منتديات الزجل اللبناني الشاعر: عمار البراضعي

أهلا وسهلا بزائرنا الكريم
عليك بالتسجيل لكي ترى كافة المواضيع المخفية
=====================
الزائر رحبنـا برسمــــو = وع التسجيل دعينا يفوت
وغير اللي مسجّل إسمو = عنو منخفي يقـــرا بيوت
=====================



انضم إلى المنتدى ، فالأمر سريع وسهل

منتديات الزجل اللبناني الشاعر: عمار البراضعي

أهلا وسهلا بزائرنا الكريم
عليك بالتسجيل لكي ترى كافة المواضيع المخفية
=====================
الزائر رحبنـا برسمــــو = وع التسجيل دعينا يفوت
وغير اللي مسجّل إسمو = عنو منخفي يقـــرا بيوت
=====================

منتديات الزجل اللبناني الشاعر: عمار البراضعي
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

مع الشاعر سليمان طراد

اذهب الى الأسفل

مع الشاعر سليمان طراد Empty مع الشاعر سليمان طراد

مُساهمة من طرف Admin 3/27/2007, 4:19 am



عنوان الموضوع : مع الشاعر سليمان طراد

مع كل كلمة من الوحي جايي ... موقع حلو بحقق الغايـة

لموقع ابــــو حمدان عندو فضل ... وموقع الثاني كمّل الآية

3/16/2007
*******************************
الرد الأول من عمار
على الموقعين .

أول موقع وقعـــــنا ... وبالثاني مـاتوقعـــنا
يصيروا كلماتو ايات ... بتشريفك ع موقعنا
...........................
بموقع اول صارلو زمان .. وموقع تاني فكار جداد

ومين اول او تاني كان .. شو بينفعنا بدون بـلاد

بدي محمد بو حـمدان .. يـــرجع وسليمان طراد

ونعيش سوية بلبـــنان .. هجر الشاعر فقــعــنا
.................
تحياتي وانشالله منتلاقى بربوع وطناالحبيب لبنان
3/16/2007 10:01:00 PM
*******************

الرد من الشاعر سليمان طراد
هالموقع عندو معنا .. منو الخير توقعـــنا
الأول وقعــــنا بالحب .. الثاني بحبو وقعنا
............................
الشاعر بالغربة جبار ... بيحصر همو بالكلـــــــمة
لازم يعمل ليل نهــار ... وبشمعة يضوي الظلمي
سافرنا لم كنا زغــار ... ورح نرجع زلمي زلمـــي
وأوعى تفزع ياعمــار ... مازالو الله معنــــــــــــــا

************************
الرد من عمار على الأخ والشاعر سليمان طراد

ياسليمان الحكيك نــــــــور ... وشعرك ع البدر تعلى

بشهد مش عم تحكي زور ... بكلماتك عم تتجـــلى

ووين ماكنتو بالمعـــــمــــور ... الله يحرسكــــــم الله

ولا تخلوا الأيام تجـــــــــــور ... تفرقنا وما تجمّـــــعنا

3/17/2007 5:31:00 PM
***********************************
الرد من الشاعر سليمان طراد

سافرنا وعنا إيمــــــــــان ... انو منرجع ع الموعــد

وياما من سنين النسيان ... تمنينا نحلم مشــهـد

ومابيعرف حالو الأنســـان ... إلاّ مطرح مـــــــابيولد

وماكنا تركنا لبــــنــــــــان ... لو فينا القرش جمعنا

**********************************

رد عمار الى الشاعر والصديق سليمان طراد

العطيونا ألأمثال فنـــــون ... بصلي عليهم عالأمثال

الغربة موطن إلها ديـــون ... الفقر بموطن غربة قال

بعرف شعرك وين ماتكون ... طال النجم المابينطال

وواقعنا الصاير مجنــــــون ... عــــنا رحّل احلا رجال

وبالقرش منقنع بعيـــــون ... لمـا بكرة بيهدى البال

وكسرة خبزة مع زيتـــون ... بتقنعقكم وبتقـــنــعنا

3/18/2007 11:43:00 AM
***********************************
الرد من الشاعر سليمان طراد

العطيونا الأمثال كبــار ... عليهم صلي وترحـم

عطيونا أجمل تذكــــار ... وبنجني فيهم معجم

مافي شاعر عنا صـار ... لوما هاجر وتعــــــلم

يسرق من الله الأفكار ... تايصفي شاعر ملهم

بو روكز هاجر تاصـــــار ... بالغربة شاعر أعظـم

وبدنا منك يا عمـــــــار ... تهاجر مدة وتقنعـــنا

3/18/2007 9:04:00 PM
********************************
الرد من عمار على الشاعر سليمان طراد

أخي سليمان ياريت بتسجل بالمنتدى حتى انقل المحاورة ومنكملها بداخلو
وتحياتي وعلى هذا الأساس تم نقل المحاورة للمنتدى وذلك للتحكم بالكتابة بشكل أفضل
.................

مش ضد الغربة عمار ... مجربها وفيها قــــــاعــد

ياما غنا ليل نهـــــــار ... وع العـــــودة ضلو واعــد

وبالغربة حمل الأفكـار ... تا يبقى الناس يســاعد

ولوما عاد يشرع الدار ... شو نفعو شغل الساعد

وبو روكز رب الشـعّــار ... لو عنــــــــــــا يضلو باعد

ماكنا تعلمنا الكـــــــار ... وكـــان ضاع ومتلو ضعنا

3/18/2007 9:51:00 PM
*********************************
هلق فهمتك ليش بتضلك ودود ... وشعرك طبيعي وكلمتك نسمة برود
يمكن بالبرازيل ماقدرت الصمود ... وعلقت شعرك ع الصدور وع القــدود
ياعازم سليمــان ع جنينة ورود ...النحلة زكية بالعطر بدها تعـــــــــــــــود
يمكن اذا زكزكتني بفك القيـود ... بيتي عرين الشعر والكلمة شهـــــود
ع المنتدى طليت مابيّن حــــدا ... وينن ملوك الشـــــعر هربوا ع الحدود
.........................................................................
تصحيح : قرادي لسليمان


عيش الكلمة وجول عيون ... بتقشع شاعر منو ركيك
وبنظم الشــــــعر الموزون ... تكرم عينيك رح لاقيــــك
فوت بّحر الكلمة وكــــــون ... متلي فوق المنبر ديــك
نحنا بضيعةّ بر حليــــــــون ... الشعر بيربى بمطلعــنا
.......................................
عمار قرادي

لو بدك احكي عنجــــــــــد ... وإزعج نفس المبسوطة

فتحت عيوني وشفت الرد ... بهالردة المش مزبوطــة

صححتا والــــــــواجب رد ... وديلك كم زلغوطــــــة

ياديك العم تقطع حــــــــد ... نسور الفن بمضجعــــنا

...........
رد عمار معنى
.................

ملوك الشعر مابيهربوا فتحوا مجال ... يا ميت أهلا فيك ع الساحة نـزال

دعيناك ياسليمان ع معقل رجــال ... ومنهم انت لاتخاف رب الارتجــــــال

وع المنتدى طليت في سرعة غزال ... ونسيت ثلثين المراجل بالمثــــال

ياما بشعري تجدبوا ملوك الخيــــال ... ونزل الوحي ع كلمتي يشحذ مقال

الرجعة تاتفرشلك طريقك بالـــــورود ... بهالمنتدى شو بتزرع بتحصد غــلال

.............................
سليمان قرادي

بعثت الردة عالايمـــــــــايل ... كــــانت ردة منعـدي
رجعت كتبتا بسرعة نشال ... تاني بيـت من الردي
هيذي غلطة من الإرســال ... ولاتمرّق جنحك حدي
جنح غرابك اسود فــــــــال ... ونحنا حمامة للأمثال
بحور الطوفان قطعنا
.........................
جواب عمار قرادي
لاتفكر رح تعلى صـــروح ... انعدت الردة تدوزنـــهــــــا
ثاني مرة مش مسموح ... الغلطات تأكد منهـــــــــــا
وراجع تعمل حالك نــوح ... بس الناس بطمــــــــــنـها
ع ضعفك رح ابكي ونوح ... وصدرك شقو قلبك شيـل
كلما بلونو بتقشعنا
..................................

رد من سليمان معنى

لهل المنتدى حبيت اعلن إنتساب ... منشان يا عمار تحسبلي حساب
ملوك الشعر من بعد بو روكز سراب ... زرعوا القوافي الطيبة وحصدوا العذاب
لو كان عندي وقت تاإطبع كتاب ... تاكنت خلّي الشعر يركع ع الركاب
مايوم بطرس ذيب بالأشعار خاب ... وإدوار ابن شمالنا ربو استجاب
وردّ الأمانة وهيك إدوار حرب غاب ... وأسعد الخوري كان بشعارو مهاب
بطرس وحرب وأسعد الخوري وخليل ... زرعوا الدني شعّار واليومي تراب
......................................
سليمان قرادي جديدة
بعرف فتنا لهون ضيــوف ... وحتى نكمل جولتنا
منك بدي عمال معروف ... تّرجملي ع لغتـــــنا
..............................................................................
والرد من عمار قرادي

ع الموقع حبينا تفــــوت ... حتى نغني بيوت الكــيف
ونسكب اشعار الياقوت ... إخوي وما منعدّك ضـــيف
رح ترجملك تـــــا بيروت ... تجمعنا مرة بالصيـــــــــف
بحفلة نطبع إلها كـروت ... ويغفى الليل بحفلــــــتنا

...............
الرد من عمار معنى

هالمنتدى المشرق بعين المعرفة ... سليمان سجّل فيه خـــوفي ينطفي

ملوك الشعر لو قلت بو روكز قفي ... وبطرس غفي وإدوار شعرن ما غفي

الله يرحمهم سوا ومنــــــــــاصفة ... عطيوا الشعر علم وبلاغة وفلسفة

ولا تجحد النعمة بهالعصر اكتفـــي ... بموسى وطليع وجريس وسّيد وفي

وشو رح بعد وقول بالشعر الصفي ... لبنـــــــــــــان كلو شعر حقو منوفي

ولو زرت برحليون بالدير اصطــــفي ... البير الحلو أثــــــار حامل مش خفي

بتقشع إلي ايات مع أثارهـــــــــــا ... وتقشع إلك كلمات خرج الصفصفي
..................................
سليمان
النسر بيعلى فوق تـلال ... وبيحمل ميةّ طلــــقـة
لاتتحركش فيي عقــــال ... شاعر متلي مابتلقـى
تمرجل ع ضعفي مــازال ... حابب تعلق هالعلقــة
ضعف الكلمة شال جبال ... أهلا فيك بهــالملقــى
لا تعمل حالك رجـّـــــــال ... وجاييني بهيكي خلقة
نافش شعرك حاطط جال ... ياتسلملي بهالمودال
عند حق تزرزعنا

.................................................................

رد من عمار

كحّــــلي عيونك بالميل ... فيـنا بتكبر بالسمعــــــة

فكرنــــا القيمة بتشيــل ... لكن مش لقطة وطمعة

محسوبك اصلع هالجيل ... بعيونك ضوي شمعـــــة

ولاتجّـــرب تحكي تمثـيل ... مع سيفي العندو لمعة

لا تحكي بنفش جداديل ... عرفتك يمكن من جمعة

حاجي تعمل قال وقيــل ... قلي شعرك فزّعنـــــــا
.....................................

سليمان قرادي

فتنا ع الموقع بالـــــذات ... لما شفــنا فيـــــــه بدور
ورح اكتب اجمل أبيـــات ... وزينهـــا بحروف النـــــــور
شاعر بعرف بالحــــــزات ... تكرم عينك ياجمهـــــــور
منعمل حفلة بي حالات ... وحفلة منعملها بي صور
وحفلة بضيعةّ لمريجـــات ... منعزم زغلول الدامــــــور
ورح نعمل أجمل حفـلات ... بضيعتكم وبضيعتــــــــــنا
.......................................
سليمان معنى

يافايتة علل غوغل بمنظارها ... الضيعة الجميلة جمّعت أخبارها

الشحرور برحليون مرة زارها ... وإعطى شهادة وداخ من شعّارها

فضلة انت بتكون من أثارهــا ... زورا شي مرة تبارك من ديارها

ولو زرت برحليون عن حقيق وحقيق ... بتشوف اسمي بالذهب ع حجارها
....................................
رد من عمار

ع هالجواب اللي سدى منك ذهب ... ضحكوا القوافي وراهب الشعر ارتهب

الشحرور متلي كان شاعر منـوهب ... يسكر الدن ويعرف بعصر الغهــــــــب

ومرة ع برحليون لو فكري شهـــــب ... من ديرها يتبارك ويطــــــــفي اللهب

إسمك رح تضيّع مابين حجارهـــــــا ... لما قدومي يحــــــــــوّل حجارا ذهب

**************
رد سليمان
شفتك بالصورة منفــــوش ... غاشي من الضحك غشينا
شعراتك هروا من رشوش ... الكلمات البقوافينـــــــــــــــا
مستشعر قلنا ومغشوش ... فهمنا القصة وماحكيــــــــنا
لكن عالمنبر تشتـــــــوش ... لا حلمنا ولا توقعنـــــــــــــــا

*******
والرد من عمار

ضحكة عمـــــــــــار بـــأداب ... أجمل صورة عالشاشة
لكن من دون الأســــــــباب ... مابريدك تطلع غاشــي
ومغشوش بّعض الأصحــاب ... المتلك عا عينو غباشة
عندو من الصورة سرســاب ... ولا بصورة شعرو شبعنا
..................
رد سليمان
ياتراب برحليون من شعري شبعي ... وباب التحدي بالمعنّى شرّعي
ويامنتدى البعين معرفتي وعــــــي ... تسجلت فيكي عن قناعة وعن وعي
ملوك الشعر ماشفتها لا تدعـــــي ... ولاسمعت فيها وعالشعر جد السعي
وشرّف عا بحرليونا الفيها وِعــــــي ... شاعر محنّك بالقصيد الأصمعي
وعاضهر أحمر شوف لما بندعـــــي ... بحضّر قصيدة للرثا أصول النعي
وعاضيعتك فزعان ياعمـــــــار روح ... ما تروح روحك قبل ماتغني معي
..................
الرد من عمار

لاتخاف من روحي وصدى اهاتها ... شعري بتبقى مخلدة بسهراتهـا
ياقاصد سباع الوغا بغابــــــاتهـــا ... روحات روحي احسب حساباتها
روحي البجسمي عايشة جواتها ... غير الخلقها صعب ينده هاتهــــا
ومازال جايي بنفسك ونياتهـــــــا ... تا تعكس القصة بعكس اياتهـــــا
بكرة اذا الهجرة انجلوا غيماتهـــــا ... وقصدت ضهر الأحمر وأبياتــــــها
تراباتهابتقشع بيحكــوا فلســفــة ... وبتكحّل عيونك من تراباتــــــــــها
...........................
سليمان
باداب بيحكي عمـــــار ... ياتسلملي هالضحـــكة
مفروض نقلّك ياجـــــار ... أشرفلك ان ماتحكــــي
فتنا عالموقع شعـــــار ... تانغني الشعر المحكي
لقينا شعرك اصفر صار ... قررنا نهجم عالنـــــــــار
تانردك عاموقعنا
......................................................................
والرد من عمار

بتعرفني ملحّق ع الكل ... وبالعالم عامــــل خضى
ووردة زارعلك بالجـــــل ... كلــــــما عمــــار تفضى
والشعر المحكي منجل ... وحكيك لو كـنّـــو فضـــة
بغير خسارة مابتـــــفل ... وسكوتي جوهر ع الحل
لو ع بعض تقوقعنا

******
سليمان
شوباك ياعمار حكمك إكتئاب ... وصفيت ضايع بالسؤال وبالجواب
انت عجوز الشعر عا فراش العذاب ... ونحنا خمير المنبر وشعر الشباب
ولا تفتكر بتراب ضيعتكم بهاب ... بقدس تراب بقاعنا بعد الغياب
وبترابك بكحّل عيوني ياوطن ... عا شرط ياعمار رح ردك تراب
...............................
والرد من عمار

خسارة اللي ضاعوا وعن وطنا تغربوا ... والجرّب مجرّب عقل بيخربو
حيرتنــــــــــا مين اللي ضاعوا ودبدبو ... ساعة وين الملوك ساعة بيهربو
تراب برضى كـــــــون ليي تنســـــبـو ... وكحّل عيونك شعر مني ورتبو
قبلتك بمدرستي الشـعــــر تاتكتـــبـو ... وتضل تدرب مع اللي تدربوا
فيي طمعت صح المثل والكاتبــــــــو ... تلئمنت وتمردت قلت بجربو
وهلق صرت مجبور حرفك ذهّــــــــبو ... تاعلمو أصول القوافي وأدبو
في ناس خلقوا تراب غدر تشرّبـــــــو ... وفي ناس ع ترابن الناس بيندبو
من تراب أرزات القوافي والخلـــــــــود ... مرهِم شبابك شعر مجدي بتقربو
......................
سليمان
لا تفتكر ابيات شعري محضــّـــــرة ... بكتب بعد مابيت شعرك ينقرا
بالليل بزرعلك ورود معطــــّـــــــــرة ... لكن في عندي مشكلة بلا مسخرة
من كثر ماعم فوت عالموقع نسيت ... عندي ولاد ورح تطلقني المرا
...............................................................
والرد من عمار

لا تفتركني بّرد إلاّ ع عجــــــــــــــــل ... معتاد احكي الشعر مني مرتجل
سهرت الليالي لموقعي قلو أجـــــل ... إزرع وابني وتكتكوا ديوك الحجل
ومش مسخرة بحاكيك وبعيني خجل ... وقتك سرقتو وصار في عندي وجل
إنت وأنا نصفي أرامل بالحيــــــــــــاة ... وكل فرد بدل البكر يصبح بو زجل
................................
سليمان
ملحّق عالكل ومكفــول ... بهالردات الفزيــــــــعــــة
بياع الخردة ع طـــــــول ... عامل جدّة بالضيــــــــعة
وبنظم الشعر المسؤول ... مابتوفي هالبــــــيــعــــة
يازورق جايي الأسطـول ... يغزي بحرك عرض وطـول
ومافي قوة تمنعنا
............................................................
والرد من عمار

مافي إسطول بلبنــــان ... بيقدر ع شطوطو يهدي
وبحري دحرت الطغيــان ... ولا شاعر طــــالع قدي
ولما هاجمني سليمان ... ع قدو صرت بـــــــــودي
بوديلو شعر وقصـــــدان ... بيحكيني بشعر النسوان
لقوة ركيكة يرجعنا
.................................
سليمان
صفصف كلامك بالمعنّى ورتبوا ... الطفل اليبيكبر بالحجر مابيضربـــــو
تراب القدر مافيك ليي تنسبــو ... المتلي انا ماء الحياة بتشربـــــــو
شوف الولاد العا شطوط بيلعبوا ... بعين الشمس عن عين امّن مااختبوا
لكن اذا ع تراب مجدك قرّبــــــوا ... بيتجلغموا بيتوسخنوا بيتعذبــــــــوا
عندك تراب على جنينة بنجبـــو ... لكن ترابك حاطينوا بالقــــــــــبــو
تفضل ترابك مابيصلح للـــــــولاد ... ولافي جنينة للزراعة بتنسبـــــــــو
........................................................................
والرد من عمار

مسكين ياسليمان شو بدك عجيـــن ... تاتصير قادر للسبع ضمن العرين
فكرتني انحاكيتك بّرقة وليـــــــــــــــن ... بتقدر تمرق لعبتك ع الملهمين
يمكن بعد ماعرفتني عنجد ميـــــــــن ... هلق بتعرف مين عمار الفطين
شاعر انا ترابي تراب النـــــــــابغيـــــن ... مش لـللعب والكسدرة تراب الحنين
ترابي الحاوي بداخلو الكنز الثميـــــــــن ... ترابي لكعب الأرز رافعلو جبين
ترابي بجيلي اللي مضى وسرو الدفين ... بعدو محافظ ع كنز شعري الأمين
ترابي الحمل جبران من عدة سنــــيـن ... ياطفل لاتلعب ع قبر الخالدين
مش حق اهل الجهل تتجلغم زكــــــــا ... من المهد حتى اللحد خلقوا ميتين
................................
سليمان
يمكن انا ماعرفت كل عوايدك ... لحفلةّ تحدي جد قلبي رايدك
مني تحية صادقة لاقايدك ... بين الوقت والشعر مش رح قيّدك
يمكن أنا رح صير بييّك يازجــل ... وعمار صاير خَي بَي قصايدك
........................................................................
والرد من عمار

بين الوقت والشعر تفكيـــري ربي ... وليي عروس الشعر مشيت دبدبي
وعوايدي من عوايد الشعب الأبي ... الكتبوا زجل منو بيغني مكتبة
لا تخاف باقي مشربك من مشربي ... والسبع مابتقيدو ولا ارنبة
وانت وأنا بعد الفحص والتجربــــة ... مش بس أخوي فردنا بشعرو نبي
ساعة مابدك للتحدي مطلبـــــي ... بالوقت او بالشعر جاهز ملعبي
ولما التحية قريتها بالاجنبــــــــي ... من خي جايي نشقت ريحة طيبة
ريحةّ محبة خالصة وريحةّ عطـــاء ... فيها الشرف لولاد أهل الموهبة
...................................
سليمان

بإسطول الشعر بلاقيك ... وببرم عابحور كبيـــــرة
وتاتهرب مني مــــافيك ... حاجي تضيّع تفكــيـري
انت شويعر خصم ركيك ... بتغرف بي بركة زغيرة
ونحنا بحور الأطللنتـــيك ... مش رح تقدر تبلعنــــا
........................................................................
والرد من عمار

بتعرفنـي شاعر منــــجل ... ان نادني الواجب مابحيد
خصمـي بذل ومــــابنـذل ... وبحمل كاس النصر بإيــد
ومن اول ماشعرك طــــل ... ومقضـــــــــــيها بالتهديد
اعلا خيلك جول وهــــــل ... بتتعركج في أزغر بيـــــد
زغر البركة بموسم غــــل ... مع جاهل ضامي بتفيـد
خمر الشعر بيحسب خل ... وضــــــــــــايع مابيضيعنا
.................................................................
Admin
Admin
الإدارة
الإدارة

عدد الرسائل : 67
العمر : 56
تاريخ التسجيل : 01/11/2006

https://7arf.editboard.com

الرجوع الى أعلى الصفحة اذهب الى الأسفل

الرجوع الى أعلى الصفحة

- مواضيع مماثلة

 
صلاحيات هذا المنتدى:
لاتستطيع الرد على المواضيع في هذا المنتدى