منتديات الزجل اللبناني الشاعر: عمار البراضعي

أهلا وسهلا بزائرنا الكريم
عليك بالتسجيل لكي ترى كافة المواضيع المخفية
=====================
الزائر رحبنـا برسمــــو = وع التسجيل دعينا يفوت
وغير اللي مسجّل إسمو = عنو منخفي يقـــرا بيوت
=====================


رمال متحركو الدكتور باسم زريق وبحر الزجل

اذهب الى الأسفل

رمال متحركو الدكتور باسم زريق وبحر الزجل

مُساهمة من طرف salomon في 4/17/2011, 9:23 pm

ألشاعر سليمان طراد
باسم بيقولوا الناس في عندك خيال***نازل من المريّخ كوكب من جمال
بحر الزجل داعيك يا ابن الحلال***تضوي مشاتل زهر وتعبّي سلال
تفضّل على موضوع راقي بلا جدال***ووزع نجومك عا اليمين وعا الشمال
شطوطي رمال محرّكي وبحري غضب***وما فيك يا دكتور تمشي عا الرمال

بحر الزجل



Bassem Zraik
سليمان يا بحر الزجل و الموهبة
شعرك حلم قبطان ع الشاطي ربي
تفضّل على قلبي متل خيّي و أبي
ببنيلك من ضلوع صدري المرتبة
لكن لا تتحدّى الفنا عا ملعبي
فكري سما للشعر و لساني نبي
و مهما يا بحر تعربد و تعصف غضب
إجمد عند ما بتلمسك ايد النبي



ألشاعر سليمان طراد
طلبناك تمشي عا الرمال وما تهاب***لقيناك جايي عا البحر لابس تياب
خليّت موجي يروق تا تشد الركاب***وقفيّت كاس الشمس وسقيت الغياب
ولمّا لقيتك خفت حكمك اكتئاب***وهربت مني لا سؤال ولا جواب
قررت خلّي الدر يا باسم معي***ان حبيّت تقطف در انزل عا العباب

بحر الزجل



Bassem Zraik

الخلقان تاج الموهبة و درّو معو
بعباب بحرك صدفتك مش مطمعو
خلّي البحث ع النت يبقا بموضعو
بخوف و كآبة سامعك ما بتقنعو
و اللي ع بحرك جاهدو و جدّو و سعو
يجيبو الدراري من الغميق و يرجعو
لولا ما رملي استقبل رجوع البطل
قلّي ببحرك درّتك شو بتنفعو




ألشاعر سليمان طراد
الصدفة اللي جمعت بحر مع شاطي احترق***شربت غياب الروح كبّاية عرق
وغيم الوحي لو فوقك بصدفة مرق***بتصير شاعر...!! من حضن الله سرق
وتا تشيل درّي غوص لا تخاف الغرق***الشارب سفينة ضو ما بيبلع ورق
ولا تضل متل الرمل تستقبل مواج***تصيّد الرزقة وبلل جبينك عرق

بحر الزجل



Bassem Zraik
فوق الرمل قاعد مع القد النحيل
ت اسمر جسم الموهبة بشمس الأصيل
و رملي البقي لمواجك الضاعت دليل
شاعر وصل جيل المضى في غير جيل
و لمّا السفينة بلعتها بحملا التقيل
و ضاعوا البشر بين الرجا و المستحيل
شافوا المنارة الع الشواطي معمّرة
و هربوا من الموجات لم لاقوا السبيل


رح عيدها و عمر الشعر بعدو طويل
و وحدي بحمل القافية بقدر بشيل
سألتك سؤال تجاوبو و تعطي الدليل
مني هربت بالغيم ت تلاقي البديل

El
ألشاعر سليمان طراد
خليّك نايم فوق شطّ الزكريات***متل العجايز ناطرة ترجع بنات..!!
تلحلح يا ابني وروح جاهد بالحياة***ولا تضّل تمّك فاتحو وتقول هات
بحر الزجل عا النت عندو واجبات***يطوّر مواهب شعر ويشجّع هواة
من حيث جايي البحر حتى يشجعك *** اياك تنسى بالعنق طوق النجات

بحر الزجل


Bassem Zraik
ختير الشاطي و طل ع الرمل المشيب
و بعدك طفل عم ترضع شفافك حليب
و من حيث عقلي راجح و فكري لبيب
خطبت العلم حتّى وعي براسي الطبيب
و ما زال شعري مشعشع الكون الرهيب
حبّيت ابقى ع الشواطي يا أديب
و نشرت شرشف نور عا كلّ الدني
و تركتك بعتم البحر تايه يا كئيب
.
.
.

خلّي القوافي بموضعا يا عندليب
و لا تضيّع الموضوع وين الدر جيب





وهنا الرابط للأمانة



[ندعوك للتسجيل في المنتدى أو التعريف بنفسك لمعاينة هذا الرابط]



avatar
salomon
عضو مميز
عضو مميز

عدد الرسائل : 1087
تاريخ التسجيل : 23/05/2007

الرجوع الى أعلى الصفحة اذهب الى الأسفل

رد: رمال متحركو الدكتور باسم زريق وبحر الزجل

مُساهمة من طرف salomon في 4/17/2011, 9:25 pm

تركني كئيب وموجتي تحمل يخوت***ولا شوف كل نهار عالم عم تموت
فضّلت خبّي الدر عن عينك وفوت***بضو الخيال النايم بأجمل تخوت
ولا ضل متلك عا الرمل ابني بيوت***فيها قراصنة القصايد والبيوت
من هيك ما ضويّت دري بمسمعك***وضليّت صايم عمرببحور السكوت

بحر الزجل
Bassem Zraik
مرّ العمر ع نحاسك و صدّا الحنين
لا تسوّقو جوهر مع الشعر التمين
و بيتي الحضن طفلة يتيمة بلا معين
بحرك خطفلا بيّها و تَرْكو سجين
و هلّق ع بالي اسألك كنّك فطين
وعّي القريحة و اعتني و حك الجبين
لولا زرعت بالموج كلّ مواسمك
قلّي بأيّا مطحنة بتجمع طحين
avatar
salomon
عضو مميز
عضو مميز

عدد الرسائل : 1087
تاريخ التسجيل : 23/05/2007

الرجوع الى أعلى الصفحة اذهب الى الأسفل

رد: رمال متحركو الدكتور باسم زريق وبحر الزجل

مُساهمة من طرف عمار البراضعي في 4/18/2011, 12:25 am

يعطيكون الالف عافية على هالموضوع الراقي
ردة حلوة



----------------------------------------------
" كرمالكم ع النت تابعــنـــــــا = نسقي القوافي من منابعنا "
" بوجودكم معنا امتلت بالذوق  = ومندونكم مافي لها معـنا "
----------------------------------------------
avatar
عمار البراضعي
المدير العام

عدد الرسائل : 1125
العمر : 50
Localisation : لبنان - ضهر الاحمر
تاريخ التسجيل : 22/01/2007

http://7arf.editboard.com

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى