نكهة العيد

ألك يا عيد نكهة بس عنّا***ما عنّا عيد أحلا من وطنّا

أنا من جهّتي بالشغل باقي***وعشر ساعات قلبي مش مهنّى

انا مشتاق ليكون يا رفاقي***ولولا ما سألتوا نهار عنّا

لأنو العمر سكرة بالتلاقي***وقصيدة طالع من القلب فيها

بيوت من العتابا والمعنّى


يا عيد نحنا بعاد ما بنحس فيك

ولا بنحسب حسابك بدفتر هالدني

انتي وغذاب سنينا عامل شريك

وبنقول كل نهار مرقت ها السنة




بحر الزجل

يــــــــا بو أسامة العيد ها الأيام***شغل وتعب وقلوب ملياني

والناس عم بتعيش بالأحلام***من ها الوضع عن جد تعباني

وتا نسيت عيّد شخصك المقدام***كانت الأم شوي مرضاني

وعندي بصراحة الزاكرة بتنلام***وصارت مع الأيام تلفاني

مشتاق ضم الورد يا رسّام***وأهشل مع بساتين تحناني

بركي بروح على الوطن ها العام***تا ألتقي بكل أخواني

ةفيّق ربيع العمر بركي نام***واخد ولادي عا الوطن تا صير

بين الأحبة شخص لبناني

يا شاعر قد ما تقسا بقصيدك***ما فيك بكره مرة تعيش عيدك

انا مشتاق للملقى الثنائي***تا أكرع خمر من جرة نبيدك

انا حربي من سلاح البدائي***ونقطة دم عم تجري بوريدك

وبس النت يا عمّار دائي***ومتل بريد خيي بالمحبة

يشهد ربّنا متلو بريدك


بحر الزجل

يا عمّار مشتقلك زيادي***وعا ضهر الأحمر محضر جوادي

وتا شوفك حضّر نبيد المعتّق***متل ما تعتّق بشوقك فؤادي

ما بعرف ليش فينا الدهر فرّق***وقطعلي تكت حددلي بعادي

وما خلّى فرحة الأصحاب تخلق***بموطن كان عم يشحد سيادي

شلحني الحظ بالغربة تا أعرق***وشحدت الملح تا طعمي ولادي

وانا بالشغل عم اتعب لهلّق***المكتب فرشتي الكرسي وسادي

وصرت بغربتي عايش معلّق***وضايع بين تلّي وبين وادي

وخيالي ضل بالكلمة محلّق***وقطع وعد وتحدي يا جماعة

أنّو يطير ليكي يا بلادي