنع هالحكي وشلك لسـان
بدك جوز نضوات مش حافر حصان = ع مسّـاسين هجمت خسران الرهان
مسّـــــــــاس خلقة ان قربت بيشـبّــعك = ومسـّــاس تـاني حاملو خرج الاتان
============================


عرفت الحياة بتجربة وكُبـــــر الجراح ... فيها فشل فيها أمل فيــــها نجاح

وطقم السعــــادة اللي عقِل مابيخلـــعو ... لولا استفاد من الخطأ بعد الكفاح

============================
avatar
7arf
admin

عدد الرسائل : 1125
العمر : 50
تاريخ التسجيل : 01/11/2006

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف IIbrahim في 12/25/2008, 10:01 pm

ان شفتك بمسّاسين.. هاجم متل ديب----جايي تا إسحبهم بلمحة عن قريب..!
و مسّاس رح شكّو عا طولك يا لبيب...----و مسّاس تاني بالعرض متل القضيب
تا يصير في عندي الصليب المش غريب----و كرمال ما زعّل أبو شربل و غيب
رح علّقك... من فوق منّو و قولها...----شكّيت فزّاعة... ما شكّيت الصليب
avatar
IIbrahim
شاعر

عدد الرسائل : 99
تاريخ التسجيل : 31/05/2007

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف 7arf في 12/26/2008, 12:57 am

تركنا جماعـــة بالقــوافي معلمين = من دروز جينا مع نصارى ومسلمين
وتاتزعّل سليمان مينك انت مـين = كرمال شخص بتكِرم وبتسب ديـــــن
نحنا رســـالة شعر إلــكن حاملـين = وبتـروح الله لايـــــــــــــــردك يافطين
قبلك مرق يوضــــاس باع معلمو = ومتلك ابن ملجم قتل سيـــــدو الأميـن
====================


عرفت الحياة بتجربة وكُبـــــر الجراح ... فيها فشل فيها أمل فيــــها نجاح

وطقم السعــــادة اللي عقِل مابيخلـــعو ... لولا استفاد من الخطأ بعد الكفاح

============================
avatar
7arf
admin

عدد الرسائل : 1125
العمر : 50
تاريخ التسجيل : 01/11/2006

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف IIbrahim في 12/26/2008, 6:24 am

يوضاس مع بن ملجم الإبن اللئيم----شو جاب عا إسمي أسامي من الجحيم؟
إسمي ابراهيم اسآل عني يا فهيم----اسأل المؤرخ.. و المفكّر.. و الحكيم
و اسآل مينك إنت حتى يا غشيم----عم تتهم ابراهيم... بالجرم القديم
يا خجلتو ابراهيم من كبش الفدا----و يا خجلتك قدّام مِلّة "بو ابراهيم"!!
avatar
IIbrahim
شاعر

عدد الرسائل : 99
تاريخ التسجيل : 31/05/2007

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف 7arf في 12/27/2008, 12:42 am

سميّيك بعيد الشــبه عنك ياظـبـي = في فرق مـابين السـبــع والارنبـــــي
الخيّال شفتو خيال سحرا مُرهـبي = وراجــع تشقــّــلب بالاســامي شقلبي
وهالشدةّ اللي بلعتــها بهالتجـربي = براسك الفــــــردة التانية تاج الغـبي
حتى ابو ابراهيم ع المربى يقـول = يلعن الساعـة اللي خلق فيها الصبي

==========
الدجّل على فادي البرايا وع النبي = من حرف مابيخلص ع شفرة طيبي
بالشعر يامرحـــــــوم مني بتختبي = وبالدين بو براهيم ســـــيـّـد مذهبي
=================


عرفت الحياة بتجربة وكُبـــــر الجراح ... فيها فشل فيها أمل فيــــها نجاح

وطقم السعــــادة اللي عقِل مابيخلـــعو ... لولا استفاد من الخطأ بعد الكفاح

============================
avatar
7arf
admin

عدد الرسائل : 1125
العمر : 50
تاريخ التسجيل : 01/11/2006

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف IIbrahim في 12/27/2008, 8:14 pm

