منتديات الزجل اللبناني الشاعر: عمار البراضعي

أهلا وسهلا بزائرنا الكريم
عليك بالتسجيل لكي ترى كافة المواضيع المخفية
=====================
الزائر رحبنـا برسمــــو = وع التسجيل دعينا يفوت
وغير اللي مسجّل إسمو = عنو منخفي يقـــرا بيوت
=====================

منتديات الزجل اللبناني الشاعر: عمار البراضعي
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

أسرار المنتديات رقم 2

اذهب الى الأسفل

أسرار المنتديات رقم 2 Empty أسرار المنتديات رقم 2

مُساهمة من طرف 7arf في 10/21/2007, 6:22 pm

حوار بين الشاعرين شفيق وحرف بالعتابا
---------------------------
شفيق بعنوان ابعثوا شاعر وبس
ابعتو شاعر بأرضي شاع ريتو ... بوجهـي بـس يثـبـت شاعريـتـو
سيـوفـي بـالـروايـا شاعـريـتـو ... قبـل مـا يخـلـق ويفـتـح بــواب

7arf
الله يديم شرفكم ع العزيمة وتقبلوا تحياتي
شفــــيــق مهما بمهنتك تتـقن حِرف ... جاييك شاعر مايوم دربو حرف
صاحب ولقبو المنبري الشـاعر حرف ... تاتقول قد الأبجديــــــة حرفنا

--------------------------------
شفيق
كلما الصقر يتبع بجـوّو منحـى رف = بيطلع شي طير بلون أسود منحرف
وتنشوف شو بيطلع الليلة من حرف = يا منشطبـو يـا منوضعـو عـا راسنـا
---------
يـا صقـور المنيّـة منحـى رفـكـم = رحل وقدرت اعرف من حرفكم
عطوني شو بيطلـع مـن حرفكـم = يـــا مـنـكـرّمـو يــــا بيـنـشـطـب
-------------------------------
7arf
مافيك تشطب سيف حرفو جارحك = ولا فيك تاكل طير بري جارحـك
توقعت كلما الجار مرة جار حـك = يقلـو بـأول بيـت أهـلا بيننـا
*****
طير الشوم أسـود لـون مِنحـط = إلاّ البين منـو غـراب مـا نحـط
نحن عالعين قبـل الـراس منحـط = وع درب العاجبك شـق البـواب
-------------------------------
شفيق
العنـدو عـواطـف بالحنـايـا جـارفـات =بيـصـدّ فــي كلـمـة روافــع جـارفـات
اعذرني أنا ما اعتدت ساير جار فات = عالبيـت حامـل فـي يــدو سـمـر القـنـا
------
عـلـى ابـــن الـشـعـر فـيّــي درو بـــي = لأنّـــــو كـــــل هـالـعـالــم درو بـــــي
الـوعـر والجـمـر والمـهـلـك دروبـــي = مـــا بـــدّي كـتّــر عـلـيـك الـصـعــاب
-------------------------------
7arf
مادام افكارك كواهل مُعجزي ... رح حاورك تاشرط تدفع مع جزي

ولو ردت بعملك بشعري معجزة ... تاتقـول رب الفـن وحـدو حرفنـا

****
من خمر الشعر مزمز مع كراح ... وكفوف الشعر إمعكها معك راح

وشفيق الحرف لـو رحلـة معـك راح ... بتتعلـم علـى أصـول العتـاب
---------------------------------
شفيق
يا حرف لولا اللفظ خلفك ورّ باب = بتعـود نغمـة عالكمنـجـا والـربـاب
ان كنّك إلاه من الألوهة والربـاب =عنـد التـجـارب كــل شــك بينفـنـا
---------
إذا قمحـي عجايـع مـنّ أصولـو = وأنتـو بعـد أبعـد مـنـأى صـولـو
قبل ما الشعر تعطي من أصولو = أصولـك هاتهـا وزيـح الضبـاب
--------------------------------
7arf
قدموس لما جبيل عاصخورة وصل = حفّر حروف الضاد تانمضي وصل

