حرف مطلوب

حرّوف ع دروب الكذب ضعفك سلك = رح إضربك تا تستوي يا أعجري

وحتّى بغيابي تذوق قهقرة الهلك = ببعت الك دعسات قسوة أبجري

الدينه وفيتا وشلت من قلبك هموم = وعم لعّب الأزمان بخيوط الهدى

وجايي لعند لـ فارك رقاب النجوم = تا يعملك قمح الفريك على الهدا

قمحك بوهمك خبز سهمك ع الخلود = بعد الغياب بعتم الضباب وشمعتك

وما في شجاعه من المياعه والصمود = بشعري الغني ضوّا الدّني عا دمعتك

صعلوك يا حرف الشعر بعدك زغير = وداير تشعّل فتن تلعب ع الحبال

وإعرف غنى هـ اللص في عندو ضمير = مش متل فضلك يا جرم لصّ الشمال

من قبل ما يقبل بيبسة مرجتو = غيمي كرم عطف الحنايا المُنزله

يا هارب بروب الفجور ورهجتو = لسانك تحت أشباح شعري الأخطلي

حرف البلاده كتير تقلت لهجتو = وقاعد يقلّد كنفشة خمر البلي

صانع بيدّ الغدر لمعة بهجتو = نامي بربع عقل ومناقب ماحله

من هيك مع كبيس مخلل عجّتو = رح تستوي كرمال عينو مفلفله

صابيع موهبتي الغنيّه حرجتو = بشلت الدينين انساب طيف المرحله

وخلصت الجوله وبان فاضي حجّتو = رغم الخيانه ورغم جرم المشكله

ينعاد عليك بالخير

خلّيك رايق يا حرف تا ما نسّلك = واحرق خيوطك يا معقّد بالهلك

سيفك لعب كرتون طفّى مشعلك = وقهرك ع فجر مقاوماتي شعّلك

يا صفر ع شمالي م فيي احملك = دمّك ثقيل كثير للجهل امتلك

رح تنكسر ايدك وعا قرص الفلك = بقوة شظايا بطيّرك من معقلك

وت نكون أصرح عا غباوة منهلك = بنار المعاني بشحترك وبسلسلك

جهلت نبوغي الناس كترة ما إلك = يا هـ الحرامي جور ع الحقّ بحلك

ودمّي مبللني ع ممروض انعلك = بفكّ التحدّي حرف صوره ما ملك

من أوّل المشروع تصفيفو سلك = درب الحماقه الخدم م بيحرج ملك

يا حرف يا معتوه شفت معدّلك = بدمّ الفقر متسلّح وشو بعدّلك

بعدلّك التشليخ من نمر الزجل = وبمحي وجودك من بعد ما بهدلك

صاير زماني سفر بجروح وضباب = وعمري رفوف الدّهر ع جنوني كتاب

ودمع القلب مشلوح وبغربة وطن = من هيك عم بتأخّر بنقل الجواب

* * *

حرف للي متلو قلال بقوه مشرّدين = عم ينزعو عفّة الشعرا الصالحين

أطبش ، وعي ما قبل يقنا بنص حين = ورح يركع يصلّي لـ أشعاري بدين

ومن كتر ما منزوع شعرو هـ الفطين = هربو الحروف من الدّني وعافو السنين

سنانو ع كتر العلك صارو واقعين = وقلبو بجوّ الحلك متعتّر حزين

لسانو بتمّ الضفدعه معمّد جنين = ومخّو كتير رخيص من بسطه بجنين

ونمرود كافر مع شلال معفّنين = محسوب ومفكّر جنابو شو رصين

وبعدو م تاب بجولة المستنفرين = ما عدت إرحم حضرتو شبعنا حنين

بمنجل قصيدي والمعنّى الخالدين = رح إحصدو متل السبال الناضجين

أفضل م يبقى بالسقوط البربري = يعدي فلاسفة العباره الشامخين

ما زال بعدك بالعمى عايش وحيد = وشعرك قدر ما تنفش بريشك زهيد

شو ضل حيله بيد شاعر خلق سيد = بمجال حرف مشحّر بيأس العبيد

لا في فهم عندو ولا في لو رصيد = لا بالمعنّى الإرتجالي ولا بقصيد

ردّات شعري عدل من دفق النهيد = بإحساس من طهر القلب بيدر حصيد

وبآخر الجوله ختامي رح يزيد = شعرك عفو من نغم يعطف ع الشريد

ومش عن فزع أو تفتكر هارب بعيد = معكن أنا بضلّ بصمودي ع الأكيد

لكن في شغله داوختني وشي جديد = صاير بقلبي لـ نبض إخلاصو نشيد

نخزة جرح من منطق الرحمه الشديد = وضغط البلايا عا فرش حلمي المجيد

ومن بعد شيطنة المعاني والكلام = بهدي سلامي ل حرف شاعرنا المُجيد