موضوع : سرعة و هدوء "رواد شرف الدين و ابراهيم ياسين&quo

من طرف rawad 9/18/2007, 6:04 am

نحنا بعصر سرعة ما فينا نجهلو ...... والعمر عم يركض ركض من أولو

ولازم نلحق حالنا نانحصلو ...... ونحصد مواسم بيدرو وما نهملو

بسر الهداوة تأمل الجو الحلو ...... تأنّى بتسلم هالمثل لا تخذلو

بسرعة وهداوة اليوم جايي خيّرك ...... نقي شو بدك منهم واكتب الو

من طرف IIbrahim 9/18/2007, 6:51 pm

يا شعر.. لو ولّى زماني بعد جيل..------قدّيش بدّو يحرجك خلفي البديل!

و يا ابن شرْف الدين بس حمّي الفتيل------لا ترفع الخنجر بوجّ السكسويل

و موضوعنا ان شفتو ملوّح بالأصيل------اتركلي هداوة موج عالشاطي الجميل

و من شفقتي عْليك و عا ضعفك يا هزيل------بعطيك سرعة "لكسز" و ابجر أصيل

حتى عا تلّ الشوف تقدر يا رواد------توصل إلو هربان.... ما توصل قتيل

من طرف rawad 9/18/2007, 9:41 pm

لا تشوف حال بسكسويلك يا بري ...... بتضل أقوى كتير سرعة خنجري

وسرعة البرق بتشلح الغصن الطري ....... لا تكون أطرى من الغصن عا بيدري

برجع شهيد ومش هريبة بأبجري ........ بصاروخ عم يوصل لحد المشتري

وسرعة أصيلي و لكسز علا منبري ....... سرعة رصاص بوج أكبر مفتري

لا تكون موجة هادية قبال البحور ....... اعصارنا عالشط عم يبري بري

من طرف IIbrahim 9/19/2007, 7:14 pm

يا موج إعصاري جنونك ما شفي------و مهما جرايم تطبع و ما تكتفي...

بعدو الرواق بكفّ قبطان الوفي------بيروّض بهالبحر أسرع عاصفة

و يا حضرة البرق اللّي جايي مْجازفة------و نازل على الغصن بنوايا خاطفة

ليك النسايم بالهدا..بالحفحفة------مش بالكلخ... بتشيل ريحة مهفهفة

و تا ليك نرجع يا شهيد المعرفة------مش بس لو صاروخ جابك للنفي..

لو جيت عا صْواريخ بدّك بالكفن------عا مهل تتنزّل بحفرة مجوّفة

من طرف rawad 9/20/2007, 8:58 am

بتمرق على الاعصار موجة عابرة ....... لما بيبعتها الاه المقدرة

غضبان عا خلقو الشايف شو جرى ........ العايش عامهللو عالّعب والمسخرة

هيدا حساب الناس قبل الآخرة ....... مجبور تسرع تا تلاقي المغفرة

وسرعة الموجة القاهرة عالباخرة ........ بسرعة الرب بأخذ روح الكافرة

دفنّي عامهلك قمح من بعد الثرى ....... بسرعة بضيف علا السنابل جوهرة

وعا سرعة النيران حولني رغيف ....... تا تطعم الأيتام خبزة مقمرة

من طرف IIbrahim 9/22/2007, 5:57 am

مهما يا موج تناطح و تفلش أنين------مدفن الصخرة ناطرك عا شوار طين

و عا سيرة التوبة و خلاص المؤمنين------سْماع الجواب الحق يا معتلّ دين..

مش يا ذكي... بسرعة شرارة بانزين------بدو الإله يعدّك من التايبين

بدّك عا مدّ شْهور.. أو يمكن سنين------تْكفّر ذنب,تمسح دمع,تندر يمين

و يا قمح مستعجل عا تم الجايعين------انت و عا درب الخبز جرّب يا فطين...

تْبرّا من الصبر و تأنّي المطحنة------تا نشوف مين بياخدك صوب العجين.

من طرف rawad 9/23/2007, 10:38 am

الله بسرعة بياخذ الوج الشحوب ......... انكنك شحوب الوج لو بتقدر هروب

المؤمن بسرعة بيركض يلاقي الشعوب ...... ويفتح بيوتو متل ما بيفتح قلوب

مش بالضرورة عالهدا يكّفر ذنوب .......وينطر سنين من الشروق على الغروب

ومش مشكلة بصبر سنة بين الحبوب ........ وبعمل متل أيوب وبسرعة بذوب

وبكرا بوقت الحساب تمحاية عيوب ....... لو كنت مش تايب يا بن ياسين توب

ويللي بيسرع تا يلاقي ربنا .......مش متل يللي عالهدا قاطع دروب

من طرف IIbrahim 9/24/2007, 6:23 am

لو شفت وجّي شاحب و جرحي غميق------لا تقول صار مْودّع و ظرفو دقيق

هاي فرصة الخالق تا فيي بْلعت ريق------و يعيفني دولاب روتيني طليق

و راجع عا مهلي حساب عا ذمّة رفيق------و عيد بتأنّي نظرتي بهاك الصديق

و صبر الخوابي لو لبس طبع البريق------ما شعشع بكاساتنا نبيد العتيق

و بْمسألة قطع الدروب بوقت ضيق------لو ما "أبو شنكل" عا إيدك يا رشيق

تعلّم السرعة بالهجوم و بالهروب------ما كنت رح بتْخرّجو قاطع طريق.

من طرف rawad 9/24/2007, 9:20 pm

بسرعة بديهة بجاوب بليل الغوي ....... وسرعة جوابي بسرعة هبوب الهوا

تلاميذ عندي الكل نفس المستوى ....... و أنت وبو شنكل في لكم عندي دوا

الطالب عا ايدي بسرعة الحفظ استوا ........ وبسرعة التسميع بيعلّي اللوا

لكن بو شنكل صار من بعد النوا ...... يجرص اساتذتو اذا بحالو انزوا

لا تكون متلو انت ما عندك قوى...... وتتمهلو عادرب عمرو ما التوى

اللي بيسرع بطرقات مدرسة الحياة ....... هوي وقاطع درب مابيمشو سوا

من طرف IIbrahim 9/25/2007, 9:21 pm

الإستاذ و التلميذ عين قْبال عين------و تا يفلحو بالصف بدنا من التنين...

إستاذ يشرح عالهدا بالحصتين------و تلميذ هادي مش لسانو شفرتين

يعني الهداوة فضلها مش حبتين------بعلم و تعلّم ما بتنسى الحالتين

و يا ابن شرْف الدين جايي بأيْ عين------تحاضر عن السرعة و شرارة عجلتين

و بعدو صدى الحادث مْدوّي يا حْنين------من شي شهر عالدّرب لِم كنتو اتنين...

لو توصل الدعسة على زرّ الفرام------عالشّوربا ما بْقيت عايش جمعتين!

كل الشكر للأخ الشاعر رواد شرف الدين على هالحوار بتمنى تكونو استمتعتو معنا

لهون... و اعذرونا على الختاميات بسبب بعض الإنشغالات

إبراهيم ياسين

من طرف **عمار البراضعي** 9/25/2007, 10:04 pm

الله يعطيكم حقيقة العـــــافية ... ع حروف فوق الصم بترد البذار

تنيناتكم صرتوا ملوك القافية ... وشكرا حقيقة كان ممتع هالحوار

من طرف rabeaa 9/25/2007, 10:38 pm

البركي ملوك بيتجلو..وزيادي الكلمي حلو

ويلي قاري هالموضوع ...كتير تمنى ما يفلو

من طرف salomon 9/25/2007, 11:31 pm

رواد أبن الشاعريي الما كبي......وبرهوم شاعر فاق قبل الموهبي

وممنوع يدخل منتدانا عابرين......نحنا ملوك المنتدا وأم الصبي

تحياتي للشعراء يا هيك الشعر يا بلا

موضوع : سرعة و هدوء "رواد شرف الدين و ابراهيم ياسين&quo

موضوع : سرعة و هدوء "رواد شرف الدين و ابراهيم ياسين&quo

رد: موضوع : سرعة و هدوء "رواد شرف الدين و ابراهيم ياسين&quo

رد: موضوع : سرعة و هدوء "رواد شرف الدين و ابراهيم ياسين&quo

رد: موضوع : سرعة و هدوء "رواد شرف الدين و ابراهيم ياسين&quo

رد: موضوع : سرعة و هدوء "رواد شرف الدين و ابراهيم ياسين&quo

رد: موضوع : سرعة و هدوء "رواد شرف الدين و ابراهيم ياسين&quo

رد: موضوع : سرعة و هدوء "رواد شرف الدين و ابراهيم ياسين&quo

رد: موضوع : سرعة و هدوء "رواد شرف الدين و ابراهيم ياسين&quo

رد: موضوع : سرعة و هدوء "رواد شرف الدين و ابراهيم ياسين&quo

رد: موضوع : سرعة و هدوء "رواد شرف الدين و ابراهيم ياسين&quo

رد: موضوع : سرعة و هدوء "رواد شرف الدين و ابراهيم ياسين&quo

رد: موضوع : سرعة و هدوء "رواد شرف الدين و ابراهيم ياسين&quo

حلووووووو كتير