مش كل والد... ضحكتو بتضلها----أحيان لازم بالخشونة يحلّها
و "يلعن الساعة" ساعة ال بيسلّها----فورة كلام و فلتت من مْحلها
و ان قالها بلحظة غضب عا حلّها----بسكت و ببقى للأبوّة جلّها..
ولا كون متلك بس يلعن ساعتي----إتْنمرد.. و إلعن العيلة كلها
avatar
IIbrahim
شاعر

عدد الرسائل : 99
تاريخ التسجيل : 31/05/2007

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف 7arf في 12/28/2008, 12:39 am

يا صدر حرف الموهبة ما أوسـعك = تا حملت شاعر قد كلوة إصبـــــعك
ما عرفت يا مضروب مين الوقّعك = مع حرف بدو بالمعاني يوجــــــعك
بتلعن عيال الابجدية بمنــــــــــعك = وع هيك صفحة الشقشلك تا يطلّـعك
مش بس بلعن كل تكّة خسرتـــــها = يلعن الساعة اللي قبلت غني مـعــك
===========================
اللي هارقك ومغنجك ومشجــــعك = غيـــــر العاسيطو تعربشت تايرفعك
وبييك إذا ع هيك كلمة مدلـــعـــك = حرف المواهب بالمـــــواقع أبدعـك

===========================


عرفت الحياة بتجربة وكُبـــــر الجراح ... فيها فشل فيها أمل فيــــها نجاح

وطقم السعــــادة اللي عقِل مابيخلـــعو ... لولا استفاد من الخطأ بعد الكفاح

============================
avatar
7arf
admin

عدد الرسائل : 1125
العمر : 50
تاريخ التسجيل : 01/11/2006

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف IIbrahim في 12/29/2008, 12:47 am

نعي يا جوانح الإلهام... ليّي----احمليني عالمقامات العليّي
احمليني عا فضا أوسع و أكبر----يا غبني بهالفضا ضيّق عليّي

يا حرف اطلاع من جلدة الدفتر----إجت فرصة العيد المدرسية
إلك ساعة... بلعناتك مصبّر----كإنو... راكبك جنّي عشيّة!!

أأنا ما بواخذك عا هيك منظر----و تا قلّك كيف تحليل القضيّة
إنت من بعد ما الإعصار زمجر----صرت تلعن بعركتنا العتيّة
بتلعن ساعة الدفشك عا منبر----عمالقتو... نوابغ أشبهبة!!
بتلعن ساعة الحطّك بمحضر----بيفضح... كل قمحة ملتويّة
بتلعن ساعة.. الصابك بميبر----ويلّي شلْحك... بضربة قويّة
حاجي تلعن و تدعي و تجعر----ولاقيني... بكلمة جوهريّة
و صدّقني... إذا اللعنة بتفجر----أو بتنزّل قبالا ضحيّة...
عا "غزّة".. طالع اليلة مْزنّر----كترة ماازرعْت لعنات فيّي..!!

إنت يا حرف... للعلّة مصوّر----و إذا انعربو الحروف الأبجدبة
تخسى عا إسم "برهوم" تقدر..----تفوت بحرف يا حرف الأذية
إذا "بالباء"... رح بتفوت إحذر----لإنو الباء باب البابلية
و "راء" انكنت... لا تحلم بتقدر----رائي رايتي و راية رعيّة
و إذا "بالهاء".. رح تدخل اتذكّر----هائي هالة الهبّات هيّي
و "واو" ان كنت لا تدعس بمعبر----واوي بتشلحك ومضة وصية
و إذا "بالميم"... جاييني مْنكّر..----على ميمي ما مارق مسرحيّة

إنت من وين يا حرف المزوّر؟؟----و من وين السلالة المرجعية
على الموقع... إلي عامين بظهر----ما شفنا إسم أو صورة نقيّة
إنت مجهول... لفّاك المقدّر...----نزلت بالكون غلطة مطبعيّة
و خديجة و رابحة و عبلة و كوثر----هزّولك سرير الطفولية
و عا تمّك نهد أبيض.. نهد أسمر----و معك طرْزان بالغاية سويّة!!


و لإنك صرت عا إسمك مْستّر----بتخجل بالأصول الهمشرية
دعيتك عا مباراتي تا تحضر..----تا لمّع هالنسب لنّو شويّة
و قلت بيجوز هالأصل المزنطر----بتشفعلو الأصول الشاعرية
و من الردة الملاني قداح عنبر..----بتحملّك بطاقة عائلية
و تسبك متل شعري شعر جوهر----تا حطّك حد خيي ابن بيّي
طلع شعرك ...على شكلك معتّر----لعنت العاطفة و الحاتمية
و سحبت السيف من بيتو المجمّر----و قلت يا خرف حلّتها بيديّي
طيّر راسك ...بضربة غضنفر----تا يطلعك تبلّش عمر تاني
و تحمل وقتها إسم و هويّة

مع محبتي...إبراهيم
avatar
IIbrahim
شاعر

عدد الرسائل : 99
تاريخ التسجيل : 31/05/2007

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف 7arf في 12/29/2008, 4:04 am

ع ألفك ألف لعني يا ضــنـــــايــي = يا متحـــــــدي الملوك بلا هـدايي
وحتى فهمّك سر المواقــــــــــــــع = إلك مخصوص جهزّت العصـايي

مدير المنتدى قلي ما واقـــــــــع = شـــاعر مهتري من الذوق خـالي
وصديقو المشرف العنك مـدافـع = عن ضعــاف القوافي بهيك حـالي

ع شو جايي وبيوتك وهـــم شـاقع = كأنك صرت بو زيـــــد الهـلالي
وحلمك كذب والتفنيص واقــــــع = ما فيك نهار توصل ع ذيــــــالي

انا حرف الكتب شعــرو روائــع = سرقت من القـمــــر حلم الليـــالي
وانت بالبخل يا مرحـــــــوم ناقع = قصيدك ما إلو عــــنـــــا كفـــالي

مرق عملاق قبلك فيه ســـــامـع = ولحظة ماقدر هدّى قبـــــــــــالي
وتحت شَدة وشِدة صار واقــــع = البعث للحرف ع الخاص الرسالي

لأني كنت كف كبير فــــــــاقــع = ورحت ع طولك مشلقح يامــــالي
لها الأسباب ما بدك الواقـــــــع = وعارف منتدى الأحباب غـــــالي

أنا مابحب ضيـيـع وقت ضائع = ومــــــــــع الملاّك ما بتقعد فعالي
بتعرف في حديث اليــوم شائـع = الغبي بيموت تاتمـــــــوت النذالي

ولا تزعل من حرف تا تصير نافع = قرّب نــــــخ تاتمسح نعـــالي
شكلك هندسي واللون فـــــــــــاقع = وراســــك قد برميل الزبـــالي

ع شو بدك رسم شمسي مخــادع = الصورة بالشـعر هيي الأصـــالي
ماشايف صورتك ياقرد مـــــــايع = بتشبه صـــايرة صحاب المعالي

وتاتعرف حرف حاجي خوف دامع = حروفو متل جبران الشـمـالي
حرف الحاء حاوي حروف جـامع = ورواق الفجر وفجور البسالي

إذا عندك بها العركة دوافـــــــــع = وبدك راس بالموقع خيــــــــالي
أنا ما برحم ولا بحب دافـــــــــع = عن اللي بيتركوا الموقع هـريبي
وما بقشع غير الله بس عالي
============
كنت عم فرفكلك مناخيرك لا تزعل مني بحبك هههههههه


عرفت الحياة بتجربة وكُبـــــر الجراح ... فيها فشل فيها أمل فيــــها نجاح

وطقم السعــــادة اللي عقِل مابيخلـــعو ... لولا استفاد من الخطأ بعد الكفاح

============================
avatar
7arf
admin

عدد الرسائل : 1125
العمر : 50
تاريخ التسجيل : 01/11/2006

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف IIbrahim في 12/29/2008, 4:50 am

7arf كتب:
[color=red]وراســــك قد برميل الزبـــالي

ماشايف صورتك ياقرد مـــــــايع

color]


[b][size=24]كلّك ذوق يا آدمي!!!!!! على كل حال الإناء ينضح بما فيه و إنت نضحت بما فيك و كتّرت
و مش رح قول أكتر من هيك
avatar
IIbrahim
شاعر

عدد الرسائل : 99
تاريخ التسجيل : 31/05/2007

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف 7arf في 12/29/2008, 5:19 am

برهوم لو كنت محلك مابزعل بس كنت برد بالشعر وبقول
=======================

يانقد المنتدى شعري اسمعلي = وعلى الأمجاد ابياتي اطبـــــــعلي
انا تخيت تا إمســـــــح نعالك = يانعلي ولابســـــــــي بالاجر نعلي

انا مش قرد ياحرف بمجـالك = استحي ولا تسعل السعلي ع سعلي
وجوز الهند لو كنك بـطــالك = وعلى كـــــتافك رقصت بفرد نطة
لما شعرك فكاري نزعلي
===========
بـس الله واعلــم شو حرف بيرد !!!!!! ههههههه لاتزعل لوه عيب وشو
هيدا الاناء ينضح بما فيه استحي وخلي صدرك رحب لا تخلي غير مواقع
ينزعوك تعلم ع المرجلي بتصير شاعر بربي اني مش زعلان منك وبحبك

===================


عرفت الحياة بتجربة وكُبـــــر الجراح ... فيها فشل فيها أمل فيــــها نجاح

وطقم السعــــادة اللي عقِل مابيخلـــعو ... لولا استفاد من الخطأ بعد الكفاح

============================
avatar
7arf
admin

عدد الرسائل : 1125
العمر : 50
تاريخ التسجيل : 01/11/2006

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف 7arf في 12/29/2008, 5:56 am


هون المرحوم كتب
كلّك ذوق يا آدمي!!!!!! على كل حال الإناء ينضح بما فيه و إنت نضحت بما فيك و كتّرت
و مش رح قول أكتر من هيك
اما بمنتدى سليمان غير شكل. زاد كلمتين ماعجبوني هههههههههههه
بس عا كل حال الحق علّي عمل من قيمتك و اتحاور معك
==============
اولا فلقت ربي بالرسايل وانت بدك تتحدى وتجرب حالك معي انا ماطلبت منك يابطل
وبما انك انا اعتديت فرجينا بزعك ولاتكتر كلام
=============
وهون لأنو زدت هالكلمة رح طقك

=============

استحي ياحامل القلب الحريمي = قبل ما لحقك حوش الحريمـة
وطقك كل يوم اربع قصــــايـد = وحني بدمك كفوف الجريمـي

انت مش خصم يازيز الحصايد = لو انّك خصم عديتك غريمي
وكنت بلبسك مني قلايـــــــــــــد = لأني شاعر كفوفي كريمــــي

هون بمنتدى سليمان زايــــــــد = كلام جديد وطباعك لئيـــمـي
وانا ياريتني ابقى محــــــــــايـد = ومعك مانزلت اتبارى لأنــو
بجنب اسمك حرف خسران قيمي
=============
واحد سأل ابنو بماذا تغطى الجبال في فصل الشتاء يابني ؟
رد ابنه وقال : بالحرامات يا بابا
فقال والده ( ولك كول قلبي بس تعلّم)

ههههههههههههههههههههههههههههههه


عرفت الحياة بتجربة وكُبـــــر الجراح ... فيها فشل فيها أمل فيــــها نجاح

وطقم السعــــادة اللي عقِل مابيخلـــعو ... لولا استفاد من الخطأ بعد الكفاح

============================
avatar
7arf
admin

عدد الرسائل : 1125
العمر : 50
تاريخ التسجيل : 01/11/2006

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف 7arf في 12/29/2008, 11:45 pm


ليلى كتبت مجددا
الهيئة حرف متأثر بالإيدعشري
===============
محمد الخطيب كتب

له له له له له له.... هيك نزعتوها بالاخر.......
حرف اسمحلي اقللك بانك نقلت كثيييير... انا بحبك وحياة عمري بحبك.. وبرهوم خيي وصاحبي وهوي استاذي بالشعر... خلونا مروقين باشعاركو الحلوة هيك نزعتوها...
اول شي وقبل ما كمل كلامي.. حرف انت غلطان غلطة او حتى انا بعتبرها خطيئة بحق الشعر.. بالقصيد الختامي تبعك.. اول بيتين ع قافي "ايي" وباقي القصيدة ع قافية "الي"... اذا الشباب مرقولك اياها انا ما بمرقها.... بس ما تفكرها تحدي...
بتمنى تراجع حساباتك بخصوص هالقصيدة ومضمونها....

وبتمنى تققبلوني اخ للثنين.. وانا ما رح علق اكثر من هيك وبتمنى نشوف منكو محاورات ثانيي اقوى ومستوى اعلى من هيك "يا استاذنا حرف"

تحياتي للجيمع........ تلميذكن محمد خطيب
===========================
سليمان كتب
أول شي اضم صوتي للأخ محمد وبقول غلطان يا حرف القافية لا تكتب هيك ضنايي وخالي اول مرة بشوف شاعر بيستعملها انا بعرف مش انت
بتغلّط هيك غلطات بس يمكن كنت مهووس ترد عا قنبلة ابراهيم هههههه بها القصيدة العصماء
وتاني شي بالنسبة للهجا انا عندي رأيي الشخصي بالزجل كل شي مسموح بس ضم اصول وبعتقد التشبيه كان قاسي شوي بس بعتقد اراهيم اكبر من هيك
وما رح يزعل من مهترات حرف السميكة
وبالنسبة للموضوع كنت حابب احذف التعليقات بس ما قدرت احذف لأنو ما فيني احذف الا بموافقة الطرف المختص الا بتفاجأ بالمستر حرف
انو ناقل الموضوع اضطريت تا احذفوا
==================

harf


ياشباب يا اخوان ياحبايب اولا كلكن بتعرفو حرف جوابو ارتجالي
اول شي بشكركم ولكن لكل حصان كبوة مابدي عدلها حتى يشوفها القاصي والداني
وانا رح رد طبعا بالشعر وهلق ولاتنحمصوا للمرحوم زيادي خلص انا بعتبر حالي
خسران هالجولة لا حولا ولا وبرهوم حبيبنا شاعر كبير بعرفو مابيزعل
هههههههههههههههههههههههههههههههههه
وصراحة انا من هيك ما بحب حاور
غير عمار وسليمان لأنهم بيتحملوا لساني وصردهم رحب
ومن هيك خيي ابراهيم سألتك اذا قادر تتحمل لساني ولا تزعل وحياة من جمعنا بهالمنتدى بحبك ههههههههه

بس لازم تعرفوا ليش حرف عملها قافتين عن قصد .عليهم ورررررررررررر

=================================


مين اللي قال القافية حلــــــطة = المغشوش فيها بضربو بزلطة
حتي يرك فيها مستــــــــــوايي = عملـت من الثـــلج للقلب خلطة

شلحت برهوم ع المنبر ورايي = لقيــتـو ناعم ومضـروب بلطة
وانا عن قصـــــد تاحقق منايي = ضنــايي كتبتها وبعدين خالي
تايفهم علقتو مع حرف غلطة

===========
تحياتي ومحبتي للجميع وبربي الشعر حلو ومالازم حدا يزعل
المحبة أهم شي وانا بحبكم ههههههههههههههههههههههههههههههه



عرفت الحياة بتجربة وكُبـــــر الجراح ... فيها فشل فيها أمل فيــــها نجاح

وطقم السعــــادة اللي عقِل مابيخلـــعو ... لولا استفاد من الخطأ بعد الكفاح

============================
avatar
7arf
admin

عدد الرسائل : 1125
العمر : 50
تاريخ التسجيل : 01/11/2006

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف salomon في 12/30/2008, 12:34 am

يا شعّار القلم والأرتجالي ***اتركوني اليوم هنّي وشوف حالي
ب قلب المنتدى شعّار عنا***اسمحولي اسكر بخمر الخيالي
ابن ياسسين يا حرّوف منّا***شاعر عبقري وشعرو مثالي
وانت حرف المواقع شهد جنّى***وقصيدك معصرة لعنب الدوالي
تركونا ورد ب الموقعنا تهنّى***ومدير ومشرف الحملوا الرسالة
جمعوا قلوب عشّاق المعنّى***وناقص بعد ليلى بنقد لاذع
الريشة تغطّها وتحكي بعدالي
avatar
salomon
عضو مميز
عضو مميز

عدد الرسائل : 1087
تاريخ التسجيل : 23/05/2007

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف عمار البراضعي في 12/30/2008, 2:05 am

أضم صوتي الى اصوات اخواني متمنيا التعديل ببعض الأبيات


الك يامنتدى الكلمة بنشـيـــــــدي = تحية من خـفق قلبــــــي ووريدي
بقلبك اخوتي وحبيت عيـــــــــيـد = قبل راس السـني ليـــــالي مجيدة

شايف كل فرد بالشعـــــــر ســيد = وع ايدو بكبس زيــــــادي بإيدي
تاوصلو التحية مــــــــــــابحـيـيد = ومن بيناتـــــنــــــا ياجبال حيدي

حرف بالشعر مش شـايف وحيـيد = الباقي اخوتـــــــــو ومنها جديدة
ولا ياســيـــــــن ع الزعلة بيقــيد = صـــدرو كبـير بعرف عن عقيدة

انا بهالمنتدى الصحبة بأيـيـــــــد = رجـــال الفكر بالسمعــة الحميدة
وزنابق بيننا بتعليق جـيــــيــــــد = متل اخواتنا الردوا عليـــــــــــنا
وخلوا أسرة الموقع سعيدة

* * * * * * * * *
وكل عام وانتم بألف خير



----------------------------------------------
" كرمالكم ع النت تابعــنـــــــا = نسقي القوافي من منابعنا "
" بوجودكم معنا امتلت بالذوق  = ومندونكم مافي لها معـنا "
----------------------------------------------
avatar
عمار البراضعي
المدير العام

عدد الرسائل : 1125
العمر : 50
Localisation : لبنان - ضهر الاحمر
تاريخ التسجيل : 22/01/2007

http://7arf.editboard.com

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف 7arf في 12/30/2008, 3:59 am

البيضم صوتــــــــــو للغلط ما بأيدو = ولو كـــــان سبع المرجلي رح قيدو
المش عارفين الحرف شعرو سـيدو = بالشــــــعر مابيشفق ع ابنو وحيدو
المرحوم ودولي الحذف تاعيــــيدو = ومني جـزا بشي الف صفحة عييدو
القد الحمل أهلا وسهلا يشرفـــــــوا = المش قد حرب الحرف عنو يحيدوا
============================


عرفت الحياة بتجربة وكُبـــــر الجراح ... فيها فشل فيها أمل فيــــها نجاح

وطقم السعــــادة اللي عقِل مابيخلـــعو ... لولا استفاد من الخطأ بعد الكفاح

============================
avatar
7arf
admin

عدد الرسائل : 1125
العمر : 50
تاريخ التسجيل : 01/11/2006

الرجوع الى أعلى الصفحة اذهب الى الأسفل

رد: محاورة مع الشاعر حرف وابراهيم ياسين

مُساهمة من طرف nawef في 2/25/2010, 5:27 pm

الله يعطيكون العافية وبصراحة هالمحاورة من اقوى حوارات الزجل
وبتحمل ارقى معاني التحدي بدون مجاملات ومسايرة و
وياهيك التحدي يا بلاها

nawef
عضو

عدد الرسائل : 27
تاريخ التسجيل : 22/01/2007

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى