شجرة إم شراطيط

من طرف **عمار البراضعي** 11/21/2009, 10:50 pm

شجرة قديمة اتسلطنت عازمانـهـــــــــــا = وبالعنفوان كثير عالي شانـهـــــــــــا
حملت إسم قمصان شالحها الفـــقــــيـــر = ومشلخـــَة ومشقـّفي منشانهــــــــــــا

وكان إلها عز مع رهجـِة كـثيـــــــــــر = وشمس النــغــم باخت على ألحانهــــا
بيتسابقوا عليها متل نحـــل القـفــــــيــر = ورب السمــــا من مجد عزو صانهــا

أولادها شّراطيط من صوف وحــريـــر = قـــوس القزح بتكمّـــــلو بألوانــــهــا
بتحرس الوادي واقفة متل الغـفـــــــيـر = وكل عـــام بيمرقوا من تحتــــــــــهـا
تايعلقوا شقفة على أغصانها

* * * * * * *

وبعد مدة صار في عــنـــــــــــــــــا غلا = وطل البـرد والبــدر ما عـاد انجـلى
عاقد ماغالي شفت سعر المـــــــــــازوت = صـار الحطب بعيوننـا زايـــد حــلا

وعاحرش يَقــّـبـَة خفـت شي واحد يفــوت = ينــشـــر حلاها يقــول لا حــولا ولا
وعاالتــيم من أفقــــا بتـصرخ عشتــروت = نهـــــــــــرك بلا أودون بالدم انتـلا

بقصد الشجرة وحامـــــل بقصدي تابـوت = حـــــــط العليها معتدي وفيها اختلا
وعن سلاحي زحت خيـــــط العنكبـــوت = الحطـاب إقتل مـن قبل مايقصــــها
حلمي سبقني وكنت راكع للصلا

* * * * * * * * *

وحمدت ربي والصلا كفيـــــــــــــــــت = إني بحلمي كنت جـــــــــــوا البيت
والكنت إلعب والـتهي في ظلـــــــهـــــا = تبقـــــــى محـلاّ متـل مــــــاتمنيت

استسمحت ربي بالدهر مايذلـهــــــــــــا = وقصدت شــوف اللي حصل ولقيت
بعـدا الشجرة واقفة بمحلـــــــــــــــهـــا = وعاقــد مابحلمي تضــــايقت بـقـول
ياريت مـــــــــــــــاشفت الحلم ياريت

* * * * * * * *
يقبة إسم المنطقة الموجودة بها الشجرة وتلفظ
يق با

* * * * * * * * * *

من طرف salomon 11/29/2009, 6:01 am

يا شجرة قد ما عليكي تجنّو
ايادي الشر والأرياح جنّو
ما لازم تنحني قبال الطبيعة
خلودك حق يا شجر لأنّو
انتي موجة الروح السريعة
بمنظر دوّخ ونسمات هنّوا
ركوعك ذل يا شجرة بديعة
لأنك حاملي حلم الطفولة
الشحد عمري قصيدة شعر منّو

بديعة اسم قطعة أرض من خراج برحليون

بحر الزجل

من طرف rabeaa 11/30/2009, 12:09 am

الملّولي .... شجرة عتيقة حد ضيعتنا

شجرة عتيقة مربيـــة اجيـــال
شجرة صمود وجد اســـطورة
باغصانها شوغطـت الاطفــال
من حر هاك الشمس مع نوره
متل الحنوني عنـــها بينقـــال
فيها لعطف بزنـود مغمـــورة
وحتى وفاها نحفــظو عالحال
وتعرف جيال لمارقة حظورة
عملت ساقــها صفحة لقــوال
وغصونها للعشق مســـروره
عاشق بحبـك يكتب ومــوال
للشعر صفت مدرسـة وللـحب
ويلي بحب الحب بــي زوره

من طرف **7arf** 12/6/2009, 6:28 am

شجرة عتيقة فوق المغـــــــــــارة = من تحت منها بيمرقوا المـارة
ع جذعها المتشفلح ومكشــــــوف = حروف الأسامي عاملي غـارة

ومن كثر ماحفروا عليــها حروف = عرّقّت إلها شال ع الطـــــارة
وحيكت من شعر الوفا الموصوف = اجمل قصيدي بغصنها سوارة

وكرمال ماينسى حدا المعــــروف = عنها بيحكوا كثير بالحـــــارة
ألأجيال ربت فضلها منشـــــــوف = بأبجد وهوز مدرسة وبيضــل
يحمي الشجرة مقام ست سارة
============
دستور من خاطرها

شجرة إم شراطيط

شجرة إم شراطيط

رد: شجرة إم شراطيط

رد: شجرة إم شراطيط

رد: شجرة إم شراطيط