خليل روكز

من طرف salomon 6/18/2007, 10:35 am

بتمنى من يحب هذا النوع من الشعر ان يضيف المزيد ... خليل روكز
شعرك الكان يلفّني وينام .... لفّة عيون الطفل بالأحلام
ومنو لحالو كان يتخصّل ...... خصلة خديدية وخصلة حرام

واغفى , وشعرك يسهر عليي ...... وبغفوتي يسبل عَ عينيي
وأوعى ولفّو بين ايديي ....... متل الملاك بتخت ريش نعام

ولمّا كنت اصحى من الوهلي ..... وجدّلك بالعتم عَ مهلي
وجدايلك تضحك وتندهلي ....... وتقول خلصّني من الإعدام

بيظهر عرف شعرك رح تقصّيه ..... وكان يندهلي تا أشفع فيه
وما في الو غيري , أنا مربيه ...... وبيني وبينو فرّقو الأيام

وأنتي ضميرك بالعمى موصوف .... ومتلك الحلاق ما بيشوف
وصار شعرك متل شي خاروف ...... عم يحتمي من الديب باللحّام ...

وانت يا حلاّق بدعي عليك .... نشالله بينقل هم قلبي ليك
أصعب ما تعمى وييبسوا ايديك ...ويصير عمرك مدرسة أوهام

كيف لك قلب تقطع أمل عمري؟ ..... وانتي يا أم الأملس الخمري
فطمتي طفل رابي على غمري .... تا تعيشيه عَ سفرة الأيتام

كيف المقص الفوق شعرك مرّ ؟ ...طاوع ابن أدم عَ فعل الشر
ويا هلترى مطرح ما شعرك هرّ ؟ .... ما انفلشت حكاية من الالآم

هيدي حكاية من دموعي البكر ... البقيو من عيوني بشعرك ذكر
هودي نقط من شمع قدس الفكر .... هودي ألف قاموس استفهام ...

بعدو معي منديلك الأصلي ... بكرّمو , وبعاملو بأصلي
وتا يضل يبكيلك , ويرقصلي ... من شعرك البيحّن عَ وصلي

انكان عندك بعد شي خصلي ....روحي ابعتيها ذكر للمنديل
حتى يشبّع جوعتو وينام ..

<BLOCKQUOTE id=29b79406>
</BLOCKQUOTE></BLOCKQUOTE>

من طرف salomon 6/18/2007, 10:42 am

حبة عنب

بنت شقرا عِلقت بدين العبيد ....ومع امّها ما كمّلت مشوارها

وصاروا عليها شيل ايد وحط ايد ... تا خبصّوها, وجارها ما جارها

ونزلّوها في براميل الحديد ... يا ويلهم مش عارفين سرارها

ومن بعد ميّة الف غلوة عالوقيد .... دمها بيعود ياخذ تارها

من طرف salomon 6/18/2007, 10:48 am

أروع ماكتب وهي قصيدة المقبرة:

ما زال رح تبقى عاحبّي مكبّره
وما زال ما في عفو عند المقدره
انشالله تموتي وما حدا لدفنك يجي
وقيمكْ لوحدي ووصّلك عالمقبره

وصدفِه ان إجا إنسان تا يحملْ معي
بقلّلو تْركْني وبالوصيِّه بدّعي
من ميل* تحت النعش بخفي مدمعي
ومن ميل وحدي بكون حامل جوهره

وكل فشخه** كنتْ بقعد بستريح
بْزيحْ الغطا وبِتأمّل بوجهك منيح
وبسقي شفافك من عطش قلبي الجريح
وبطلب من عيونك شفاعه ومغفره

وكل ما ارتحت ورجعت قيمك من جديد
بصير صلّي تالقبِرْ يبقى بعيد
منشان إشبع والنعش يشبع نهيد
شبعِةْ أبد حامل بنعش الآخره

وغنّي فراقيات وسنيني الكتار
يدوبو عاداير نعشك الأبيض غبار
ونوقع أنا والنعش آخِرةْ النهار
وقعِةْ إبن مريم عا درب الناصره

وبرجع بقيم النعش عن أرض الهموم
وبشحد شوية عمر من عمر الغيوم
وبعود إمشي هون أوقع هون قوم
وضيّع نهاري بالمشي وعند الغياب
نوصل أنا وإنتي سوا عالمقبره

