وين البطل

من طرف salomon 9/26/2007, 5:27 am

وين البطل يا حرف قللي شو حصل.....المقطوش بالسكين صعبي ينوصل
طل البطل عا منتدانا واختفى.......قولك بيرجع يطلع بموسم بصل

من طرف **7arf** 9/26/2007, 9:43 pm

قالوا ياعنــتر مين اللي عنترك ... تعنـتــرت قال وماحدا بيردني
لكن حرف بالشعر فاتح معترك ... يصد العناتر كل ما الدني دني

------

من طرف salomon 9/26/2007, 10:06 pm

يا حرف بعرف بالشعر أنك ملك.....وما بظن أنو في بطل بيزعلك

أنت شفيق الشعر والقلب الحنون.....وهوي بطل عن جد لما نازلك

من طرف **7arf** 9/27/2007, 2:13 am

إشهد ياأعدل حـاكم بأجمل صـــــور ... شوما عملنا مش عم منرضي البشـــر

طل البطل ياصاحبي بسرعة وهجر ... وتاخبرك شو اللي حصل بالمختــصر

مـاكان نحنا قصدنا نكشف حــــــــدا ... وع محك حرف الجوهري بانوا الدرر

من طرف salomon 9/28/2007, 6:12 am

راح البطل ولوين ما بظنو زهب.....البيفوت عا جهنم الحمرا ما ارتهب

ما زال شاعر كان بيعصصر غهب.....وأجمل قوافي من حضن الله نهب
مش هم أسمو بالحقيقة يا .زميل.....لمهم أنو شاعر وشعرو ذهب

من طرف **7arf** 9/28/2007, 9:58 pm

ان تاه البطل مش ذنب تفكيري الجليل ... ناقد اجــــا عالمنتدى عابر سبيل

بمعشر رجال الجود ما خص البخــيل ... وعند احتكاك الدر بيبان الأصيل

بس البطل مغطوط غطــــــة بالذهب ... انكنو أصــيل بيرجع بعقل الثقيل

من طرف salomon 9/28/2007, 10:06 pm

يمكن دخل عا المنتدا والحمسوه......فات احترق بالفرن ما انتبهو نسوه.

.وما في دهب بعيار سلو مع حرف.....لولا بجرن من الدهب بيغطسوه

من طرف **7arf** 9/28/2007, 10:34 pm

بجرن الذهب ما غطسو غيري انا ... تايصير قد الحمل في في ساحة هنا

وتايكمّل الجولة ويهدّي جمعتــيـن ... وردو لأصلو و لحقو ديـــــار الفنا

من طرف salomon 9/28/2007, 10:52 pm

كان البطل مفروض يعرف معدنك........من قبل ما يتفلسف ويفتح حنك..

...ومهما التنك يتغطس بجرن الدهب ........ولو صار لونو مدهب بيبقا تنك

من طرف **7arf** 9/29/2007, 2:57 am

مزبوط مش عارف المعدن ونسطل ... لما إجاني بـّ سم أفعى عــاقصة

عالنار حرقصتو تا حـِكّـــــو للبطل ... هج وهرب مافيه يحمل حرقصة

من طرف salomon 9/29/2007, 5:15 am

يا حرف يا عكروت ببيع الكروت...أنت بطل وتركتني بها الضرب فوت

حرقصت شاعر قال عن حالو بطل......الشاطر الشاطر... صح ....عمرو ما يموت

من طرف **7arf** 9/29/2007, 9:54 pm

ع كروت لو سجّـلت إسمك ياشريك ... إعِلا مُسمى الكل صـــــار بيقشعو

وشاطر بتقشع متل ماعطيتو عطيك ... مـابيهرب وكرت النعي آخذ مـعـو

من طرف salomon 9/30/2007, 5:22 am

فات البطل صاروا القوافي يزقفوا......وما بتعرف الرجال ألا بموقفو

في ناس طلبو المجد عللوا ورفرفوا.....وفي ناس مش أبطال حبوا يزحفوا
ان حبيت ها الموضوع قادر تحذفو.....يللي ضهر عيبي علينا نبلفو
خلليك عاقل هيك بيقول المثل......اللي بتعرفو أفضل من اللما بتعرفو

