يمكن إخسر

وحب يخيب بحربي ظنونو

ياأهلا بنده وبحكي بشماتي

النسر بالحرب مابيرحم سنونو

من زغري خلقت فهمان ذاتي

واذا ضدي ثماني رح يكونوا

بحسب فردهم شجرة بغاباتي

وجذع بيعود وبيخسر غصونو

وكثر ماصرت عامل واجباتي

وبحر الموهبة مرقص فنونو

بحياتي ماخسرت بلكي بمماتي

بخسر مع أهالي القبر لما

هيكل عظم صفي بلا عيونو

****

وبعد ماصار كل النصر إلنا

الدني وأقطارها بالكون جلنا

لقيت شاعر بالنظر ماانحد

نجمو انطفى واللغز حللنا

كل عمر بينتهي ع القد

بدور الدني مهما تأملنا

وع ديرةّ الأموات رحنا الحد

وعنا شعر كتبوا أناملنا

شفنا الكهل اللي بعمر الجد

وشفنا الطفل والشب تا قلنا

مهما أكلنا او طعمنا رد

من شعر أو من قوت جايي نهار

وبدو تراب الأرض يآكلنا

****

ومافي غيم ع روح درويشة

ومافي حدا براسو طلع ريشة

بالموت ساوى الرب كل الناس

صحاب الفضايل متل الوحيشة

ومن بعد ماحسيت هالإحساس

اخذت الدني بضحكة وتطنيشة

وقعدت غني وكاس خلف الكاس

إشرب وإنطر دور هالفيشة

بعض المذاهب جنزوا بقداس

ومذهب على القبلة التفتيشة

ومذهب الرحمة بيعملوا مقياس

بيتقاتلوا عليها ونسيوا الكل

مش رح تزيد نهار بالعيشة

*******

وغلطو الفكروا منهم الرحمة
وأساس الموت للأنسان رحمة
شو هم المتقي ربو بحرارة
إذا بعيونهم بيكون فحمة

طباع الناس معروفة جكارة
افترقت ما التقت ع فرد لُحمة
وأغبلها عوايد مستعارة
مع الأفراد والمجموع زحمة

واذا الأنسان مع نفسو تبارى
بيربي الشاة تايآكل اللحمة
وعليها الذيب لولا شن غارة
بيقتلها بذيب النفس حتى
مايتركلو ع جلد الشاة شحمة

******