مقتطفات للشاعر ميشال قهوجي

...................

من بعد ما ولفي شغل بالي
وغاب عني بدون ما يبالي
سهرت الليالي غنّي موّالي
وقول رزق الله عا هاك الأيام
لما تجي وتتغندر قبالي
*
راح المضى، وكاساتنا مرّة
وما عاد في آمال بالمرة
غرقان بالأوهام سكران بالأحلام
ولا عاد عنّا حقول مخضرّه
ولا بيوت فيها النور بيلالي
*
وزورق أمانينا على المينا
راسي، ونحنا بجانبو رسينا
وما بين جَزر ومدّ ها الموج فينا شد
وما تمكّن يحلحل مراسينا
ويخطف هديرو صوتنا العالي
*
ضاع اللي كان بمغرمو مغروم
والكان رسمو بناظرو مرسوم
والزنبق الفوّاح ما عاد عطرو فاح
وما ضل إلا خيالك الموهوم
يبرم زوايا البيت عا خيالي
*
في آخر الضيعة نبع مشتاق
يروي غليل شفايف العشّاق
صوب منّو روح خود نتفة روح
وقِلّو: لقا العشّاق صار فراق
والشيب طلّ وغيّر الحاله

***********

عفريت

.......
عفريت بأمور الهوى عفريت
وعا دروب الشيطني شو مشيت
عفريت، لكنك خفيف الروح
وشيطان أول من جهنم جيت
*
عفريت بس السحر في عينيك
وخلّيتني لعبة هوى بإيديك
وليش حتى عملت فيي هيك
وحرقتني بالنار والكبريت
*
عفريت، والعشّاق بتخافك
وقلبي وقع بالحب شي شافك
وِسْكَرتني في خمرة شفافك
ولحدّ هلق بعدني ما صحيت
*
عفريت، روح العفرتي بتهواك
وسرّك غميق وما عرفت شو باك
البيسايرك بيخمّنك شي ملاك
لكن أنت في شيطنات الحب
ما بشوف متلك بالدِني عفريت

***********

لمّا

...
لمّا السلم بيصير إرهاب وحروب
ولمّا الفطور يصير من بعد الغدا
ولمّا الشمال يطير ويصفّي جنوب
ولمّا الخبر بيصير قبل المبتدا
ولمّا السمك بيصير يسبح عالدروب
ولمّا الجَرَس ما نعود نسمعلو صدى
ولمّا الشمس تشرق علينا من الغروب
ولمّا الجبال تطير ويضيق المدى
ولمّا البحر من موجتو نقطف طيوب
ولمّا الحياة عيونها بتطفي الردى
ولمّا من الأطماع منفضّي الجيوب
ولمّا نشوف العدل في عدلو ابتدى
في وقتها بتحكي لسانات الشعوب
صار في مسؤول.. صار عِنّا حدا

***************

أعيادنا

.............
أجراس عيد مطنطني
ورنّات صوت الميدني
ينادو سوى: يلاّ سوى
نسجد لألله وننحني
يا شعب لبنان الوفي الأوحد
إسمك تجلّى ومرّك تحلّى
يا خالق الهوّز من الأبجد
فيك المزايا الطيّبي كلاّ
وتا يضل عزّك عزّ يتجدّد
بالدين لا تلعب وتتسلّى
وتا بعد الله بلادنا نعبد
للطائفيي الموجعه قلاّ:
متري ومارون أخوة علي وأحمد
وعا فاطمة وعا مريم تصلاّ
ومعبد يسوع، ومسجد محمد
نهرين، بيصبّو ببحر الله
ليش التعصّب بالبلاد
وليش التفرّق بالعياد
وليش الجفا وليش العناد
وأفلام نحن بهالدني
*********