من طرف **7arf** 9/30/2007, 3:29 pm

الغارس طمع بالقلب عيب تدلعـــو ... انكنو بطل مش حق يهطل مدمعو

والحرف كلما الناس حولو تجمعو ... إلاّ كلام الحق مابيطلع معــــــــو

شــــان الكريم اعتاد شعري يرفعو ... اللي بينفعك مفروض تبقى تنفــعو

اما اللي لابس ثوب نكران الجميل ... بكفوف نكرانو على الوج صفـعو

من طرف salomon 9/30/2007, 10:37 pm

يا حرف ظرفك وصلك عا موقعك.....لا تكون قاسي الشر بدو يوقعك

ان بلشت أقسا عليك بترك مدمعك.....يفقع متل بركان حقدك وللعك
خللي البطل هربان بركي بيندعك......ولا تنزع الموضوع الله بينزعك
اللي بيصفعك بالكف عا ميل اليمين......درلو الشمال وسامحو ان غللط معك

من طرف **7arf** 10/1/2007, 12:01 am

الله يحمي الموقع المنــــــــو إلي ... ويدوم عزو بصاحبو القدرو عِـــلي
ومش بس هالموقع العالي المنزلي ... مطرح مابدي بروح بفتح مشـــكلة
سليمان لاتفتح عيون المرجـــــــلي ... قبالك اسد بالمعركة بيغـــــلي غلي
تاه البطل شرّف على حصانو اعتلي ... وشد الهريبة النار صارت شاعلي
لا انت خرج المرجلي أو شي ولي ... ولا حفظت بالأنجــــيل آية مسجلي
البيريد تايزحزح جبل من مطرحــو ... أضعف إيمـــانو يكون قد الخردلي

من طرف salomon 10/2/2007, 12:05 am

ان شفت البطل هربان ما تعدو قووي.....بيفوت عا جهنم الحمرا أن نوي

فككرت أنك يا بطل زندك قيوي.....تاري زنودك متل مقتي ملتوي
شو باك بعدك عا المنابر منزوي.....شو سلالة الشحرور أصلك من زوي
بتضل ماشي وبنطلونك منجوي......باهت الهيقة حارقينو بالكوي
بتسأل عن الأيمان قلبي مرتوي.....أيمان شق الصخر الله محتوي
ان ضليت تحكي الضهر بتشوف النجوم....بهررا عا راسك متل mangoمانكو مستوي

من طرف **7arf** 10/4/2007, 2:16 am

تاه البطل ؟ ياريت ضلو مطرحــو ... ولاطل بدلو ناس جهل تسلّـحـــــــو
لا لان زندي ولا التوى لاتفرحــــو ... مع شخص وبرات الخيارة بتجرحو
وين الأيمان القلت فيك مبحـــــبحو ... الهيئة قلبتا قاف ماتو اللي استـحــتو
بجلباب ع قياسك مشطشط رحرحو ... وجديد لبسك غيرو بسرعة اشلـحـو
وأكبر جبل مافيك عدت تزحزحـــو ... يامهددبمانكو لحرف بتمسـحـــــــو
بيغضب عليك بهالدني وبالآخــــرة ... بيكويك وحروفو الرقاب بيذبحــــــو

من طرف salomon 10/4/2007, 2:42 am

[size=18]
شو مفتكر أنو الجماعة أغبياء...ما في حروف بتجرح بيكفي غباء

من أول الموضوع متل الببغاء..راح البطل طل البطل متل الهواء
صفييت يا حرروف عا المنبر بلاء.....وصارت سنينك بالمحل موجة غلاء
سليمان شاعر مزوق وعندو وفاء...بسمة صباح الخير نعمة بالمساء
ان جربت أني أجرحك بعد العناء...بيخاف قلبي عليك تعلن أستياء
لكن أنا ما عاد فيي أحملك.....والكيي يا مغرور أخرة الدواء
[/size]

من طرف **7arf** 10/4/2007, 2:55 am

ههههههههههههههههه يلا عليهم

راح البطل طل البطل يمــــــا إختفا ... بس العُطل طل البُطل حامل جفا

اجرحني مازالك صرت تحكي بالقفا ... حرف السمؤال ضل شهرة بالوفـا

ولص الأرق قاصد على شعري ولفــــا ...عطيتو السهر وحرمت عينيي الغفا

تاتضل ع ميكروب شعرك ساهـــرة ... وإطفيك يامغرور تايقولوا انطفـى

من طرف salomon 10/4/2007, 3:15 am

أنت بتعرف صاحبك منو حقود...شاعر بطل جبار ما بدو شهود

مش متل شاعر لابس عوينات سود....وواقف يقلن وين رايح عا الحدود
رح أجرحك يا حرف ما بتقدر صمود....فصبات مص مفوخرة عندك زنود
ميكروب شعري عا جهنم وصلك ....ومش رح بيحضو فيك يا حرف القرود

