منتديات الزجل اللبناني الشاعر: عمار البراضعي

أهلا وسهلا بزائرنا الكريم
عليك بالتسجيل لكي ترى كافة المواضيع المخفية
=====================
الزائر رحبنـا برسمــــو = وع التسجيل دعينا يفوت
وغير اللي مسجّل إسمو = عنو منخفي يقـــرا بيوت
=====================

منتديات الزجل اللبناني الشاعر: عمار البراضعي
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

مقتطفات للشاعر أسعد سعيد

اذهب الى الأسفل

مقتطفات للشاعر أسعد سعيد Empty مقتطفات للشاعر أسعد سعيد

مُساهمة من طرف 7arf في 6/19/2007, 6:31 am

لبنان
لبنان يا شمس الما خلقت تاتغيب
شاب الزمان وإنت مش ممكن تشيب
عمري نذرتو للهلال وللصليب
وقطعة أنا منك يا لبنان الحبيب
كل بيت بيتي وكل ضيعه ضيعتي
والكل أهلي وما حدا عني غريب
* * *
مملكة الشعر
يا متنبي عا مملكتك لا تفزع
انطفى كافور والدوله العليّي
وصفي الحطك بديوانو مربّع
بديوانك عبد إلا شويي
لإنو الشاعر الخلّد وبدّع
ملك عا أبجديي شاعريي
ولإنو حامل التاج المرصّع
عبد عند اللي بيملك شاعريي
* * *
شاعر وسامع
واللي حوّل الكلمة مضافي
ومن الكلمة قطف زنبق ونقف
غير اللي عم يربّي القوافي
يتامى عا خبز غيرو المشقّف
كيف بتخلق الكلمة الثقافي
إذا كان اللي خلقها مش مثقف
حرام نقول يعطيك العوافي
لشاعر ما بيعرف شو مغنّي
ولسامع ما بيعرف ليش زقّف
* * *
المال
سبحان اسمك كلهن بيبجلوك
وعن خساسة مصدرك ما بيسألوك
من خيبة الناسك وكف الزانية
بقيمة وحشمة واحدة بيستقبلوك
كهانك الأبرار في مستودعك
حتى الشرايع متل خادم يتبعوك
من قبل كانوا يشركوا الخالق معك
واليوم صاروا بدل الله يعبدوك
* * *
غزل
رح خبرك ما زال ما عندك خبر
شو بحب فيك بالمفيد المختصر
بحبك تكوني غربتي وكون السفر
بحبك تكوني خمرتي وكون السكر
بحبك تكوني ليلتي وكون السهر
بحبك تكوني ريشتي وكون الوتر
لكن إذا مرة على بالك خطر
تكوني قمر ما انطال إلا بالنظر
رح انجبر اعمل زنودي غيمتين
ولفّك متل ما الغيم بيلف القمر
* * *
لبنان
لبنان بالدنيا وطن ما أجملو
أخضر والله بأرز أخضر كلّلو
بالليل عا جبالو النجوم بينزلو
وشمس الضحى بعيونها بتستقبلو
لبنان كان بالحرب واضح مشكلو
مش مشكلة خيين عم يتقاتلو
أصل البلى إيدين ياما تدخّلو
بأمورنا وكانوا الحريق يشعّلو
ولبنان هالبي الكبير بمعقلو
عقلنا عند ما قال يا ولادي عْقلو
عقلنا وطفينا النار واخدنا قرار
المشوار بالإعمار بدنا نكمّلو
ولبنان حبّو فرض منّو سوق عرض
وبكنوز كل الأرض ما منستبدلو
بدنا الوفاق يتم والإلفه تعمّ
وراية وطنّا تضم شعب بكاملو
بدنا بوطنّا كنوز المحبّه تفوز
ومن حنجرة فيروز لحن نرتّلو
ونوقف بكل مكان عادروب الزمان
نغنّي سوا لبنان يا أخضر حلو
......
7arf
7arf
admin

عدد الرسائل : 1125
العمر : 53
تاريخ التسجيل : 01/11/2006

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى