عتابا وميجنا في برحليون مشكّلة

حكمة

بشعري فَرحة الَمنبَر وَعيدو
قولو الشّعر من خلفي وعيدو
كيف بينطق بكلمة وَعيدو
شاعر مستحي بحَرفو الكتاب

حكمة

ولك وين رايح بعد ما خلصت منك... إلا إرتاجلي ما بحب قول عتابا . يلا غيمة صيف ومرقت. مين محالك؟

مَرج الَمنبَر بفكري عَبَيْتُو
بشِعِر متشَوّق السّامع عَبَيتو
وَدّو زغير مَنبرنا عَ بَيتو
لأّنو ما بيفهم بالأدب

حكمة
بَعد ما كنت بَدّي ياك خِلّي
تا رَبَّيتَك سقيتَك مُرّ خَلي
أنا معتاد قرص الشّمس خَلّي
يشرق عالدّني وقت الغياب


وهلق تصبح بخير... يلا ما صار شي مهم. بعدني بعزك

حكمة

يللا ما بقا بدّي رصّك. تا نرجع للغزل

****

زعِلتي بْلا سَبَب بستِك فَرِقتي

لِم عا مَفرَق الغابة فَرَقتي

عند ما عتمة جعودك فرَقتي

عن الشّمس البهيّة ما فرِقتي

ما فيكي تحملي بُعدي وفرقتي

وإذا بَدِّك شِعر نَاعم فِ رقّتي

ببَرحليون أحبَابي وفرقتي

بيغَنّو تا تشوفي اللّيل شَاااااااب

أمواجي اذا هجتو فرقتو
بشعري دوّبو السكر في رقتو
وكلما حكمة تغنّي فرقتو
اخطفوها بالمعنى والعتاب

يا حرف الريح من تحتك صفي بساط***وعلى الشعّار معرفتك وحي بساط
ونصيحة كل ما شويعر بكي بساط***وجبلو حروف شبعاني أدب
هههههههههههه


طوني شلهوب

قالتـلــــــــي شفــــاف تمـّك علـّـمونــــــي

الشـّـغف بالحــبّ .. حتـّـــــــى علـّـمـوني

عقــدت شالي عا عنقــي .. عل لامـوني

عـقـــــدة شـــــاش عـا جــرح التــهــــب


بو شربل

انا شلهوب ما اهضمتو واللي يمون***عليه يفهّمو انّو وليمون
ومتل ما بيعصرو الموزة وليمون***بدي اعصرو وضيّف شراب


حرف

بوشربل من حرف صوبك عطر راح = الما قادر ينشقوا دلـــّو ع طراح

وكفي عطيت للشفـتــو عـطـــــــا الراح = تانسمع زقـــفةّ ملـــــوك العتاب
======

ويامغفي ضميرك قــوم صحّي = الطبخ صفا بيبرحليــــــون صحي

الغلط منكن وكل الصح صحـي = كفى ركوب الخطأ تعدوا صواب


طوني شلهوب
قصيـدي لوحتي ومعـروف حـرفـي
امتهن فن الرّسم بالـشـّعـر حــرفـة
وإذا جاهـل هـجـا حرفـي وحـر في
بيـصـفـّـي سـيــف بيقطـّـش رقـاب

حرف

القصيد بلوحتك حامل عطــونــة
العفن من كلمتك نادي عطـــوني
وحرف السيف ماجرّد ع طونـي
انجرح وحدو ان سلّو من القراب

طوني شلهوب

سيف الجهل عــا طوني سلي من؟
يا حرف القافية سليك سلي من
أنا حاكــيـــت شاعرنا سليمــــان
تاري حــرف في عـنــدو دنـب


حرف
قبل ما آخذك بالبحر ع النــــــو
حرف مــــنو رعاع الشعر عنوا
اذا عندك بصيرة سئـــــال عنو
نجم مذنّب بقرص السحــــــاب


طوني شلهوب

إنت مش نجم لكن حرف علـّة
معك غنيـّت هالعركات علـّي
سماك الواطية عالجوّ عـلـّي
علـَّى نجمك وبيضــلّ عـلـّة
بسمـايي نجمك بشوفو غراب


حرف

تاتعرف بالزجل تعرب ضماير
وعّي بجوهر نفوسك ضمـــاير
انكنتوا الشر من يمي ضمــــاير
بيمي رح تضيعوا ع العـــبـاب


كنا مع وحي الأفكار سارديـــــــن
لقيناكن دجل بالشعر سرديــــــــن
تاقطّعكن سمك بالبحر سرديـــــن
وعلى الفيس بوك وزع للصحاب


غيرك ما حدا شعرو معـــدل
قبال اللي سبق سكبو معـــدل
ومعدل ماجبت حتى مع الدل
إسكبلك القهوة والشــــــــراب

يابو صوت متل القعق والبوم
انا مابحب قلب الوج والبــوم
صور ببعثلكن بالطـق والبوم
معبّى كيف صكيـــتوا ركاب

إذا القيـــــــمات ماكنتوا عميدين
لنقد المرتجل صرتوا عمي دين
وجنرال ولوا ومعهن عميديـــن
بدحر جيشهن تـــــــرم الحـراب

============
بقسم الجديد بتكتبوا مش قسمنا
هههههههههههههههههههههههههه

طوني شلهوب
حروف الشـّعر مهما لـوّحـــوهـا
وآلهة الشـّعر ذاتن لو وحــوها
إذا لمعاتنـــا ما لوّحـــوهـــا
ما رح تـتلــوّن بلون الدهــب

=====================

بـشعرك كرجتك كرجة قـنـا عا
الزبالة وفيك عجبـتـنـي القـنــاعــة
الوساخة وحدها بتلـبــس قـناعـــا
كـل مـــا بــدهـا تـقــــلـّـــل أدب

=====================

عـن ألفاظـك البشــعــة تـرقـّــا
ولمرتـبــتي إذا بـتـقـدر تـــرقـّـا
الـكـلـمـة الـمرهـفـة لازم ترقـّـا
وتـخـبزها علـى جرح الـتـهــب

حسن كوتراني

من طيفك يا حلوي شال هبينا
كوى الأعصاب فينا شلْ هبينا
ومتل شلهوب دخلك شلــــهِبينا
متل النار تآكل بالحـــــــــطب

ناطرك

هاني ناصيف

شباب نحنا شعار منحب القسا منحب الطق منحب المرجلة منحب المرجلة منحب القوة بس ما منحب ينزل الشعر لمستوى اللي شفنا
ارحموا الشعر و رحمونا نحنا هون بمنتدى ادبي مع شعار كبار و ما بعتقد لا خينا حرف و لا خينا طوني بيرضى الشعر يصير بمزبلة التاريخ و نمشي بدفن القوافي على هيك حكي
ارحمونا و ارحمو الشعر
القساوي صح بس مش جولة مسبات
يعطيكن العافية اذا بدكن تكفوا بهالمنطق الادب و الشعر ما الن مطرح معكن

بو شربل

يا هاني رقبتك عا النت دلّها***لحتّى لفركة الايدين دلها
واذا بيلقط على المشار ديلها***لخلي الدم يوصل للركاب

طوني شلهوب

خيـّي هاني أنا بحب إتشكرك عا حرصك عالشعر وقيمة الكلمة، خصوصي إنك كنت دايما من أصحاب الإنتاج الشعري الجيـّد. تعليقك كان تعليق إنسان كبير، بهنـّيك.
طبعا ما كنت بنزل لهالمستوى إلا تا وصـّل رسالة وقول إنـّو كل واحد بيعرف يسبّ ويستعمل ألفاظ بشعة ويقلـّـل من إحترام العالم، بس قلال كتير اللي بيعرفو يكتبو كلمة راقية، هالمرّة جاريت حرف عا مستواه، بتمنـّى شي مرة يجارينا إذا بيقدر ويسمـّعنا شعر.
بتمنـّى هالنظرة للشعر تتغيـّر، والنفسيات تتغير، ولمـّا تتغير أنا أكيد ما بقا حدا يفوت بشخصيات مجهولة تا ياخد راحتو بالإهانات وبالتجريح.
ما عرفت شو اللي دفع بالشاعر الكبير حرف ينحدر فجأة؟ وليش ردّ بهالطريقة؟ ما شاف إنـّو الكل عبـّرو عن إستياء من هالنوع من الكتابات وعن أداء هالشخصية بشكل عام ؟

إلا إذا بتعتبرو هيدا تحدّي شريف :


"القصيد بلوحتك حامل عطــونــة
العفن من كلمتك نادي عطـــوني
وحرف السيف ماجرّد ع طونـي
انجرح وحدو ان سلّو من القراب
============"
أنا بعتذر منكن، وإنتو عندكن كامل الحرية تفهمو الشعر والتحدّي متل ما بدكن



هاني ناصيف

بعرفك مهذب انا باسم الشعر بترجاكن و بقول لخينا حرف عملو معروف نحنا عم نقاتل يا شباب تا نعيّش الشعر و ما نعيش الشعر بحذف العين
حاوروا بالفكر حاوروا بالمرجلة حاوروا بالكلام القاسي ضمن حدودو بس بهدلة لاء لا انا بسمحلكن ولا الشعر بيسمح
و يلا يا شباب عطونا عتابا و ميجانا