<BLOCKQUOTE id=a5bf08b6>

خليل روكز

</BLOCKQUOTE>

من طرف salomon 6/18/2007, 10:52 am

بصرتك بنومي قال عم توعي
من سريرك المشدود بضلوعي
وعمتزحطي رح توقعي عنو
غمرتك بلهفي تا خدر كوعي

وخاف كوعي تفلتي منو
استنجد بقوة مارد ولوعي
ووعيت ومنامي فشل ظنو
مش غامرك غامر وهم جوعي

من الجوع صاروا عواطفي يغنو
ما اطولك يا ليل عا رجوعي
ناطر صباحي يبتسم سنو
وشقّف بهالبقوة ل تركها الليل
وابكي وخيالك يشرب دموعي

وضليت اسهر مع ضنا حالي
واشرد تا شيل الحلم من بالي
وطل الصباح وصار بدو يغيب
وضل طيفك واقف قبالي

مـــــــــــا في أحلا من التعذيب
تمنيت حالي كون بخيالي
تا غلّ بخيالك ومنو جيب
زوّادة جنوني وآمالي

لا ما بدي من جنوني طيب
جنون الهوى خلقان كرمالي
خايف على طفل الجنون يشيب
ومع مين بدي اسهر ليالي

يا ريتني مخبّي ب جنوني ديب
ويفلت ويكمش طيفك الغالي
حتى بعيوني قطبوا تقطيب
من ميل كنت بلف خيط الشوق
ومن ميل كان ارتاح مغزالي

من طرف salomon 6/19/2007, 9:57 am

يــــا ريـــــت

ياريت عندي وآآآآآآآآخ لوفيي .......... عا قـد حبـي جبلـك هديـة

كنت بهديكـي شـذا الـوردات ........وأسـرار أحـلام الطفولـيـة

وكنت بتعمشق على النجمـات...........بسحّب شلـل خيطـان فضيـة

وبكلف ملايـك ... وحوريـات...............تحَيّكِْلْـك بـلـوزة ألوهـيـة

***

وبالبحر .. كنت بغافل السمكات...........وبغطس متل فكـر الحراميـة

وبقطف زبد من رغوة الموجات...........ومن جدايـل شمـس مرخيـة

بكمش وهج وبحولو بوسـات.......بلـون أشواقـي المـورديـة

ومن هون ببعتها من النسمات.....الهونيك لعيونـك خصوصيـة

***

والطفل كنت بقشطو البسمـات.............وبغرف من عيونو صفـا نيـة

وعرس الربيع بشلّحو الغنجات...........وكلشي معو لهفـات عطريـة

وبكلخ من جفون السحر دمعات............كلـهـا غـيـرة وحـنـيـة

وبلفهـا بعيـون خمـريـات..........وبروح حافـي بسلّمـك هيـي

***

ومن كل طير بنتف الريشـات.............وبفلش طريقك ريـش حريـة

وعا المروج بسابق النحـلات............بجبلك ضميـر زهـور بكريـة

وبطير مـع أحـلام وخيـالات..........عا بلاد مـدري ويـن مبنيـة

وبجدلّك من سوالف الغيمـات..........مرجوحتـك ع كتـاف جنيـة

***

وبغزلك من شراشف الهمسات........وحرام مـن قلـب النعوميـة

وجّوْدَلْة من السحر ومخـدات..........مـن شعـر آلهـة الفينيقيـة

***

وبرش عا عيونك هنا الغفوات........المحروم منهـا حـظ عينيـي

وخلي الحلم يحكيلك حكايـات...........عن حالـك الحالـك غراميـي

***

هيهات لو عندي فعل هيهـات,,,,,,,عا قد مـا عنـدي أنـا نيـة

بحولـك إنتـي أنـا بالـذات...............وبلبّسـك روحـي الطبيعـيـة

لكـن إذا فشلـو التمنـيّـات........وعمـري استسلـم للعبوديـة

بترك إلك مني تـلات كلمـات.,,,,,,,,,,محبتي ... والآخ ... والنهدات...

من القلب هل بيحبِّكْ هدية

خليل روكز