مقتطفات للشاعر جريس البستاني

.......
سألتْ عن عمر هوني سندياني
بيساع بجوف قرمتها تماني
جدّي قال قلّو لجد جدّي
جدّو قال هاي مش عازماني
رجعت ليها بعد ما ضعفت مدي
إسألها بإلحاح ورصاني
إنتي مين خلاّك تشدّي
ومن وين الأساس الأوّلاني
قالت بذكر من دهور عدّي
آدم هون بلوطه رماني
وعيت بهالتراب الباس خدّي
وشموخي من عمر أول حضاني
قلت بالقطع ما شفتي تعدّي؟
قالتلي مبلى بداعي التهاني
من خشابي لأول عرس جدّي
حوّل بنتها عملت خزاني
وبذكر نوح بالطوف المُعدّي
من خشابي فلكو متاني
ورجع من بعد طوفي مستبدّي
بمطرح ما تودّعنا لاقاني
قلت واليوم عم بقشع تردّي
بحلاكي وليش لونك زعفراني
قالت للنهاية مستعدّي
البقا لله خبّر عن لساني
قلت ما زال جيتي تردّي
الأمانة وصار ضعفك عم يعاني
انحني حنية منازع عالمخدّي
وعافرشة راحتك ردّي الأماني
قالت يا ابن أرض المودّي
حرام عليك تجرح عنفواني
إنتْ لو مؤمن بهالأرض قدّي
كنت بتجذّر شلوشك مكاني
أنا الجعّد جبينو الدهر حدّي
وحردبْ قبل ما جوّد حناني
بقي جسمي على القشري مهدّي
تا إيبس على الواقف لإنو
إبن لبنان ما بيموت حاني

************

مصيبة الحلوين

.............
اهتدي يا عمر عاسوالف مشيبي
وخلّي مرايتك مني قريبي
وخلّيلي من الحلوين موني
تكفيني من شروقي لمغيبي
أنا مقيّد لعاطفتي الحنوني
وجنون الحب حمّلني صليبي
إذا ما بكمّل مراحل جنوني
قلبي بيعمل بقلبي عجيبي
عيون السود ضلّو يجرّحوني
تا صارت حالتي حاله كئيبي
إجو أهل المروي ينصحوني
تا إبعد عنهن وطفّي لهيبي
قلت يا عالم بحالي اتركوني
أنا المتألم وراضي بنصيبي
مش بحاجه لأطبا يعالجوني
الجرحني بس بعتبرو طبيبي
ضلّو قبال منّي تأملوني
وإذا بدكن الآراء المُصيبي
عن الحلوين لولا بتسألوني
حلوين الدني مصيبي علينا
وما فينا نعيش من دون هالمصيبي

***************

مرجوحتك

........
حبّكْ جبر سرساب إيامي
يزرع نظر خلفي وقدّامي
إنتي معي وفكري مع الأخطار
الفزعان منها تزيد آلامي
بحبّك ولو بقدر مع الأسرار
سكّر عليي بقجة هيامي
تا كنت خبيكي من الأخطار
بمطرح وحيد بيعرفو غرامي
لا تعاتبي العاجنينتو بيغار
بيضلّ قلبو من القلق دامي
وكل ما الهوا خربش على الأزهار
بيقول يمكن دعسة حرامي
ضلّي لسهر فكري وعي الأفكار
ولما يصير النوم إلزامي
بعيني اللي ما بتنام ليل نهار
قيسي مساحة فسحة الريفين
ومرجوحتك فيها انصبي ونامي

************

سرار القلب

..........

من قلب غطّاكي بنهداتو
وسنين عشتي بين خفقاتو
بدّك تفلّي واتخذتي قرار
ما تسألي عن كل عنّاتو
تا تقول مش رح بسألك شو صار
ووافقت رأيك عالرأي ذاتو
يا هل ترى رح يقبل التذكار
إنتي وأنا نجرح حكاياتو
عاكل حال ان تم هالمشوار
لا تستغلّي دموع شمعاتو
ما في ولا إنسان تا بيغار
عاقلب ما خربط بدقاتو
كرمال مبداكي احفظي الأسرار
وردي الشماتي عن جروحاتو
البيهمهم أمر الشماتي كتار
وما في حدا بيعرف سرار البيت
إلا البيعيش سنين جوّاتو
******

PM







تكريم خليل روكز بعد تلاتين عام على وفاته في مزرعة ياشوع
في تكريم خليل روكز 7/6/92 في مزرعة ياشوع بعد الانتهاء من بناء تمثال تخليدا له



جريس البستاني قال:





عفوا يا بو روكز بساعة مباركة

عيب البكي محل الما بيجوز البكي

بأكثر من التكريم حتى ما نفوت

غض النظر عن انفعال المشتكي

الكلمة اللي انت تركتها للشعر قوت

غيري حكاها ولكلامي مسبكي

من هون شو بحكي بتكريمك بيوت

وأيا حكي بيرضيك من منطق ذكي

وانت القلت لما الحكي بكّا السكوت

ضليت نكوّز بالحجر حتى حكي







قسنا رخامه بعرضها وبطولها

وتا تصير انت ..... تألهت بوصولها

وتقمّص النحات شبقة جانحيك

برحلة عذاباتك وكل فصولها

وبالنحت بلّش من الجبهة لساعديك

ومع كل نقشه العين فيك يجولها

وساعة ما بلّش يقرب التشبيه ليك

صار الزميل يعّن تحت المطرقة

اكتر من الآخ اللي كنت تقولها



قلّي الوفا انشالله بعد عمر الطويل

بيكون يومك متل هاليوم الجميل

قلتلو بهالامر ما في معادلي

وكنّو تا يشملني الخلود لألف جيل

حقي وصللي من الزمان الأولي

من يوم ما صرت لأبو روكز زميل

لكن اذا في مكارمه مستاهلي

لذرة فضل تمرق عا ميزان الفضيل

يا ناحت التمثال كفّي المرحلي

وشلّي الفرافيط اللي طلعو من الزميل

وبكرا بعد ما موت صممهن الي

تا كون بالتمثال من بقوة خليل



خلودك يا بو روكز تا يفرض احترام

منّو بحاجة للنحت او للرخام

بس بغياب الصوت بيضل الصدا

يترك أثر متل العبير من الخزام

ويمكن تقول بهالقضية شو بدا

تا بعد هالمدة حصل هالاهتمام

في اعتراف بيلزم صحاب وعدا

بغض النظر عن مين بالمشروع قام

مش كل طير منقدر نعدو شدا

ولا كل رامي منحسبو صاب العلام

صرلك من تلاتين عام على حدا

بالجسم , بس الاسم مهر بلا لجام

نحنا الأخدنا منك شعاع الهدا

تبعنا خطاك بزخم دافع للأمام

كان الأمل نشطح على أبعد مدا

بتجديد ماضيلو التطور التزام

شبنا وما خلينا جبال ولا ودا

وبالشعر دوّخنا المنابر والقلام

لكن لحد اليوم ما توّصل حدا

للأنت واصلوّ من تلاتين عام



هيدي الحقيقة الما بتقبل ابّها

عن شمس ما في بجوّها إلا البها

من جهتي ما كان الي غاية وصول

إلا لقناعة ندرت ايامي لها

ان همّ مشواري الطويل بهالميول

شوفك على مراية خلود مزهزها

كان حلمي يوم تخليدك يطول

تحقق طموحي متل ما حلمي اشتها

جايي تا أحني حد تمثالك وقول

هون ابتدا خلودك ومشواري انتهى


[ندعوك للتسجيل في المنتدى أو التعريف بنفسك لمعاينة هذه الصورة]