شروقي - صديق الزجل شكيب جابر

من طرف **عمار البراضعي** 10/20/2011, 12:10 am

الى صديق الزجل الشاعر أبو وجدي شكيب جابر
الملقب عندليب الريف
==
ياشعر فيي خلقت بالموهبة معجـــــــــــــون
وكانت عظامي بعد باللحم معجــــــــــــــونة
ولم جيت ع هالدني غني الزجل مـــــوزون
سبقت اللي قبلي حِكوا أشعـــــــار مـوزوني

واليوم عظمي قسي وبداخلي مسجـــــــــون
مارد قوافي وعي من قمقم ظنـــــــــــــوني
شبيك قلي . وقلت لبيك هد سجـــــــــــــون
بخـّلي سبيلك أنا من رواح مسجـــــــــــونة

بحلق بسرعة وغضب فنجر بوجّـــي عيون
وقلي بأمرك أنا يامــــــــــــــــــارد عيوني
فز ولبسني درع للمرتجــــــــــــــل مجنون
أســـــــــــــرع قذيفي سبق بحروب مجنونة

وصارت بنات الشعر تنذر حفى بفنــــــــون
منشان تشبع زجل من معجن فنـــــــــــوني
ومزراب فكري انغفي بينشفوا لعيــــــــــون
وبيطق عنق الوحي عطشـــــــــان لعيونـي

وفي رفيق صوبي قصد يسمع شعر متقـون
بيصغي تايسمع فكر ماانصاغ من دونــــي
صاحب وصادق بقي جوات حرف سكــون
وأوضة بقلبي إلو وبيــــــــــــــوت للمونـة

وهالعندليب الوفي منو أنا ممنـــــــــــــون
شاعر كبير ونسر صقـّر مش سنــــــــونـة
إسمو شكيب انكتب للشعريوفي ديــــــــون
وجديد بكتب إلو ومــــــــاسدد ديونـــــــي

بيبقى رفيق الزجل شلح الأرز بغصــــون
كرزو بشعري حملت ع الراس وغصوني
وكلما بيان انخطب بوالوجد رفقة يصــون
وثاني أمير انعلن بيهز مسكــــــــــــونـي

* * * * * * * * * * * * *

من طرف **شكيب جابر** 10/20/2011, 9:59 pm

بيجوز ياعمار وحياتك انت بيجوز
تكتب لنا شروقي وتمدحنا بالغناني
نحنا كبرنا وختيرنا وفقشنا الكوز
وتفرفطوا حبوبو وصاروا حبوب تلفاني

كنا بزمان الصبا ياما نفك رموز
وكنا نحل اللغز من وقت للثاني
واليوم مافي حدا غيرك قبالي يفوز
لولا صهل ابجر الشعر بقلب ميداني

يا أبو أسامة بعد شعرك شكيب يعوز
وفي موقعك عم يفتخر كل شخص لبناني
وكل شي لقينا بشعرك مرتجل مرجوز
عرفنا بمعاني الشعر قديش بتعاني

كل بيت عندك عقد لولو وذهب مدروز
وبلّش حصانك بالشعر يطغي على حصاني
ياريت بقدر أنا قصايد العندك روز
وإسكب عليها حلا عطري البل قناني

عمار حضّر تعا المدفع ويلا دروز
كل شخص يتحدى الحرف يما تحداني
ونصبح أنا وياك أول شاعرين دروز
يثبتوا شلوش الزجل متل السندياني

============
الشاعر شكيب جابر

من طرف **عمار البراضعي** 11/19/2011, 3:49 pm

يللي بعاليه اكتمل لسميّك التمثــــــال
والشيخ خانو انعمل عرفان لجميــــلو
لبنان لولا انشمل أمثالك من رجــــال
كان السلام اكتمل والحرب تلغيـــــلو

للدين عندك أمل للحب رأس المــــال
رمز الصداقة انحمل نيشـــــان تهديلو
اسمك شكيب الدمل سر بمدى الأجيال
وبالجهر ضد العمل أسرار تحكيــــلو

وبالشعر مهما المدى عاكل منبر طال
بتضل تحكي بهدى أيــــــــــآت ترتيلو
ولاتخاف مكر العدا عهدتك أنا رجّال
لبّي بسرعة الندا من أرضـنا نشيــلو

وعمار إنت عرفت كلما ع منبر جال
مابظن متلو شفت شاعر سبق جيـــلو
جدد وعبـّد زفت طرقات بين جبــال
الأنظار شعرو لفت والشعر من قيـلو

* * * * * * * * * * * *

شروقي - صديق الزجل شكيب جابر

شروقي - صديق الزجل شكيب جابر

رد: شروقي - صديق الزجل شكيب جابر

رد: شروقي - صديق الزجل شكيب جابر