سودا العباية بس بيضا قلوبنا

بشهر تموز نيزلتي بردنا
و بعشة اب اولجنا و بردنا
و شهر ايلول حبك شو بردنا
و ما كان يحن قلبك عالمصاب

حلوة العتابا بس عاطل صوتنا


بو شربل

القصيد بلوحتك حامل عطــونــة
العفن من كلمتك نادي عطـــوني
وحرف السيف ماجرّد ع طونـي
انجرح وحدو ان سلّو من القراب



هاني انتي عزيز عا القلب بس برأيك طوني معو حق بالتحديد يعلّق عا ها البيت لو علّق عا غير بيت كنت وافقتو بس بيت ما في مسبات


جريّس البستاني قال

بقلّو روح نضّف ها العفوني


والخ

اما بيتك يا طوني ما في مسبات ههههههههههه


بـشعرك كرجتك كرجة قـنـا عا
الزبالة وفيك عجبـتـنـي القـنــاعــة
الوساخة وحدها بتلـبــس قـناعـــا
كـل مـــا بــدهـا تـقــــلـّـــل أدب



انتي طلبت الرأي وانا بطلب رأي هاني ناصيف بالتحديد اييا بيت بينقال والاستاذ حكمة في يعطي رأي وحسون والكل
ههههههههههههههههههههههههههههه


ملاحظة انا بعرف حرف انو كان من باب المونة عا طوني والمزح عم يستعمل ها الألفاظ النابيي بس بنرجع لموضوعنا


ما حدا بيحملك غيري يا حرف
هههههههههههههههه

بتمنى تشوف البيتين والجمال بالتوريي الشعريي
من هيك نزعتوا الجولة ليش ههههههههههههه

سيف الجهل عــا طوني سلي من؟
يا حرف القافية سليك سلي من
أنا حاكــيـــت شاعرنا سليمــــان
تاري حــرف في عـنــدو دنـب


حرف


قبل ما آخذك بالبحر ع النــــــو
حرف مــــنو رعاع الشعر عنوا
اذا عندك بصيرة سئـــــال عنو
نجم مذنّب بقرص السحــــــاب


شي رائع

هاني ناصيف

يا سليمان ما في حدا معو حق
الشعر وحدوا معو حق لا طوني ولا حرف
انا بقول كلمة وحدة اذا بدنا نضل بهالمستوى خلونا ننبش عا شي محل يكتبو شعر


حرف

شو هالكلام ها ؟؟؟؟؟؟؟؟؟؟؟؟؟؟

يااخي يعطيكن العافية كلكن وبشكركن كمان من قلبي اولا
وتانيا هيذي مش مسبات ولاتجريح لانو رغم قساوتها بتحمل طيبة قلب
وانتي ياطوني فتت ع التحدي انا ماطلبتك كنا ناهيين الجولي انا وياويلي عليك
يعني الدكتور ههههههههههههههههههههههههه حكماااااات
بعد ماحذفلي كل شي من الفيس بوك مرتين وكان في تصفاية حساب بيناتنا
فحضرتك دخلت كمان طرف هون الي حق اقسا عليك لانك تاني يوم فتت تتحدا
حبيبي انا لني بحاجي لدروس من حدا ولاكيفية التعاطي ع النت مع الاخرين صرلنا
5 سنين وماحدا زعل من التاني فاذا كان حدا من المصنوفين وماعندو رحابة صدر
مايتدخل بموضوع مش الو وبس يدور الطق ينصنف هاي ماعجبتني منكن بنوب
ههههههههههههههههههه
ولما بيكون انسان بدو يتحاور مع رفيقو بيطلب منو وبيختاروا بموضوع وبيكتبوه
ساعتها بيكون التحدي بالشعر المحضر والمنقح اللي حرف زهقان منو
وانا برأيي ماحدا بيقدر بيعمل شاعر اذا ماجرب كل الالوان
وعلى فكرة الطق مابيقلل من قيمة حدا
بالعكس كل انسلن والو احترامو ومكانتو
ورغم كل شي بعدني بحبكن وبعتذر اذا اساءت لحدا قبل مبادرتو بالإساءة إلي
وانتوا كلكن شعار كبار ومستواكن راق وخلصنا يا اخي انا مابتحدا حدا بعد
وهاي . . عرفتوا شو معناها نقطتين ع السطر هههههههههههه
اخيرا سليمان معك حق ما حدا غيرك بيحملني
تصبحوا ع خير


بو شربل

بسيطة يا شباب ما صار شي كلنا اخوة واللي في شي مش عاجبو من شاعر يبعتلو رسالة ويقلو ما كلنا عم نتسلى من الاحوال الزفت
بربكون خلص بلشو سبو بس يكون بالشعر
ههههههههههههههههههههه
حرف جايبيك
تا فك رقبتك وخلص اذا حدا ازعج منك حقو عليي انا بس والله كانت جولة حلوة لوما شوية زبالي نزعوا العركة
هههههههههههههههههههههههههههههههه

حكمة شديد

حاجي بقا إتهامات. كيف بدي إمحيلك وما معي حق المحي بالموقع؟ وشو أنا كمان محيت الصفحات ؟ يعني كيف بتقول هيك؟ بعدان شو أنا عندي شراكة بفايسبوك ؟ أو مهندسها؟ لي الإفتراء هيك لي؟ أنا بسب يلي صار معك وبعدو عن يصير، حلفت إتبارى مع شاعر ما بعرفو وفايت بإسم وهمي. يعني شو فيها لو عرفنا مينك؟ شو هربان من الإنتربول؟؟؟ هاهاهاها. نحنا بي شو أهناك؟

أنت بتحب النوع يللي بتسميه "الطق" ويمكن معظم مستمعين الزجل بيحبو هالنوع كمان. أنا بالعكس بحب الكلمة يللي متعوب عليها ومنحوتة نحت وفيها رابط مع الأحاسيس الإنسانية مش عا طول خبيط وضرب كأنا بالعصور الحجرية.

لاكن بحترم رأيك ومستعد بكل لحظة شارك بمباراة معك عا شرط توديلي عل الخاص رقم تلفونك تا إتصل فيك وأعرف مينك. ومن وين. مبين بوضوح عندك قلب طيب ومش حقود . بالتأكيد عندك شعر حلو بإسم تاني يعني بإسمك الحقيقي. لاكن لأنك متخفي، قاعد بتسبسب وبتشتم . يا رجل في ناس ما بيحبو هالطريقة بالمعاملة...أنا ما بتيقها. شوف الناس يللي بيحبوها واستعملها معن . أنا شخصياً مني مستعد كون سلة مهملاتك. ساعة بتسميني متعجرف وساعة بتسميني عنطوز. لي كيف عرفتني هيك؟
عنجديد، إذا بتحب ، أنا مستعد أعرفك بشخصيتك الحقيقية وبتشرف بمعرفتك وعفا الله عما مضى. بس مش بهالطريقة الغلط . أنا تباريت معك إرتجالي عتابا تا تعرف والناس تعرف اني ما توقفت عن التباري معك لأني مستهابك شعرياً. أنت بذاتك بتفهم بالشعر وشاعر وبتعرف مستوى شعري وقدرتي بينك وبين نفسك حتى لو ما اعترفت بهالشي.
بكل محبة بقلك كرمالك وكرمال هالموقع الراقي، وقف هالتضرفات الشواذ هيدي. وناطر إذا بتحب، توديلي اسمك ومن وين ورقم تلفونك وأنا بتصل فيك من هون بكرا. وهيك منبلش صفحة جديدة.

سلامات

علي
اذا دمعك على جمعه حبا لي

ونهيدي والوفا الرحمه حبا لي

شرط لا يزرد قناعك حبالي

ع زند الشوق ويجنّو الحباب

بحر الزجل بو شربل

يا حرف سماع منّي بدون منّي***ولا تتهم حكمة بأسلوب فنّي
بأنّو حسابك بفيسبوك عطّل***انا ما بعتقد حكمـــــات ...هنّي

فوتو وشوف بالموقع ..تفتّل***زجلنا صار فوق النت جنّة
وألك بالفضل يا حرف المبجّل***عملت النت أفضل من مغنّي

واذا أنطون منّك ما تحمّل***عطوني فوق طوني كب عنّي
شي كيلو رز وشوية متبّل***وتعا يا صاحبي حكمـــــات هنّي

ولأنّو المنتدى عنّا مشكّل***في أسود أزرق ونيـــلي وبنّي

في ناس الطق بتحبّو مبكّل***وفي ناس بتعتبر أنّو تجنّي

وانا ما كنت بالموضوع بقبل***أنّو ينمحى كلمة لأني
حريص على الزجل تا يصير أجمل***وما بدنا شعر هابط بالتدنّي

انا زعلان من طوني وبسأل***ببيتو ليش ما بينحط أنّي
زبالة قال يا حكمة تأمل***وقمتوا عا الحرف من حيثو طقّو
بسيوف الفن وشفار الأسنّي

ههههههههههههههههههههههههههههههههههههههههه

شباب اللي بدو يجاوبني يجاوب شعر رجاء اذا كان من رأيي أو رأيي الأخر نحترم جميع الأراء

بحر الزجل ومدير منتدى برحليون
سليمان طراد