منتديات الزجل اللبناني الشاعر: عمار البراضعي

أهلا وسهلا بزائرنا الكريم
عليك بالتسجيل لكي ترى كافة المواضيع المخفية
=====================
الزائر رحبنـا برسمــــو = وع التسجيل دعينا يفوت
وغير اللي مسجّل إسمو = عنو منخفي يقـــرا بيوت
=====================

منتديات الزجل اللبناني الشاعر: عمار البراضعي
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

مقتطفات للشاعرة أود يت خوري

اذهب الى الأسفل

مقتطفات للشاعرة أود يت خوري Empty مقتطفات للشاعرة أود يت خوري

مُساهمة من طرف 7arf في 6/19/2007, 12:12 pm

بعد غيبه طويله
..............
يا منطقتي بحضوري وبغيابي
بربيع العمر رافقتي عذابي
كنت بأرضك بداية صبيه
وجدّد اليوم تاجدّد شبابي
كنتي لو هنايي غلّ فيي
توعّيني ع نسمات الروابي
يا أنصار الزجل إلكن تحيه
عنها بيعجز يفسّر خطابي
حملت القلب عاكفّي هديه
وقصيد معتّق بعمر الخوابي
يا أحلا قمار طلّوا بهالعشيّه
النظر منكن ما بيشبع صبابي
أنا من هون من ضيعه وفيه
بجوارك رمش عيني كان رابي
أنا من ورودك من المزهريه
بيني وبينك إلفه وقرابي
انتو لجرح قلبي صيدليه
وأحلا بلسم بقسم الطبابي
أنا من نص قلب العزونيه
وإجو الحلوين لكن عاحسابي
أنا من شرابك الغالي عليي
وجايي من بعد غيبي طويلي
عأرضك إركع وبوّس ترابي
* * *
بعدما الحرب دشّرنا وتوارى
رجعنا يا حبايب فرد حاره
يا محمود يا أنور يا حنا
لكن مني تحية وهالعباره
الحرب الكان عاشفار الأسنة
زرعنا مطرحو ورود الطهاره
ومهما صار بالحرب بوطنّا
ومهما كبرت علينا الخساره
بقلّك يا جبلنا الإنت منّا
الجبل لو صار كومه من الحجاره
تهنّى يا جبل فينا تهنى
ما بيعيشو النصارى بلا دروزك
ولا دروزك بيعيشو بلا نصارى
* * *
ومنشان طمّنكن يا إخواني
يا عايشين بقلب وجداني
من وين خلقاني أنا معروف
بنت الجبل والدم سلفاني
بين المسيحيه وبني معروف
ما بفرّق دياني عن دياني
وشكرت ربي اللي عمل معروف
عاسلّم طلوعي اللي علاني
وبطلعتي شو تأهلت بضيوف
هون أهلي وهون خلّاني
وكلما جلت عني المحبه بشوف
حدّ القمر زهّر قمر تاني
حملت الهويه شاعره من الشوف
جسّد شعوري بقالب غناني
مونتي من الأبجدية حروف
جمعتها بفية سندياني
شعار منبر في رفوف رفوف
ووحدي عروس الشعر خلقاني
دفوف المنابر أكلي من كفوف
ديي وبهالإيدين علقاني
فكرة عذابي تطعّمت بالأوف
تا صارت من الآخ شبعاني
ومنكن حدا ما إقشعو مكسوف
ولا شوف فيكن نفس حزناني
ومن قلب صوب العاطفي ملهوف
بصلّي لجبلنا ترجع الإلفه
ومتلي بيطلب كل لبناني
************
قالوا
....
قالوا الأطبا بآلة التصوير
عم يعرفوا الإنسان شو تغدّى
وقالوا المراكب بالفلك بتطير
وبتغطّ مهما الطقس يتردّى
وقالوا البواخر عالتلج بتسير
بالتلفزة الإنسان ما تهدّا
ومعقول حيه تخلّف عصافير
تخبّر قصص وتقول شو بدّا
ومعقول إم تبيع طفل زغير
وتقضي العمر ما تقشعو حدّا
وقال يمكن يخلص التزوير
لمّا رئيس بلادنا يشدّا
وقال يمكن يمنعو التزمير
وقت اللي بيشوفوا الدهب صدّا
وقال يمكن يخلص التعتير
لما الطفل عالشيخ يتعدّا
لكن ما قالوا بالزجل بتصير
تطلع مرا من عيلة الخوري
وعالمنبر الشعّار تتحدّى
****
أكبر فارس
........
من رفة جفن الدبلان ... بهـــــــزّ الكون وسكّانو
وأكبر فارس بالميدان ... بوقّع عن ضهر حصانو
* * *
قول القرّادي حبّيت ...وعانجوم الزرقا حلّيت
وبأعلا مركز صفّيت ...وعالمنبر كلما غنّيت
برجّح كفة ميزانو
* * *
كل شي مرّ سنين كتار... فوق المنبر وخشابو
جابو عالدنيي شعّـــــار ...لكن متلي ما جابو
**********
حوا وآدم
.....
هالدنيي من زمان زمان بحوا وآدم عمراني
بالأول نحنا النسوان وآدم بالصف التاني
* * *
يا محمود علاّ الإعلان اسمك بيّن وعلمنا
عالمنبر نحنا النسوان ما في آدم يظلمنا
بتحدّى تلات شبّان بعركي حرزاني فهمنا
لكن إنت المش حرزان تطلع زرّ بفستاني
***************
7arf
7arf
admin

عدد الرسائل : 1125
العمر : 53
تاريخ التسجيل : 01/11/2006

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى