رسالة ...

تسلم خيي علي من لطفك
وللحفاظ على الأرشيف انقل الردود والتعليقات

Rabih Al Lahham اسمحلي إهديك هالرد على ردتك الجميلة و بتمنى كون على قد الرد:

بدل القلم هيّيلنا أفكار
من صوتك الصدّاح نسمعها
الكلمة عنب ع بيدر الخمار
دمعة حلى من الكرم دمّعها
و الحرف نسمة عمتقول اسهار
ت نجوم ليل الشعر نجمعها
و نكتب قصيدة بحبر من أزهار
ع صفحة الوجدان نقشعها
و العنصري مننساه و الغدار
انكان المحبة يوم وجّعها
خيي إنت موهوب يا عمّار
و عندك قوافي مزينة بالنور
نيسان بالأطياب لمّعها
الخميس، الساعة 07:07 مساءً‏ · إلغاء إعجابي · 6


الشاعر عمار البراضعي حلو خيي ربيع يسلم قلمك وفكرك
==================
طليت ياجــــــار الهنا بـهالســـاح
من بعد ما الدمع بيراعي ســـاح
وصارلو عمر عم ينزف ومــــاقل
يغذي فؤادو الفكـــــــر والأرواح

وجدنت كلماتك بزهر الفـــــــــل
العبرات وقفت والعين ممــــراح
وع غروبنا كلما الربيع يــــــطل
مننشق عطور القافية الفـــــواح

ولما السما مايضل فيها ظـــــل
والشمس تسطع ع الكرم برتاح
تاتستوي حبوبو وبكركــــة ضل
ونخب المحبة نسكبو بقــــــداح

وملكوتك الليلة علينا حــــــــل
بقلبو محبة وعلم فكرو ســـلاح
حتى بسما الإلهام نوجد حـــل
ماكان فيي بفرد جانح طـــيــر
لوما لقيتك حد مني جنــــــــاح
الخميس، الساعة 07:42 مساءً‏ · أعجبني · 6

Rabih Al Lahham سلمت ملافظك يا إستاذ عمار:
يا جناح طير الفكر طيّرنا
شمس الحرف بالنور غامرنا
خلّي السما ملعب لَ هالفكرَين
و الطير عم يحسد حناجرنا
إنت و أنا عمار صرنا تنين
شعر و شمع للناس حضّرنا
بالشعر منكفكف دموع العين
و بالشمع منضوي نواظرنا
شمعة و قصيدة و رفة جناحين
و تغريدة البلبل ع منبرنا
و من إسمك لإسمي إجو حرفين
فيهن حضارة كون عمّرنا
منقول يخزي العين عَن هالعين
و الراء رقة من ضمايرنا
هالناس شو إلها علينا دين
نكتب قصايد ع سطور النور
و نهدي إلون جبران خاطرنا
الخميس، الساعة 08:15 مساءً‏ · أعجبني · 3

الشاعر عمار البراضعي
تسلم خيي ربيع الله يسلمك يارب وأهلا وسهلا فيك بيناتنا أخ وشاعر

ياعيني مرجّحة بالكف عيــــــــنة
ياخمرة بكاس وعناقيد زيــــــــني
أيات من الزجل صليت إلنـــــــــا
إلك تاصار ع عمــــــــــــار دينة

يابلبل عند مابيصدح زجلنـــــــــا
دخل شعرك ع مسمع كل ذينـة
بحضارة مأسسي شفنا وشلــنا
شميلةّ فكر من أرقى جنيــــــنة

بآخر إسمك بداية حملـــــنـــــا
لأسمي واشتقت شوفك بعيني
وسوا من حروفنا نكتب جمـــلنا
بأول حرفك وآخـــــــر حروفي
قاسم مشترك بينك وبيـنــــــي

* * * * * * * * * *
Rabih Al Lahham
الحقيقة صرلي فترة مشغول بالعمل عن كتابة الشعر،
ولكن الشاعر عمار البراضعي شاعر مميّز بيستفز القريحة.
فاسمحولي كمل حواري معو بالأبيات التالية:

موج السحر عالبحر بيدادي
تَ يقلّد الشعار ببلادي
و يحكي بهديرو رنة الألماس
ردة معنّى و بيت قرّادي
خصر المراكب عَ هديرو ماس
يسكر طرب و يموج متهادي
مثل الكأنو من أبو النواس
حامل قوافي الخمر زوادة
نسيان إنو شعرنا قداس
بيمجّد الخلاق و الفادي
الشاعر سفير الحب و الإحساس
و الورد و الثلجات و الوادي
عمار ملّى من حنينو كاس
و حوّل كلام الشعر لَ عبادة
يبعث حنانو عَ بيوت الناس
يزرع صلاة الفجر للغادي
و يحصد محبة من قلب حساس
بيخاطب الشعار: يا ولادي
قولو زجل بنكهة حبوب الآس
و خلو الشعر بِ بالكُن ترتيل
الشاعر عظيم انكان مش عادي
الجمعت، الساعة 11:58 مساءً‏ · إلغاء إعجابي · 4
Rabih Al Lahham إستاذ عمار، أنا ربيع اللحام من عاليه أعمل في أبو ظبي
و لي كتاب شعر أصدرته من فترة قصيرة تحت عنوان: قطرات ألم.
من أي منطقة حضرتك حتى أزورك و أهديك كتابي عندما أكون في لبنان؟
أمس في الساعة 12:00 صباحاً‏ · أعجبني · 3