من طرف **7arf** 10/4/2007, 3:33 am

ياشمعة سليمان ع شمسي ارقـدي ... الهيئة صوابك يا فـقـيــــرة فــــاقدي
مازال بالتهديد هـــــــاجم فرقــدي ... ان ما ذاب رح خلي عظامو مقددي
شو هم سبع الشعر لو معّا الجدي ... بزئرةّ ضياغم قال بالغاب اجـــمدي
مافيك تجرحني ولاقادر تعــــتـدي ... رح تنوقد حطبة بقلب الموقــــــدي
ويافكرةّ سليمان لا تعري ارتــدي ... ثيـــــاب البلاغة بكل وردة موردي
ومازال شايف صاحبك قردو بدي ... تاتبـــطل تشوفو وبحــــــالك تقتدي
بهالمنتدى لاتوقف على مرايــــتك ... بتضل شــايف حرف سبع بمأسدي

من طرف salomon 10/4/2007, 9:23 pm

que bonito y bello

معا الجدي وبزوق تمك بقها.....عا شكل بركي وطاف فوقا بقها
نحنا الضفادع ما بنسمع نقها....وللمي ما في زلحفي بنزقها
صعبي دروبي بالمعنى تشقها...وما فيك ليي وروح راسك دقها
وان كنت خشبي للمواقد زقها...تدفا صدور المعرفي من حقها
وعا جهنم الحمرا اذا وديتني.....شياطين مملكة القوافي بطقها

كيف بتشوف طقيتا

من طرف **7arf** 10/5/2007, 3:02 am

Muy bueno Hermano

كتير حلوة وعجبتني طقيتها يارهيب

--------------------

سليـــــمان يامجروح ومضيّع دواك ... ومدندل وهابط ياحســــــرة مستواك
يمكن اذا طقيتها بقلك عفــــــــــــاك ... لكن مابقبل حاكــــــم بعدلو ان عفاك
دروبك انا الشقيتها ووينو وفــــــاك ... للرجعـــــــــــــك للشعر تاترفع لواك
وعاجهنم الحمرة ان بعثتك ع علاك ... شياطــــــين مملكة القوافي من قواك
بينطنطوا عاكتافك بلعبةّ رضــــــاك ... بــتـتـنـمرد وعينيك بـيـصـفـوا وراك
ومتل البطل ماتاه رح تهرب أكــــيد ... ان علقت مع حرف البلاغة والهلاك

من طرف salomon 10/5/2007, 9:49 pm

لا تخاف مش رح أهرب اببحلق بكز....وألا عا ضهرك بالقوافي ما بفز
رح ضل هوني واقف وبالعين وزز.......سيوف البلاغة ناطرة بصدرك تغز
نبيدك يا حرف الموهبي بالشعر مز....ومش ممكن سليمان يشرب كاس عز
ما بتهرب الأبطال بعد الأنتصار.....ألا عا راسا ما ترش الناس رز

سلامتك وانشلله فيك تحمل او وزز عينك باقي .

من طرف **7arf** 10/5/2007, 11:06 pm

مين اللي قلك فل ياسليـــــــــمان بـيـك ... اللي بيكرهك فـنـجر بوجّـــو عينتيك

لكم بنظم الشعر لا تعمل دويـــــــــــك ... انبـلّـقت عيــــــنـك ما بّرد عليك هيك

حملتك ع ضهري وكنت طفل بمنكبيك ... وتشتـشـتـك وحرف القوافي جبت ليك

من بعد رش الرز ياثــــــــاني بطـــل ... لا تخاف تهرب مش رح بيقـسى عليك

من طرف salomon 10/6/2007, 9:08 pm

بفنجر عيوني بحق ما بيع الكلام...وبرضى أذاسبيتني وما في ملام

حملني متل قربان ب شهر الصيام...حملني متل طفل المغارة بالحرام
حملني كتاب ودوخ من حمل القلام....عا شرط يا حرروف تمشي بأحترام
متل العلم سلمان بدك تحملو......ولما بيطل ضروب يا حرف السلام

حدا بيهرب من الجنة
ناطر طقتك

من طرف **7arf** 10/7/2007, 3:31 pm

حملتك قلم تاحبرك شعـــر الملــوك ... حملتك طفل غلطة المسيح يشبهوك
وقربان قدمتك ماقبـــــــلوا ياكلــوك ... اللي بيعرفوك وبالكرامة عامــلوك
مش حق تنسى العل محبة علمّـوك ... وتاتصير شاعر خط أحمر علمـوك
يعني اذا بينت عن حسن الســلـوك ... رح سب اللي فيك سبــوا وبهدلـوك
لكن اذا بلّقت عينين الشكـــــــوك ... وإعجاب نفسك فيك عبّالـك صكوك
عملتك علم أخضر واحمر يحملوك ... لونو مسحت وصار أبيض يقشعوك
رافع رايات السلم ملـــفوف بكــفـن ... ونعشك على كتافي وتحية يرحموك

الملاك مابيهرب من الجنة

من طرف salomon 10/7/2007, 11:37 pm

بحياة الله للحرف لا تحررفوه......البيشك بالأيمان بنقلو... تفوه
حملني أنا ديغول بفرنسا نفوه....ديغول متل السبع عجزوا يكتفوه
حملني بارودي بأيد جندي وقفوه....يما مقاوم للشهادة ولفوه
وجيبوا علم لبنان لكن رفرفوه....ولفوا أمير المنبر اليبتعرفوه
متل البطل رح موت تا يبقا الوطن....وألا بعلم لبنان ما بيلفلفوه

شو كيف شفت ها القافيي

من طرف **7arf** 10/8/2007, 2:13 am

في إســــم بكّومي بّلدنا نبـــــع عين ... ديغول عنو قــــال كــاتب صفحتين
تمنى برحيـلـو يحملو بـــيــن اليدين ... تا يرتوي منو ويشـبـــع كل عيــــن
والحرف متل النـبع بيــــوفّي الدين ... وإنت البديت بهل بطل ياحرف وين
رجعت ومتل ماراح ياحسرة البطل ... ودعتـــــنا وفليّـــت تاتصيرو تنـيـن

من طرف salomon 10/8/2007, 9:07 pm

ديغول حرر دولة فرنسا وقام......من بعد منها راح تا يمضي السلام
يمكن عليه الناس بتحط الملام....لكن حقيقة...بيستحق الأحترام
وما زال يا حرف المنابر أنت هام.....مني نصيحة لا تربي الأنتقام
فات البطل عا المنتدا متل الحمام....وأنت هجيتو وليش كنت كتير سام
وصفيت تحكي بالقفا تغز السهام....وراح البطل من منتدانا يا...حرام
وهلق عليي هجمت يا طير الظلام....وبتقول لازم فل تكرم يا غلام
ومن بعد ما سليمان يرحل يا بطل.....بدكن تموتو جوع لرغيف الكلام

من طرف **7arf** 10/8/2007, 10:21 pm

بتعرف حرف عندو ثقافةّ شكسبـير ... ومن عدل كسـرى آخذ بشعرو كثير
انحبيت تتعلم معو؟ وشاعر تصـير ... المفروض مــوج البحر تحمل ياغدير
وليش رح بتفل ياطـــــفل الزغـير ... بعلمي طلبت منــي عليك البــــال دِير
وتركتني مالحقت ظهري بعد دِيـر ... إلا وصرت بحقولنا تعـفـّـر عفـــــير
وبلشت تحكي زور حتى وتستعـير ... اني انا بحق البـــطل كنت المجـــــير
ونسيت فات بمسخرة لموقع أمــير ... ولوما ما إكسر شوكتو طال المديــر
سألتك اذا ناوي بطل ثــــاني تصير ... بهالمنتدى أزغر عضو شاعر كبـير
وخبز الشعر مش رح بيتقمّر معك ... لومــا رضينا نزودك منو الخمــيــر

من طرف salomon 10/8/2007, 11:43 pm

يا حرف هات بيوت شعر مرتبي....وحاجي مع الأبطال تمشي دبدبي
فات البطل عالمنتدا للتجربي.....يزكزك مع الشعار ...عندو موهبي
شو باك طقيتو بقوافي مكهربي....وبلشت تهجم عا الأسد يا أرنبي
من خير ألله صار في عندي صبي......وبنتي حياتي متل زهرة بمسكبي
عطيتو خميرة صالحة ومش مطلبي ...هتتو مع الأيام أو يطلع غبي
وعنا النبي جبران ببشري ربي....وبييو عطاه من الخميري الطيبي
يا حرف قلي مين بييو حضرتك....نحنا بنعرف بس جبران النبي

من طرف **7arf** 10/9/2007, 1:40 am

مادبدب البشعر اخصامــو جلد ... وع هل حكي عنجد مـاعدلي جلد
فات البطل تايحلم بنومةّ خَـــلد ... لا تخاف متلو بهيك علـــقة تنجلد
مش كل طفل جديد صار بينولد ... متل النبي بيصير وبيشـــــهر بلد
فضل الأبوي زايري ديار الخلد ... الوالد عطى ابنو ماتنسى شو قلد
لوما شحذلو الملح تاتعلم منيــح ... مجهول كل العـمــر بيضل الولد

من طرف salomon 10/26/2007, 6:29 am

رجعتلك سن جلدك

تأخرت عنك كان في عندي هموم....جايي . ألك يا حرف فيق رجعت قوم
بوش لهجم عا ولادنا بأعنف هجوم.......بييو شحدلو الملح تا يحصل علوم
والحنش أبن الكوبرة وعندو سموم....والبحر متل اليابسي وبيي الغيوم
وشوف البدر أبن السما وبي النجوم....والليل جدو وعتمتو ألها لزوم
وشرش العريشي بتاكلو يما العنب ....والعنب أبن الداليي وأبن الكروم

من طرف **7arf** 10/26/2007, 10:26 pm

أهلا بهالرجعة أهلا انشالله تكون تحسنت

------------------------

بعلمي رحت شو عاد ردك ع الطريق ... صحّ النوم منقول لو نــــــومك غميق

التأخير ع الواجب ضعف حد الصديق ... وبّحر همك خوفــــــــــنا تنزل غريق

بتنطر تايغفى الحرف وبترجــع تـفـيـق ... ولما بيوعى بتوقع قبالـــــــو بضـيـق

وهالحرف بي الكاينة ولفـظــو دقـــيق ... وقدموس جدّو الدارك بسرو العمـيــق

داري يــــا إبني جـنـابك وضلك أنـيـق ... بتحلى الحبوب بتستوي بكرم العتـيـق

ولوما السـهــل يحضن الحنطة يارفيق ... بإبن القمح مـــاكنـت نخـّـلـــت الدقيق

وحتى العنب حصرم مــا فــينا نعصرو ... إلاّ بدموع الكـــاس ع شفاف العشيق

***************

يلا هات تانشوف

من طرف salomon 10/26/2007, 11:55 pm

جيتك تا علمك نحة الحروف يا حرروف

كانو قوافي الشعر الله يمجدو..... ويعرنقو لحد منو ويقعدو
ولما أجى سليمان صاروا يسجدو....يغنو بعرس المعرفي أها وحدو
سليمان منجد للمعنى بينجدو....والحرف أبنو وبيي بييو منجدو
وبيت المعنى أبن شاعر رددو...ويسوع أبن الأب نحنا بنعبدو
والطفل متل ملاك ساعة مولدو...بنقيم فرحة والأحبا بيسعدوا
وبي الأهاني لسان لازم تعقدو.....وأبن القداسة طهر خوري بمعبدو
وكرم الدوالي ما بيعطي مواردو...أن كان عجرم بالسقالي بنسندو
والعنب أبن الداليي وبي النبيد....راجع براسك طار جدو ياخدو

من طرف **7arf** 10/27/2007, 1:42 am

كان الشعر من قبل ماكتبتو غيوم ... ونتفةّ سراب ولا نسر قادر يحوم

ولما شرق حرف البلاغة والعلوم ... الطلاب فاتوا بمعهدو ترم اللزوم

طلِّع بعيسى الشرّف بأطهر قدوم ... بقدرةّ الوالد عاد ع الزرقـــــا يدوم

وبين القداسة والطهر ياطفل قوم ... وخلّي احترامك للنفس مش للهدوم

ياما طفالى ع الأهل شنوا هجوم ... ونكران ذاتو اللي لبس مجبور لوم

في إبن حول الأهل بيدس السموم ... وحولو الوالد فرّق جيوش الهموم

يعني الحرف والد لشعار النجوم .... ومنو بتسكر خابية خمــــر الكروم

بس اللي ربّا طفل عندو ومانجح ... بيلعب بدقن الوالد قبال العمــــــوم

من طرف salomon 10/27/2007, 6:58 am

بعرف أهالي تزوجوا للمصلحة....وقضوا حياتن شرب خمر وفرفحة
وبيي ال يبيبقا هيك هاوي الشرشحة....مكشف وماشي من الخليقة ما استحى
أكبر جريمي يعيش بدو مدبحة.....تا تعيش عيلي بعد منو صالحة
وبي الوطن قاعد عا كرسي مرحرحة...وما رف رمشو ضل نايم للضحى
وشو مفتكر من بعد هاك المرجحة....بتصير بين ولادنا لمصالحة
وبيي لبيترك شعر دقنو لكاحلو.....لا تلوم أبنو ن صار يضحك عا اللحى

من طرف **7arf** 10/31/2007, 1:20 am

اللي تزوجوا عن مصلحة يتبردخو ... ع حالهن قبل الطفالى جلــــــــخوا

واللي نشو صالح بيجيبوا وانتخوا ... من حقهم بعد العناية يشمخـــــــــوا

وبي الذكرتو بهــــيك عهد مأرخو ... برشوة الضميرو باع مابيوبــــخـو
هيذا ولد مش بي لازم نشلخو ... وعن والدو اللي بغير مطرح نفســـــخو

ياما طفالى ع كراسي تربخوا ... صيصان طلعوا وع الضرورة ما انتخوا

ومتلو البطل طفل اللي شعري نخنخو ... تاه وهرب وديار بيو فخخــــخو

فكيت تفخيخو وطلع عزمو رخو ... وما أقرفو ما أزنخو وما أبيـــــــــخو

الأبن الغلط خلقان عمرو مايجي ... ع الكون جبلةّ نقص حتى يوســــخو

من طرف salomon 11/2/2007, 3:13 am

لم انصلب يسوع ياما تشمتو.....كل اليهود بجرح فادي ..وقوتو.
ضلت لأخر يوم تندب ميمتو.....عرفنا بأنو الأبن الله باعتو..
هون الأبن بالدين شدت همتو....وأدّى الشهادة والمحبة ضمتو.
.ومتلو محمد مات والبعدو أتو......وما تعطلت من بعد منو أمتو.
.ويا حرف مهما تكون أبنك سيمتو....لو كان شو ما كان ما بتموتو.
.وقلي أذ الله عطاك ولاد سود.....بتكب نصن أو بتشكر نعمتو

من طرف **7arf** 11/2/2007, 3:37 am

بين النبي وبين المسيح بفرد زيـح ... قـــول الحقيقـة وعيب تاعنها تزيح

إسم النبوة والدة الأُمة صحــــيح ... بّصلي عليــهم واجب وزيد المديح

لكن ع سيرةّ طفل أسود او قبيـــح ... إعرف شو قبلي قال نوح بتستريح

وإرجع لجد الكون آدم ع الضريح ... بقايين وبهابيل فـــــرّق بالمنــيـــح

هيهات يرجع ع الدني إبن ونبـــي ... وهيهات يخلق متل يسوع المسيـح

من طرف salomon 11/8/2007, 9:30 pm

لما خلق يسوع والرب ا نولد....فرحت العدرا ويوسف بملقى الولد
ونوح النبي لوما ولادو تنوجد...كنا بقينا بلا خلافي بالبلد
والملح أبن البحر مش أبن الزبد......ومن دون رشة ملح كل شي بينفسد
وشوف الكدب والغش عنا بينعبد....هودي ولاد جدودهم غيري وحسد
وبي القصيدة شاعر وممكن يموت....وأبن البلاغة كتاب باقي للأبد

من طرف **7arf** 11/9/2007, 1:11 am

ياوالد الشـعــــّـــــار يا بي الولـــوع ... يانــــــــــــور منك منبثق كل السطوع
انت الشجر والمـــجد يابَـــي الطلوع ... ولوما الشجر بالأصل ماعاشوا الفروع
سليمان لا تهرب بســاحــــات الوقوع .... خليك حــــــاسب بالسجـود وبالركوع
مابتنقبل صلواتك وتـــــــــرم القطوع ... لوما وجـــــــود البي مـات الأبن جوع
وصلّب لربك عن إيمان وعن خشوع ... ولا تقـــول اسم الآب . وقنـاع الجموع
لومـــــــــــا بأســــم الآب قبل بتبتدي ... بروح القدس والإبن ماضووا الشموع

من طرف salomon 11/10/2007, 11:35 pm

شوف الليالي غافيي بأجمل سباة....وخليك عا الموضوع حاجي فزلكات
مفروض يا حرروف أعمول ألتفات....وقلك الشاعر بي شعرو كان مات
لوما ولاد المعرفة بجهد وثبات.....جمعو دواوين الشعر بالمكتبات
أبن العدالي حق والحكمة صفات....والظلم بي الأفترا وجد الممات
وكان الفكر ختيار لولا من النواة.......وأبن السعادة أجمل من العنعنات
وحتى الجسم بيضل بي بكل زات......والقلب أبنو والشرايين البنات
وكان الجسم بيموت وبتفنا البشر......لوما فروع القلب تنقلو الحياة

من طرف **7arf** 11/11/2007, 11:42 pm

تعقـّل يا إبني شغلتك مش هينة ... عمرك شهر والعام بييك مافني
انكنك ولد ميشوم في دور السنة ... وجبت الإهانة للأهل ماهمني
قدموس لوما يكون بيي العلمني ... بحروف جهلك كنت عايش غشمني
وجبليي بدون البي إبن وإعتني ... من وقت مالتكوين بّلش دلـّني
عطيني ولا تحكي بفزلكي أو ولدني ... كيف الحياة بتكتمل شي بيّنة
لوما كبرت وبعدك تخلّف ولاد ... لا صرت بي ولا اكتمل دور الدني

من طرف العقيد 11/19/2007, 9:04 pm

طيني ولا تحكي بفزلكي أو ولدني ... كيف الحياة بتكتمل شي بيّنة
لوما كبرت وبعدك تخلّف ولاد ... لا صرت بي ولا اكتمل دور الدني

الله......... ولك روح يا كبير

ضلك تاحفنا باعمالك

من طرف salomon 12/9/2007, 1:19 am

راجع يا بي المنتدى اشتقنا كتير.....أبنك حبيب الروح في عندو ضمير
شفتك صرت ختيار وبموقف خطير.....وما لك أعاني غير أبنك يا كبير
ولو كنت عنتر عبس يا شاعر وزير.....وقررت تترك ها الدني وبؤس المصير
الخلف ما مات الناس بدهن يزكروا.....والي ما عندو ولاد بيقولو فقير

من طرف **7arf** 12/9/2007, 3:38 am

salomon كتب:راجع يا بي المنتدى اشتقنا كتير.....أبنك حبيب الروح في عندو ضمير
شفتك صرت ختيار وبموقف خطير.....وما لك أعاني غير أبنك يا كبير
ولو كنت عنتر عبس يا شاعر وزير.....وقررت تترك ها الدني وبؤس المصير
الخلف ما مات الناس بدهن يزكروا.....والي ما عندو ولاد بيقولو فقير

ياميت اهلا بهيك عـــــــودة موردي ... ورود الربيع زرار فـيـــــهـا بتبتدي
راجع لبييك بعد غيبة مـعمـــــــــدي ... نشالله الرجعة حاملة قـطـــــر الندي
بييك ياإبني شـــــــاعر بنهجو اقتدي ... تاتطل شمسك مطرح النورو غِدي
ان ماقبلت تجبر خاطرو بدور الدني ... محروم رح تطلع رماد الـمـــوقــدي

من طرف salomon 12/9/2007, 4:10 am

راجع انا وجفون وجي عابسي.....طبعك علي كتير يا بيي قسي
رغم الظروف القاهرة والمتعسي....قلبي احترق لما تركت المدرسي
انتو أكلتو من حبوب الهلوسي....ونحنا ضرسنا وانعدينا التلبسي
نحنا ولاد الموهبي وجمر الكلام.....وانتو يا ها البييات قرمي يابسي