منتديات الزجل اللبناني الشاعر: عمار البراضعي

أهلا وسهلا بزائرنا الكريم
عليك بالتسجيل لكي ترى كافة المواضيع المخفية
=====================
الزائر رحبنـا برسمــــو = وع التسجيل دعينا يفوت
وغير اللي مسجّل إسمو = عنو منخفي يقـــرا بيوت
=====================

منتديات الزجل اللبناني الشاعر: عمار البراضعي
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

مقتطفات للشاعر روبير خوري

اذهب الى الأسفل

مقتطفات للشاعر روبير خوري Empty مقتطفات للشاعر روبير خوري

مُساهمة من طرف 7arf في 6/19/2007, 7:09 am

حيره
.....
واقفي... وشايف بعينيها الضياع
تقلي: أنا متلك بحيره ضايعه
لا العمر قادر رهجة طموحي يساع
ولا الحلم خلاني بحياتي قانعه
متلك سبقني العمر
وخمري طفي جمري
صارت حياتي أمر
ومستسلمي لأمري
تعبت عيوني من شقا المشوار
وكرم الصبا شعلت عناقيدو
ان ما تركت كرمي يقطفو الخمار
كرم الحفظتو عمر شو بريدو
... ومحتار واقف، والفكر محتار
من ظن مخفي... لظن ينقلني
مارد يشوق لهفتي للنار
وواقع عاكف الريح حاملني
الدرب ملكي... والحلا يصرخ قناع
والقلب يخفق.. والفكار مشلعا
شيبة العمر تقول: لا تقرب رجاع
والعطر من فسطانها يقلي: تعا
**********
حنين
.....
بجنون الغصه المره عمري مدبوح
وعا دروب النهده الحره قلبي مشلوح
يا أحلام الورديه الكنتي عا مطل
العمر، وتتغاوي فيي قدام الكل
صرتي متل الخبريه تزهر وتطل
كلما طلت حوريه بفسطان يلوح
راحو زهور مواسمنا يا قلب ارتاح
صار الحظ يقاسمنا كاس الافراح
كنا وكانت تعزمنا وترمي المفتاح
صرنا نقول لعازمنا روح ولا تروح
**********
الشعر والشاعر
..............
كنا بأول عمرنا نحلم
نكبر، ويكبر حلمنا ويسلم
ونصير مع دورة سنين العمر
اكتر ثقافه واشمل وأفهم
ولما كبرنا وهب فينا الجمر
وصرنا بواقع أمرنا أعلم
صار الحنين يشدنا للشعر
وفينا كبر حلم الطريق الوعر
وصرنا بمفهوم الشعر ننعم
وهيك عمر الشاعر الخلاق
بيبتدي بالحلم، بالأخلاق
ينقل جبل من مطرح لمطرح
يخربط العالم يجمع ويطرح
يصور دني فيها فرح للكل
يرسم أمل يزرع هنا ويفل
يخرطش على الأيام شو بدو
وما يعود قادر يلتزم حدو
ومع دورة الأحلام والأيام
بتصفي ملامح شعر ابداعي
وبيعقل الفكر بشعر واعي
يا شعر نحنا بعصر صرنا فيه
نفتش عا ماضي العز ما نلاقيه
كنت الطرب كنت الغنا المطلوب
كنت الصدق كنت الوعي محسوب
كنت الشراره الساطعة الحره
كنت الفكر، واليوم شو المطلوب
**************
مطلوب
.......
نستحضر التاريخ ما نلغيه
نعرّف شباب اليوم عا ماضيه
نستشهد بكلمات مأثورة
نسترشد بعادات مغموره
العونه، التسامح، حلقة الدبكي
رقصة السيف زنود مشتبكي
ما نستحي بماضي اللي سبقونا
العطيو الوطن قوّي عطيونا
هني العا درب الشعر دلونا
يا شعرنا الحامل اسامي كتار
شعبي، زجل، عامي، ولبناني
شعارك بيبقو جنود كبار
بخدمة تراث بلاد منصاتي
حامل معاني وحس انساني
متل الغُرب..
يمكن تكوني أجمل الحلوين
ويمكن يكون الشيب... حلاكي
ويمكن... تكون مجامر الخمسين
شلحت عليكي حزنها الباكي
عا كل حال! العمر... مش ملك البشر
********
العمر
......
رحلي... طولها مسافة طريق
ومهما يمرجحنا التلاطف بالنظر
منضل متل الوعد بعيون الغريق
لما منجي عا مسرح الدنيي.. عياد...
بيعيش فينا... وهم تاج السلطني
منزرع حلم بكرا... بعينين الولاد
ومنصير نمشي برفقة فصول السني
برجع بقلك: كيف ما تكوني!
كوني... الشكل ما بدّل ظنوني
مش هم كيف.. وليش؟
والمعروف...
أشكالنا للعمر مرهوني!!
ما بعرفك!!
مش شايفك عن قرب
ان جربت أعرف.. لا تلوميني..
أوقات.. بشعر، هيك! متل الغرب
وأوقات... متل اللي بتعرفيني
وأوقات... بالكلمي بتسحريني
من هيك عنك صار فيي قول:
صرتي وعد مفتوح عالمجهول
عا مخاوف المجهول... ودّيني
*************
7arf
7arf
admin

عدد الرسائل : 1125
العمر : 53
تاريخ التسجيل : 01/11/2006

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى