جايي من موقعي يا براضعي

من طرف salomon 3/22/2008, 9:43 pm

تفضّل يا أبن براضعي تا تندعك***سليمان جايي يحسم الموقف معك
أسست موقع بالزجل تا أقنعك***أنو أمير الشاعريي موجّعك
خمسين مرّة عن المهرة موقّعك***وما لقيّت شاعر فوق منها يطلعّك
جايي أنا ومن موقعي البعدو جديد***أسقي زهور العبقريي بموقعك

من طرف **عمار البراضعي** 3/26/2008, 8:23 pm

الزهر البعطر الأرتجالي عم يضوع = بيشبعّك كلما لقتلاتي تجوع
انكنك أمير الشاعرية والجموع = بتشوف آخر حرف طاير بالرجوع
وأمي بردك لا امير ولا ربوع = وبموقعك بطفي عيونك والشموع
ولو كل فارس في الو كبوة ووقوع = عمار ع راسك دعس وقت الطلوع
وزهر اللي شبعتو الندى بالموهبة = مش عايزك بعد البكي تسقي دموع

من طرف salomon 3/28/2008, 7:03 am

عمّار ليشك عم تقلل أحترام***وانتي بتعرف صاحبك عندو مقام
يا بو أسامة الشعر غير الأنتقام***وحرب التحدي عز والمعنى سلام
تركلي دموعي بموقعك تسقي الخزام***تركلي دموعي حبر عا شفاف القلام
جايي انا كلما بتشعر بالعطش***أسقيك روح القافيي ونبع الكلام

من طرف **عمار البراضعي** 3/28/2008, 5:21 pm

سليمان ليش من الحقيقة بتنجرح

اللي خيالها من طيف فكري مابرح

عمار عن دمعك اذا بشعرو شرح
إلا بوحي الإلهام فكرو ماسرح

وكلما شي قتلة يقرطك بالمعركة

بتبكي إلو وبتقول دمعات الفرح

من طرف salomon 3/29/2008, 11:03 pm

خيّبت ظني فيك فكرّتك بشر***تاري جنونك وحشني وسم انتشر
عمّار طبعا بالشعر ما بنحشر***بتعرف صديقك بالوحي الغيّمي عصر
أن كنت جايي تذلّني بالمختصر***بتشوف راسك قبل ما تحكي انكسر
ومتل الغيوم العاليي فوق الجبال***كلما دموعي بتنزل بيطلع شجر

من طرف **عمار البراضعي** 4/1/2008, 2:49 pm

الشجرة اللي سقيوها دموع بتنحني = وشجرة اللي سقيوها دماء بتغتني
خليك ابكي ضعفك وشو همني = مليون حبة بتنحني للمطحنة
جنوني جنون الشاعرية بموطني = جنوني جنون العبقري بشعرو الغني
ودمعك شفت ضعف العلامة بالجبان = المحتاج يشحذ من حروفي ومعجني

*************

من طرف salomon 4/1/2008, 9:56 pm

تركني دموع تغسّل الدم السلى***وما كون مجرم حرب راسي بالفلا
يا مفتكر أنّو الأعالي للعلا***عندك عروش وعاليي بظلم وبلا
المغروم بالأزهار وخدود الحلا***بيحني تا يسقي الورد راسو ما اعتلى
ومجبور راسك ينحني لربك كمان***أن كنت يا عمّار بتحب الصلا

من طرف **عمار البراضعي** 4/2/2008, 2:35 pm

سليمان إقنع حاج تبكي وعيب هيك = تفكر تزق البحر في دمعةّ دويك
كثر الدمع خلاّ الغباش بعينتيك = بتشبه دموع التمسحة بعيون بيك
ومني لاتهرب كل ماقربت ليك = ولاتقترب للدين يرحم والديك
أفضل طريقة بالديانة لقيتها = إحني ع نعشك عند مابصلي عليك

*****************
وسلامة قلبك virus

من طرف salomon 4/3/2008, 3:53 am

دقيّت بالألهام تا يحس الوحي***وينزل مع الأبداع عاالراس الصحي
يا بو أسامة سماع منّي وانتحي***ما في طيور تطير فوق جوانحي
يوضاس قبلك باعني وعارو محي***وانتي يا توما القافيي عا مسرحي
لمّا عرفت أني ألهك بالزجل***قررت تحني فوق نعشي وتستحي

من طرف **عمار البراضعي** 4/3/2008, 3:43 pm

الاإلهام من رب السما اللي منعبدو = بينزل وحي فينا بصورة منوجدو
وكثار متلك بدلةّ الزور ارتدوا = وتشبـّهو بعيسى وبنهجو ما اقتدوا
خليك عم تبكي الدرب لا تحيدو = عيسى اندفن هيذا حكي بستبعدو
عيسى بسما الزرقا سكن جنةّ خلود = الكفار ما فيهن محلو يقعدوا

***************

من طرف salomon 4/3/2008, 10:23 pm

عمّار حاجي حس فكرك تخدعو***الألهام مش بطيخ حتى تزرعو
الألهام بالأبداع همّو ومطمعو***الألهام نازل تا القصايد يطلعوا
وعيسى المسيح القام شولّي رجّعو ***يظهر على تلاميذ خافوا وضيّعوا
ولوما نزل عا الأرض يسوع المسيح***ما كان لوّن شك توما أصبعو

من طرف **عمار البراضعي** 4/4/2008, 3:56 pm

مزبوط توما كان ايمانو شحيح = مَــّنـو مآمن بالطهارة والمسيح
لكن بعد ماشاهد كفوفو منيح = آمن وصدّق واهتدى بنهجو الصحيح
ولما يهوذا تجسد بمتلك قبيح = قبرو بحشت ع منبري تا إستريح
انكنك نبي للشعر إظهر قوتك = واعمل عجيبة ودحرج حجار الضريح

***************

من طرف salomon 4/4/2008, 10:10 pm

دحرجت صخر الجهل وبنيت الجسور***وما ضل عندي بمنتدى الكلمة قصور
وما زال ناطر ربك بيوم الظهور***خليّك صاحي بالحواس وبالشعور
وأمّن يا توما قمت من بين القبور***ولا يضل شكك قاتلك متل الغرور
ربك أنا بالمنتدى و نسر الزجل***ما بيقبل يقد المراجل عا الطيور

من طرف **عمار البراضعي** 4/5/2008, 2:15 pm

شو هالكلام بدون حجة وإقتناع = نسر الشعر ما هز في جو البقاع
وتوما الزجل عمار درو بكل قاع = وغيرو بعد ماشاف ع المنبر شجاع
أمنت لم غنيت ع منبر سباع = وشو عاد بدي بالثعالب والضباع
المن موقعو جايي تاينزع موقعي = بنزع بركتو بالهجوم وبالدفاع

******************

من طرف salomon 4/6/2008, 2:56 am

يا بو أسامة بعرفك قدرك كبير***وموقع زجلنا ما ألو صدّق نظير
وما زال جايي بالمحبة أستشير***وأعرض عليك تكون بالموقع مدير
أنتي وأنا توم المنابر عمندير***مواقع زجل تا نشجّع الجيل الزغير
عمّار وسليمان ملكوت الزجل***والشعر أبن المعرفي وبيّ الضمير

من طرف **عمار البراضعي** 4/7/2008, 7:25 pm

لوما تحدى طراد إبن براضعي = مات التحدي ووزعوا بأسمو النعي
من هيك يارفيقي الرح بتبقى معي = شعر بسما الالهام عنوانو الوعي
المنبر ع مدح وذم للعالم وِعي = وانت وانا بكل موقع نجد السعي
تانزقم الأجيال زوادةّ ضمير = من المعرفة اللي بموقعك وبموقعي

********************

من طرف salomon 4/7/2008, 10:17 pm

يا موقع الأبداع عندك واسطة***من كفوف عمّار الكريمة الباسطة
ويا براضعي سليمان عا دروبك خطا***بيطلب سماح بحقك ان مرّة خطى
مش كل مارد مارد ان مهرة امتطى***ولا كل عنتر قافية بشعرو سطا
حروف المواقع قمح عا بيادر زجل***نقّوا من الأبداع والكفوف العطا

فرخ قصيد

يا موقع الأشعار نيّالك***سليمان مع عمّار رسمالك
فتحو التحّدي ودوّروا الموتار***تا بموقعك تكبر بأزجالك

سرقو الحكي من غيمة الأفكار***وشتو قصايد شعر عا جبالك
وخلّو المواقع عا خطوط النار***تشحد حروف وتسهر قبالك

ويا موقعي يا حلم واقع صار***قديّش رح أتعب عا أعمالك
منشان نبقى بمنتدى عمّار***قررت عمّدموقعك بالروح
واتقمص على النت كرمالك

من طرف **عمار البراضعي** 4/8/2008, 6:44 pm

ياموقعي نيالك بأجمل جُمل = مفرّق بتعطي للمجد منها جمل
نص القمر ضليت فوق المحتمل = ونصك التاني بموقع رفيقي اكتمل
لا كل شاعر جعبةّ جروحو دمل = وأعطى رغم الظروف او حكم العمل
لكن انا وبو شربل قهرنا الظروف = حتى مواقع شعرنا صاروا الأمل

**************

قصيد

سهرت ع موقعي المافي مثيلو = سهر دكتور بيداوي عليلو
ومعي سليمان شاعر أولاني = طبيب البنّج الكلمة بسبيلو

كتب في موقعي أجمل غناني = لحتى صار للشاعر دليلو
وفتح موقع كأنو فرع تاني = طبق الأصل عن صورةّ اصيلو

وعطى من كثر ماكاتب معاني = زوادي لجيلو وغير جيلو
وأنا جميل الوحي وافي بزماني = بس جميل بو شربل حقيقة
نشالله بموقعو بوفي جميلو

************************

من طرف **7arf** 4/15/2008, 7:30 pm

يابراضعي انت وصديقك إقنعوا = بالموقعين قبالي حرف بتركعوا

وخياط رح ودّي بعد جمعة زمان = ينزل درز من موقعك ع موقعو

===========================

من طرف salomon 4/16/2008, 4:23 am

شو صار يا عمّار عم اسمع وزيز***قلّو لحرف يرتاح او يسكت بليز
المدروز صدرو بالرصاص وبالنبال***بالكاد يقدر بالكوي يهدّي البريز

خيي حرف لا تزعل اكيد شاطر بالكوي اكوي وتعلم كيف بيطقوا الرقاب هههههههههههههههه

من طرف **7arf** 4/16/2008, 6:24 pm

مازال بدك للأجانب تلتجي
متلك متل عمار صاير بلطجي
لا بّور فافور por favor وبليز بعد بينفعوك
تايعف عنك حرف لازم ترتجي

==============
cheers

من طرف salomon 4/16/2008, 10:37 pm

فعل الرجا بالدين نعمة وألتزام***ولا البنجور bonjourبتقدر تقلل مقام
<وبالبون ديّيا>بصبّحك شو همّني***اللّغة انعطت أجمل وسيلة بالكلام

تعلّم خيي حرف العلم مش عيب ولا تكون شرقي متعصبههههههههههههههههه
اعطيه خيي عمّار حبة ضغط ههههههه

من طرف **7arf** 4/17/2008, 5:50 pm

ناقص بعد تاتجيب عبري ع السطور = وتنسى زجلنا ولغتو من بلادنا
وتنسى مافيك تعبّر وتوصف شعور = إلا بلغةّ أهلنا واجدادنا

من طرف salomon 4/17/2008, 9:17 pm

حلوووو

بالمخل والمعدور ما بيفهم حدا***وجدك وجدي غير جيل الي ابتدا
كان الزجل مهمول متل الفلكلور***ولوما وجود النت ما في منتدى

ههههههههههههيا حبيب القلب العصر عصر التقدم تقدم يا حرووووووف
وبعدان خيي حرف بتمنى تنقل ها القتلي عا الموقع التاني بركي حدا بيحن عليك وبيشفع فيك ههههه

من طرف **7arf** 4/18/2008, 3:04 pm

شو نفع بيل غايت المبرمج ع عجل = من دون شعر المنتدى كلو دجل
ولوما حملت فكار جدك من زمان = ماعرفت تكتب كنت بيت من الزجل
================
ياريت بتقلي اسم الموضوع لأني عم فوت فتش عندك وما عم لاقيهن تاشمت الناس فيك
ههههههههههههههههه مش تايحنوا عليي حرااااااااااااااااااااام

من طرف salomon 4/18/2008, 10:29 pm

[ندعوك للتسجيل في المنتدى أو التعريف بنفسك لمعاينة هذا الرابط]

والتاني هيدا

[ندعوك للتسجيل في المنتدى أو التعريف بنفسك لمعاينة هذا الرابط]

جدي عطاني خيوط لكن ما غزل***والشعر كان بعصر جدك مبتزل
وقلّي اذا غلطان يا حرف الخجول***أن كان جدك متلك بيكتب غزل

جدي وجدك كانوا ملوك***بس القصة يا عيوني
بعصرن ما كانو يخلّوك ***تشبّه صدر بليموني

شرّف انزل عا الميدان***وكول كفوفي بالجملة
ويا حرف الكلمة الفهمان***ما بتقدر تحمل حملي
جدّك كن يعبد رحمان***وأنتا عبيّد العملة
وعمّار وخييو سليمان***ملوك قوافي الموزوني

اعطيتك الرابط اذا بتحث حالك بدك تتبهدل فيك ما تفوت لأنو ما رح حدا يعف عنّك ابدا ههههههههههههههههههههههههههههههههههه

من طرف **7arf** 4/19/2008, 2:59 pm

جدي إلو أبيات روكز عاجبة = بس الدهر مسكين كان معاكسو
وبالشعر عيني ماعتليت ع حاجبي = مازال جدي كان جنب مأسسو

*****************
جدي وجدك ذات عصور = غنوا الحلوة المزيونة
ونحنا تغنينا بصدور = ومتلن ماعنا مونة

بدك انزل ع الميدان = بنزل تا كسّر راسك
من ضعفك لكن خجلان = حط قياسي ع قياسك
انكنّك بعدك مش عرفان = وسكران مقفي كاسك
من عمار من سليمان = مية ما بيقدوني

كنّك مفكرني بخاف من حرب الأعصاب روح لعاب مع عمار مش معي رح طعوج حديدكم وحديد البيشد ع مشدكم

من طرف salomon 4/19/2008, 10:57 pm

سليمان

تخايلت جدّك سامعك شو عم تقول***تا كان يقصف عمرك يقول استحي
بعصر القديم الناس مشيت عا الأصول***وعصرك يا حرف الموهبي سابق جحي

جدي وجدك كانوا ملوك***بس القصة يا عيوني
بعصرن ما كانو يخلّوك ***تشبّه صدر بليموني

روق وذوق ولا تحتد***بوجّي صوتك لا تعلّي
بخلي راسك قبل العد***يبوس سيوفي المنسلّي
ومن عمّار بتسمع رد***ومنّي بتسمع يا دلّي
ولمّا يبّلش معنا الجد ***برصك متل الزيتوني

جايي من موقعي يا براضعي

جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي

رد: جايي من موقعي يا براضعي