ختام بين عمار وسليمان

قصيدة سليمان

يا موقع بعد ما وقعت حالي.....بحبك صرت عن اسهر ليالي
رجع فيي حنين الشعر زهر.....حلم عاخدود صخرة من خيالي

انا بالغرب شفت الموت احمر.......نحت بغربتي صخرت نضالي
وكسرت اليأس وتعلمت اكبر........ونجحت بغربتي وبيي دعالي

انا لاتظن أيياتي محضر........انا ملكوت رب الإرتجالي
وإذا شي يوم عا المنبربنحضر ...... كلامي ثبت المعنى بمقالي

شي عشر سنين صرلي وقول أكتر.........ماكاتب بيت هالموقع وحالي
لمحت ال منتدى وقلبي تحسر........قلت مفروض ابعتلكك رسالي

بعد ما شفتك شويعر زغير.....وبنات الفكر عمتطلب حوالي
وتفرفك دينتك تاتصيراشطر.......ويرجع مجد شحرور الفغالي

غطاسس بحرنا تاتصير اشعر........وتخلق صورة الشعرالخيالي
تعا يا جاحد النعمة تزكر........تراب الغدر بعصور الخوالي

عندما ربنا بلكون فكر ..........قعد عاصخور كانت عمتلالي
صفن بلكون مدي وجاب مجهر........لمح غبرة نسيم وقال هالي

ونفخ آدم بكمشي وصار بيدر......وقلو بشرط ماتخالف قوالي
وبجنة من العدن عاش وتمختر....وحوا شال من ضلع الشمالي

ولأنو ترابك من الغدرمجبر .....قلك شو جرى ويرتاح بالي
طمع آدم حلم تايصير اكبر.....وأكل تفاحة الغلطة بجهالي

وغضب رب السما ومنو تزمر....وبعتلو تراب تا صرنا فعالي
ورجع قايين مع هابيل سخر .....حياتو للجريمي ولامبالي

ومحمد راح عا مغارة تافكر.......نزل جبريييل أوحى بالرسالي
وبجبلة إبن ملجم إنت أخبر........غدر بكربلا والدم شالي

ويضاس الجبلتو من فرد مصدر.......سلم ربنا ببوسة رزالي
هيدا ترابك لمنو بنحزر.....تراب الأجنبي تراب العمالي

إجا يسوع يفدي شعب اكفر....وعطا مار بطرس بإدو كفالي
وقلو كون صخرة حق نفخر.......عاشرط تضل تحكم بالعدالي

وقلت إنو السياسي هم تشكر......وما بدنا نهين اصحاب المعالي
لكن في حقيقة وعيب تنكر........بإنو جنوبنا عا القلب غالي

إجا نحآت روما النحت طوور......نحت صخرة جميلة وما بغالي
ما جاب تراب من جهلك محفتر.......تاينحت تحفة العصر لمثالي

وتانرجع للوطن يا نبع كوثر......ماكنت بتنشرب أو صرت حالي
لوما عا الصخر قلبك تفجر.......دموعك سقسقة من جرد عالي

قلت إنو الدهب بالأرض يطمر......وعشر تيام تنكش عا التوالي
وعا وج الصخر لوماالكنز يظهر......بتاج المملكة ما صار غالي

كفا يا تراب تنقل حلم اصفر........كفاك تجن بفقد إعتدالي
وسهل بقاعنا ما صار اخضر.......تاغطا وجك بلون الدوالي

واذا بضياعنا بتحب تسهر........شوف بيوتها البننور هالي
مافي ولا بيت عا ترابك تعمر.....عاصخر الصم بنيوها الأهالي

أنالصخور الطبيعة إلما بتخسر ......بوجه الريح واقف ما بالي
وتراب الغدر كل ما الجو أمطر .......صدى الوديان بتلملم حقالي

أنا خدود الصبايا وصدر مرمر .......تمرمر قد ما بتقدر قبالي
وتاتعرف شو أنا يا تراب إحزر.......أنا كنوز الطبيعة بحضن الله
وانت تراب فوق تراب بالي
..................................

عمار قصيد

خلق عمار كار الشعر كارو ... ع سطح الارض بالزرقا فكارو
ربي اسمو بأرض العبقرية ... واعلى من السما بنيان دارو

خلق بالجسم متل الأنسانية ... لكن ماحدا بيعرف سرارو
وروحو من اله الشاعرية ... بعكس التاجرو وع الشعر جاروا

ولأنو عاش بالدنيا الدنية ... بيت الشعر مش عايز حجارو
خلق من تربتو الحمرة الوفية ... وزرعها خير قافة بإبتكارو

وانت ياصخر معنا بهالقضية ... ياناكر فضل عمار وعمارو
ابكم صرت اطرش ياخوي ... وعقلك جامد وضايع قرارو

انا تراب اللي عاطي جاذبية ... وعن مسار السما فاصل مسارو
بمداري عاشت الناس الهنية ... مش ع صخرك وكوكب مدارو

أنا ترابي تراب المعنوية ... تراب اللي حضن أشراف صاروا
شرب من سحبة الغيم الندية ... كبير القوم تايطعم زغـــــــــارو

ومهما تقشع جبالك علية ... وباسق صخرها وشامخ وقارو
لوما يحضنا تراب المنية ... الجبل بيروح وبيزحل أثــــارو

وارز لبنان وشلوحو الابية ... ع صخرك مازرع مرة شجارو
انغرس بتراب فلسفتي الزكية ... ومن تراب العاكعبو المجد زارو

وحبة قمح ع صخور القوية ... الموسم صعب تاترجع بذارو
لكن ع تراب العــــاش فيي ... الحبة سنبلة بتعطي عيـــارو

وانت ياصخر وجمودك خطية ... الورد مش فيك بيفتح قمارو
ولا البستان من صخر الأذية ... بيعطي للبشر روعةّ ثمارو

وعلى تراب الزكا اندعست صبية ... زرار الورد ع الدعسات غارو
وعلى حجارك اندعست مستحية ... ماشهق الورد أو قــــدم زرارو

وسدقني اذا بعدّ البقيــــــــة ... بخاف الصخر يعلن انتـــحارو
انا بيي رحل راضي عليي ... وقبل ماغاب دشرلي خـــبارو

موصي الارض نكشها بديي ... وعللي سياجها وإحفــظ قرارو
وهيك مشيت وتبعت الوصية ... تاحافظ ع الجمال واخضرارو

وانت لاتقول راضي نهار بيي ... وتركت الارض ومسيب ديارو
عشر سنين بالهجرة كفية ... تعود تشوف وين الاهل صارو

وقبل مااختم بقلك ياخـــــــيي ... تافيك الشعر يقشع انتصـــــارو
أملنا تعود والعيلة سويــــــة ... جارك بالوطن تايشوف جـــارو

لأنو انطالت الغيبة الشقــــــية ... وصخر العــــمر علالك جدارو
العمر بيمر وبتوقع ضحــية ... وياكوم حجار فقش حجار ترجع
وعمرك منتهي وخالص مسارو

..........................
سليمان ختام قرادي

جينا ضيوفك ما بننلام ...وعا محج الكلمي تانحج
وبكرة جايتنا الإيام...وبنتعرف وج بوج
لاتزعل وجهت سهام...الكلمي عليك وطبعي فج
لازم نكتب مسك ختام ...صدقني شغلي ؟لاتلج
مسافر متل طيور حمام...إرتاح ويمكن لح بج
صرلي شي اربع اعوام ...شغل بشغل ومش عمنام
تعرفت عليك ويا ريت ...بردة شعر تودعنا
......................
عمار ختام قرادي

تعرفت عليي ومـــــــــــازال ... ع محج الكلمة جــايي
أهلا وسهلا بهيك مجـــــال ... شعرك منعدو آيــــــة
وطبعك فج قبالي عقــــــال ... سهامك وجهت الغاية
سهمك صاب القلب ومـــال ... وقعنا بالحب كفايـــــة
وموسى عن بو شادي قال ... مراية بقبال المرايـــــة
وعنا بيقــــــــــــــــول القوال ... نجوم تنين مضــــــواية
وحتى إختم هــــــيك جدال ... تشرفنا وفي توصايــة
لو مهــــما كثروا الأشغـــال ... انطولت الغيبة منـحس
غيابك بدو يلوعنا

......................