قريتي2

من طرف **عمار البراضعي** 5/18/2013, 12:52 am

قريتي 2
====
فيكي ياضهر الأحمر التاريــــــــخ
لوحةّ خلود مطــــــــرّز برســــمك
المجد فيكي طفل مابيشـــــــــيـــخ
وظهر الشفق محمّر من إسمـــــك

* * *
مغروم فيكي من زمن مغــــــروم
وماكان عشقي نهــــــار يتــــــردد
ان كان التقمص صح موت وقـوم
المهم فيكي عـــــــــود إتجــــــدد

* * *
بحبك بحب دروبك الحلـــــــــوين
وساحاتك وبعــبــــــــــد زواريبك
من سنين وعـــوا الذاكـرة تخمين
ع مسبحة بتحمـــــل شــــراريبك

* * *
ومرة مخابي اللعب بالســــــاحة
وخرج الكلل توما إلو بيــــــادر
نقصدو من بعد لسبــــــــــــاحة
وننصب بقرب المحفرة شــــادر

* * *
وهون نوقع هون نقشر إيــــــــد
هونيك نبكي ونضحك ونزحــــل
وماضل غير ذكرى بخيال بعيـد
لاتخرطشوها كلنا منـــــــرحــل

* * * * * * *
بمزح وبرجع بزعل وبحـــــــتد
بس الحكي كلو هزل ميــــــعة
رح إعترفلك حان تـرم الـــجد
مابحب قدك بالدني ضيــــعـــة
============