تشكيل الحكومة شروقي

من طرف **عمار البراضعي** 7/22/2011, 12:26 am

تشكيل الحكومة

ياشعب نالوا الثقة إلهون خمس ســاعات
وإسم الحكومة انعلن ع دروب ملغـومي
صلّي وإدعي معي يتوفقوا وهيـــــــهات
تلاقوا شي مخرج خير للموطن عمومي

نحنا املنا امتلى خيبات بالنكســـــــــات
وماضل عنا أمل والناس مهمومــــــــة
شبعنا نعارض فئة ونساند مــــــــــوالاة
وللناس هاللي اتضح فولة ومقســــومة

نزلنا تانرفع لوا ونوحّد الريــــــــــــات
كنا افتركنا سوا هالناس معزومـــــــــة
قلنا وطنى رجع وتعبّت الساحــــــــات
تاري تجارة الحكي بحكام مزعومـــــة

وافلام فيها خدع وضحت على الشاشات
بحجةّ قتال وحرب تمثيل بخصومـــــــة
وطائف ودوحة انعمل ومبايعةّ دمــــات
وشنطات فاضي انحمل وتعود مختـومة

ياشعب اوعى بقى ولاتساند حكومــــات
جاي بخطة رسم ع درب مرسومـــــــة
ونحنا افتكرنا العكس احرار بالنيــــات
وكل ميل حزب وفئة من ميل مدعومة

ماضل منا حدا في جيبتو ليـــــــــرات
والناس عاشت فقر مدقع ومحرومـــــة
نشالله الحكومة اليوم بتزيد المعاشـــات
وبتحس معنا وسوا منشعر بالحكومــــة

* * * * * * * * * * * *