صرلي عمر

من طرف علي عامر 11/4/2009, 5:30 pm

صرلي عمر اسهر مع الحرمان
بليل الألم والضو ما يطلع
وبفرد كاسه خمرة الايمان
ومع مازة الحلم الجمر اجرع

صرلي عمر احمل فدا دموعي
شيّار همّي وادفن العنّه
بتراب قلبي وضجّر ولوعي
ومتلي ضمير الليل مستنّي

صرلي عمر حزّم على الأسرار
منديل حكتو بخيط بسماتي
واعزف بحبر الروح ع الآثار
لحن الطهر من كفر ابياتي

صرلي عمر مع شردة عطورا
هايم بصحرا وعود ملغومه
تا شاطر المجنون شي مشوار
وبعيد حبّا شعّل كرومي

صرلي عمر احلم بأعجوبه
نبعة ضماير تشقع بشي جرد
بشوكه تبلسم حيرة دروبي
وجمره تصلّي عا نهود الورد

صرلي عمر دفّي الشمس بكتاب
بفيّة حلم طاهر من نبيدي
وزوّج حنين العاصفه سرساب
دمّو أمل والروح تنهيده

صرلي عمر ع مخدّتك سافر
وتغلي ورا الايّام قهوتنا
يتعب صباح الشعر ع غيابك
وترقص بعرس الغيم شهوتنا

صرلي عمر شرّد حلى موّال
حتّى م يحرق شمسها ع الشط
والعمر صرلو بنهدتي اجيال
مراعي شعور الرمل كل ما غط

صرلو عمر بثيابها علقان
متل العطر والليل غنّيه
لا الزنبق تدلل بهـ البستان
ولا الريح هديت روحها فيّي

صرلا عمر بالبال محفوره
ع حبال روحي نذور تتفرّع
شمس وبثلج الآخ محصوره
منها مزاريب الفجر تشقع

صرلو عمر يعزف على تجاعيد
زنبق بكفّ الريح ألحانو
وكلما بيشلعلو وتر شي عيد
يفتح بفجر جديد دكّانو

صرلي عمر سافر مع النغمات
واحرق حدود البرد
متل النظر وبرفقة الغيمات
رحلة عطر والورد

صرلا عمر تسكب بواحة ليل
شعر وحلا وسرار
آثار تزرع بالقلب عا ميل
بيقرب عمر آذار

صرلي عمر غرّب قضايا الريح
واحرم خوابي الروح آلامي
والشمس تتوحّم على تصريح
دمعة حروفو موت وقيامه

صرلي عمر لبعيد
ودّي حبر حتّى النبع يفرح
الأمل ربّو نبيد
ودين الخليقه طقطقه ومسرح

صرلا عمر تسكر
ورغم التعب قبقابها اللمّاع
ما حلّل المنكر
لكن حرمنا نخلّد الاطباع

من طرف **عمار البراضعي** 11/5/2009, 2:16 am

صرلي عمر دفّي الشمس بكتاب
بفيّة حلم طاهر من نبيدي
وزوّج حنين العاصفه سرساب
دمّو أمل والروح تنهيده

وشوفوا هون الله واكبر
صرلي عمر غرّب قضايا الريح
واحرم خوابي الروح آلامي
والشمس تتوحّم على تصريح
دمعة حروفو موت وقيامه

ياسلام

ياعيني ع الشعر جودددددد
الله ياعلي هالقصيدة رائعة
يعطيك العافية بهنيك ياعلي
وتحياتي مجددا

من طرف علي عامر 11/6/2009, 5:46 am

يا هلا خيي بو اسامه

عطّرت القصيده بمرورك الاروع

بكل الحب والتقدير

من طرف علي عامر 11/19/2009, 12:55 am

صرلي عمر سرّب
بتقول والغيمه بسماها تجن
مرّه قصدت جرّب
اصمد ع حق الليل صار يعن

صرلي عمر الفي على تابوت
فيه الدّهر انغام عم بينوح
شكّيت بالغبره على الياقوت
فاق الحلم يضحك ع طقم الروح

صرلي عمر اطوي وراق الحل
ونادي ل ع بالو يدوخ ويغنّي
باعو ضمير الحلم بالتفّاح
والزيت زحّط تاج هـ الجنّه

من طرف علي عامر 11/24/2009, 11:06 pm

صرلو عمر وشوي

بارك وسرّ الروح

عم بيلوح

نارو أمل والمي

ريشه

وسفر جوّا حبر مفضوح

من طرف علي عامر 1/13/2010, 2:58 am

صرلو عمر يبرم عا حمايه

بقلبا للندي تبهرج حمايه

ع كتر الشك في بحر الضماير

احتجّ ابليس وجّ الفجر حاير

الكنّه مش من عروقي وحمايي

من طرف علي عامر 1/22/2010, 9:02 pm

صرلي عمر فتّش على كلمه
للحب م بتقرب ندي النغمه

وما عرفت بعمرا طعم رحمه
ولا بتعشق شقاوه ولا حكمه

صرلي عمر دايخ

ويا ريت فيي ضل ع الحاله
احسن م يوعا الكفر بخيالي

وينام حبر الحظ

صرلي عمر
شمتان بهـ الجمر

صرلي عمر
ذايب انا وهـ الليل
كرمال شمعه
بتسهر مع النحله
ورا الوحله
لأجل دمعه

من طرف علي عامر 12/3/2010, 10:20 pm

صرلو عمر صاحي
رغم الوكر يلّلي بأخلاقو حويه
محيّر غيوم الأرض وتراب السما
بدوخة غنانيه

من طرف علي عامر 12/25/2010, 1:49 am

صرلك عمر متهدّيي بخيطي
والضيم تنسي بنور اشعاري
ولمّا هدم جرم الحلم حيطي
عفتي السكن في بيت اسراري

صرلي عمر

صرلي عمر

رد: صرلي عمر

رد: صرلي عمر

رد: صرلي عمر

رد: صرلي عمر

رد: صرلي عمر

رد: صرلي عمر

رد: صرلي عمر

رد: صرلي عمر