هوارة الوضع اللبناني

لقيت إنو الطرافة و التنكيت أحسن وسيلة للتعبير بهالموضوع........

هوّر يا بو الهوّارة-----هون بلاد الحضارة

صارت عشرة كيلو و نص-----تحوي اتنعشر إمارة


يا لبناني فتّح عين-----ان ضلّينا عا هالأحوال

خبّرني بدنا من وين؟-----نردّ النسمة و العرزال

صرنا بالداخل فوجين-----عم نحكي بالإستقلال

عمّرنا مستعمرتين-----بين القيل و بين القال

نزلنا بحرب الآذارين----و كل مين استقوى برجال

رْياض الصلح المالو اتنين-----رحنالو على التمثال

فرّقنا الساحة بخطّين-----و لولا هالشويّة عِقّال...

كنّا تقاسمنا بكيسين-----عضمات الشيخ بشارة


و هوّر يا بو الهوّارة.....


و هالإعلام الما بيملّ-----اسمالله عالموضوعيّة

محطّة فاقت قبل الكل-----نشرتها برّانية

محطّة نشرتها بتضل-----تبرم متل الشمسية

محطّة شاشتها عالحل-----حرب و دم و حرّية

محطّة بتنشر عرض الكل-----متل لسان النوريّة

لك وحياة الرب المنجّل-----بهالعطلة الأسبوعية

مش حاضر إلا تي ألTL -----و فوتبول و باب الحارة


و هوّر يا بو الهوّارة...


و السياسة عالأخبار-----صارت متل الحزّورة

و المواكب عالمطار-----عم بتودّع مقهورة

إن ما عقلْتو يا أهل الدار-----و تبدّل لون الصورة

بدو بكرا يطل نهار-----التوبة ما إلها ضْرورة

و نسيّج داير من دار-----من حلبا للناقورة

و نكتب: متحف للآثار-----و شرفو لعنّا زيارة!!



إبراهيم ياسين