وحرف قاطع كم رأس أفعى و صِل = قولـوا بمشـتـاوي حــرف قدموسـنـا

***
ياتسلـمـلـي أنــــا لــــولاك مـابـعــود = عامشتـاوي اللـي عنـو كنـت مبعـود

النغـم معـروف يمـا اللحـن مـا بعـود = بــلا الريـشـة مــا أعـطـانـا جـــواب
---------------------------------
شفيق
الأقوال عجزت لو قلت (أف) عالها = لاطــي ومــا فيـهـا تكتـمـل أفعالـهـا
ويا ريت ما قتلت الأرض أفعى لها = هيـدي عجـوز بعمـر فـجـر الكائـنـة
----

بمشتاوي الشعر كلما فلحنا = تلام بكوكب الزهرة فلحنـا
لمّا رياشك بتبخل في لحنـا = بكبّ العود وببكي القصـب
------------------------------
7arf
احـلالــنــا لـــــو نـتــحــد أقـوالــنــا = منبقى سوا وسكب الشعر أقوى لنا
قتـلـنـا الأفـاعــي تـابـقـوا أقـوالـنــا = بماضي ومضارع كمِّل فعالـن أنـا

****

منحـت وماقبلـت منـن فـي المنـوح = وهانونـي وعذبـوا فيـي فـلـم نــوح
العبـالـو بـقـدر بجبـلـو فِـلــم نـــوح = وطـوفـان جـديـد ببـحـور الـعـتـاب
------------------------------
شفيق
ناسـي محاسـن هالقلـب ومضـار عـيـن =بإمضا عجول على الحكم وامضا رعين
ان كنتو مضاة علـى القتـل ومضارعيـن = مستقـبـلـك كـلّــو عـلــى الـقـتـل انـبـنــا
-----
إذا نوح لسفن بحرو عطـا وفـك = دفّــة وبـطّـل ينـجّـي عـطـوفـك
وبعد ما خلًصك شافك ع طوفك = رح بينـدم عشـو يلـلـي ارتـكـب
-----------------------
7arf
لـمــا حـمـامـةّ نـــوح جابـتـلـو بُـشــر = سلكنا الخير ع الدرب ماوقعنا بِ شر
ومستقبلـي ماضـي مـارح إقتـل بَشـر = وغيـر الأذايــا مــش محـلـل شرعـنـا

*****
ركــنــك زور تـاهـمـنـي تــــا ركــنــي = قِـــوي ومـافـيـك ياشـويـعـر تـركّـنــي
وتانفـرض نــوح فــي طـوفـو تركـنـي = بــرجـــع مــتـــل يــونـــس بـالـعـبــاب

*********
شفيق
شرّع دخول العلم تنشوفـو شـرع = ويللـي انتهـا لا تقلنـا أنّــو شــرع
بعمري أنا ما سمعت بالعالم شرع = بيحـلّـل بقـتـلـك يـــا أمّـــا بقتـلـنـا
-----
نجمك بلّـش بهاليـوم يونـس = ولا تظنّو لهالأحباب يونـس
وإذا بيكون فعلك متل يونس = ما زتّك نوح برّات الخشـب
-------------------------------
7arf
مُطلق أمير كبير عالي بالسِما = مشرع بوابي كل قافة بسِـّما
وربين لا تنسى في فوقك بالسما = رب الخليقة وللشعر ربو أنا
***
التحدي باب ع المفلا بشرعو = جواب ضعيف مابرضى بشرعو
ومتل اللي ترك يونس بشرعو = شلفتك من سمايي عالتراب
-------------------
شفيق
غـابـك إذا يــا ادمــي نـمــرو دهـــا = جبالـك بوهمـك والغفـا نــم رودهــا
ربّ الأرض قبلـك طـلـع نمـرودهـا = تـا أمّمـت هالبرغـشـة بـراسـو قـنـا
*****
علـى عقـابـك تـعـا دوّر وعـجـزاك =رميت اللي طحن صدرك وعجـزك
تركت شعبك سبب ضعفك وعجزك =وربّ الـلـي تـــرك شـعـبـو كـــذب
----------------------------
7arf
شعرك شفت نازع جهة حلّى جهة = حقول القطن يمكن وهم حلاجها
ونمرود مَنّي .ومدعي حلاجها = رب الشعر بالكون قلتلك أنا
***
شعري كل أفكارو نبيها = علوم الغيب ع المنبر نبيها
الأمة الغاب عن عينا نبيها = مافيك تقول تاركها وهرب
---------------------------
شفيق
حـرف لرجـال الديانـة ربّكـن = وقلّهـن جايـي تأعصـر ربّكـن
ولو كان يا أشعار هوّي ربّكن = وحياتكن رح علّقو بطعم الفنـا
**
شقاك اليوم يا شاعر شقـا يـل = عكتفـو شاقـل جبالـي شقـايـل
نبينا غاب؟؟حلفتك شـو قايـل؟ = النبي موجود بوجـود الكتـاب
-------------------------
7arf
ماخلقت مرة القافية إنسى بِها = وبنت المواهب من حرف أنسابها
ورب الشعر للقافية إن سابها = بتصبح يتيمة وراكضة صوب الفنا
***
شفيق الديب لا تكفر بربك = بإيدي بعصرك عصرة بربك
-----------
مازال رضيت بالحكيوا قـَبلنا = إسجد للحرف إركع قبلنا
النبي موجود بكتابو قِبلنا = وانا بوجود مشتاوي الكتاب
-----------------------------
شفيق
مصيف جهل لا تصنّفو مشتـى وفيـك = خير ووفا حال الشعر مـش تـا وفيـك
ودخلك لا تبلي يا حرف مشتاوي فيك = وإلّا ان كنـت عايـش لا تحكـي بالفـنـا
***
اشرب الْميّة وقـول الجـود مـو جـود = وتْعـيّـش وقــول الـجـود مـــو جـــود
وما صرلـك شهـر يـا استـاذ موجـود = وكــــلّ الـكـاتـبـو صـفـحــة كــتـــاب
-----------------------------
7arf
أول بيت مكسور ياشويعر مرق = خلا الضعف يطبخ على كسرو مرق
شاعر وبس طلبت ياحسرة مـ رقّ = قلبي وعلى ضعفك بيهطل دمعنا
***
ان رجح حاتم بكي ع الجود أو حد = وبجمعة بيبتلي بهالبخل أو حد
بيكفي حرف يكتب بيت أوحد = نوعية ولا كمية حسب
------------------------------
شفيق
يا حرف لا تحرق بقـا إكليـل غـار = شعرك لأنّو من عصر زوّار غار
حيّرتنـا قلبـك مـا رقّ ودمـع غــار = هيـدي دمـوع متمسحـة ومشيطـنـة
**
يا حرف ان كان قلبك أنت عن قود = لـجـام عقـولـك ولا تــدور ع نـقـود
دقـنـا مــن كـرومـك ألــف عـنـقـود = ولـهـلّـق مـــا عـــم مـنـوجـد عـنــب
-----------------------------
7arf
أولا تحياتي أخ شفيق
ثانيا أنا ماقصدي إتهمك هيك زور العفو يا اخي أنا كل قصدي علمك على الصح
انتبه البيت المكسور مش اللي حضرتك فكرت فيه هوي البيت هذا
----
حـرف لرجـال الديانـة ربّكـن = وقلّهـن جايـي تأعصـر ربّكـن
ولو كان يا أشعار هوّي ربّكن = وحياتكن رح علّقو بطعم الفنـا
**
وانا برأيي هالبيت مكسور
وكان فيك تقول

لو حرف يارجال الديانة ربكن
او
حـرف لرِجـالك يا ديانـة ربّكـن
وبتمنى منك ماتنزعج مني لأنو لمصلحتك صدقني والف تحية شعرية من اخوك حرف
بملقى الطلب شاعر يجيلو مع اللقى = ياحرف خليلو النيران معلقة
و ع معلقات السبع زدت معلقة = وصاروا ثمان معلقات بهالدِنا
***
مواج البحر ضلي لجاه ليي = وع شاطي العز جيبي الجاه ليي
وحرف لو كان عصر الجاهلية = شهدلو عنتر و فيه اعتجب
تــايــضـــل جـــــــو الــشــعـــر يــاشــاعـــر إلـــــــف = دعـــنــــي حـــبــــال الـــــــود عــارقـــابـــك ألــــــــف
ومـــــن كـــــرم شــعـــري الـعـنـقــدة ذايـــــق ألــــــف = لــــــي عـــلــــم قـلــتــلــي بـــعــــد مـــالــــك شـــهــــر
وكـــــــل الـكـتـبــتــو بـشــهــرتــي مـــنــــو شُــــهــــر = ولـــمـــا الـــحـــرف بـعـركــتــو ســيــوفـــو شـــهــــر
صــــــــفــــــــيــــــــت تــــــــبــــــــكــــــــي وتــــــــتــــــــهــــــــم دمــــــعــــــاتــــــنـــــــا
***
مـــاعـــنــــا زور صـــدقــــنــــي مـــــــــــا عـــــنــــــا = وغــــيــــر الــــحــــق تــفــكــيـــري مـــــــــا عــــنّـــــا
بــــــعــــــد مــاتــنــتـــهـــي مــــنــــبـــــدا مــــعــــنّـــــا = اذا اســتـــســـلـــمـــت بــــبـــــحـــــور الــــعـــــتـــــاب
---------------
شفيق
تحيّاتي أخ حرف
للصراحة وصلني حقّي
لأنّو المعنّى ينظم على بحر الرجز ..مستفعلن مستفعلن مستقعلن
ويجوز استخدام بحر الرمل فاعلاتن فاعلاتن فاعلن
ووقت أنا قلت
حرف لرجال الديانة ربّكن
كما قال حنّا موسى
بو أمل بالجو عالي منزلو
وكما قال السيد محمد المصطفى
كيف لو بتقبر حبوب الفلسفة
وكما قال طليع حمدان
لقمتك عالجوع أكتر طيّبة
و
ما طلعلي غير صاحبنا خليل
عالقليلة كان بيّن جوهرة

حرف لرجال الديانة ربّكن
حر فلر جا لد ديا ني رب بكن
فا علا تن فا علا تن فا علن
بو أمل بج جو وعا لي من زلو
ما طلع لي غي رصا حب نا خلي
وإذا حقّا يدّعي الأخ حرف رغبته بمصلحتي واجب عليه عندما ينصح أن تكون النصيحة صحيحة
وأن يلمّ ببحور الزجل وأوزانه وثغراته ..أكثر
لأنو نصف المعرفة جهل
---------------
7arf 5item
لا تدعي بهالمعرفة وتستف جمل = مّفرق قصدت تبيعها لتاجر جمل
قالوا النصيحة كانت بتسوى جمل = صارت إهانة في أواخر عصرنا
****
شرحتلك شو كاتب كان كفي = وقلت يافكار درب الجهل كِفي
معنّا أو عتابا كنت كفي = ختـمـنـا تنيـنـنـا بـحــب الـحـســاب
*********
تحياتي وآسف اخ شفيق وأعتذر عن المتابعة بكل محبة
-----------------------------
شفيق

عناقيـدك ان كانـو بـألـوف مألّفـيـن = بالطبـع نقطـة مـن مـا نحنـا مألّفيـن
ومـن هيـك قلتلّـك لـو كانـو مألّفيـن = من الصعب يعطو هالشعر أيّة منى
والميسرة انعكست صفِت أي يامنة = وسنيـنـك صغـيـرة بحـجـم إيّـامـنـا
ودموعك كبيرة بحجم ميّة سنة
***
اللي منقولو بسجن عقلـك زج النـا = لأنّـو الصـوت فـي راسـك زجلـنـا
العـتـابـا باسـمـنـا ومـنـبـر زجـلـنـا = وشهـدلـي كــل مــن ينـظـم عـتـابـا
وأهالـي النظـم عـا خصمـي عتـابـا = وبيـوت الشعـر لــو رفعـنـا عتـابـا
نصيحـة دقّ راســك بالعـتـاب
--------------------
عفوا
عامشاركتي السابقة ..
قد يكون حرف يتكلم من باب المحبّة والنصح والغيرة على الشعراء والشعر ..لكن للزجل جوازات وبحور محددة
والرجاء الا يأخذ النقاش على محمل شخصي
وإذا بتحبّ أخ حرف فتاح زجل معنى قرادي متل ما بدك
شكرا إلك
-------------------------------
7arf
لا تدعي بهالمعرفة وتستف جمـل ... مّفرق قصدت تبيعهـا لتاجـر جمـل
قالوا النصيحة كانت بتسوى جمل ... صارت إهانة في أواخـر عصرنـا

****
شرحتـلـك شــو كـاتـب راح كـفـي ... وقلـت يافكـار درب الجـهـل كِـفـي
مـعـنّــا أو عـتـابــا كــنــت كــفـــي ... ختـمـنـا تنيـنـنـا بـحــب الـحـســاب
*********
تحياتي وآسف اخ شفيق وأعتذر عن المتابعة بكل محبة
__________________
شفيق
يا ريت جرح العلم عمرو ما ختمولا يخرّجو يللـي كتابـو مـا ختـم
حرف الختم ردّو وبردّو ما ختـملومـا نوايـاه بعكـس لــون السـنـا
***
أنــا مَـنّـي قصـيـر الـبـاع مـنّــي ...ونصيحة حـبّ قـوم وخـود منّـي
خدلـك ربـع كــاس بــدون مـنّـي ...اشربو ولا تغرق ببحـر السـراب
معذور يا أخ حرف ..وعاللي ورد ببيتك الأوّل (((صارت إهانة)))؟؟
وقت بتكون النصيحة .عغلط أو عسهوة فعلية ما كنت حتّى بنفعل بأي ردّ مثلا
لو نصحتني وقت أنا ..قلت ..شعرك لأنو من عصر زوار غار
كان فيك تنصحني غير هالسبكة لأنو كان بيجي أقوى منها .
بس أنت نصحتني بأمر الحق معي وتواريخ الزجل بتشهد ..
ووين ساجي وفاتح وأبو علي وشادي وحسان يشهدو؟؟
عذرا إذا أسأتلك من غير قصد
__________________
7arf
اخي شفيق اذا عم بتقول في جوازات بالشعر شو حاشرك
وبعدان الشعر تطور في شعراء كانو قديما ينظمو ويكسرو انا ما كان قصدي حدا يفهم الا انت virus شعر
وبعدان ليش ما نظمت البيت كلو عا نفس الوزن كان مقبول بالتفعيل بس بيت وزن وبيت وزن تقيلي شوي
بعدان انا ما بشك بشاعريتك انت شاعر جيد
واعزرني اذا جرحتك من دون قصد انا مش عم نمـّر عليك
وانت بتعرف بالمعدن
تحياتي
----------------
شفيق
تحيّاتي أخ حرف الغالي
قبل كل شي .
برجع بأكدلك اعتذاري إذا اسألتلك بدون قصد و
أنت شاعر بشهدلك بكل النواحي
ويا غالي من شان قصّة خلافنا على نظم المعنّى على بحرين مختلفين ذات أساس واحد..!!
مرّة صار في خلاف شبيه بين خليل شحرور والسيد محمد مصطفى بحفلة جباع
خليل شحرور قال ..بشطر معنّى قصيد
((اجمد بيجمد غصب عنّو))
قلو السيد محمد ..((أجمد بيتجمّد غصب عنّو))
رجع عادها خليل متل ما قالها أول شي وقلّو للسيد ..راجع القانون بتعرفها ..
وفكرتك صحّ .لأنو كان في شعراء يستخدموها عالبديهة بس خليل شحرور كان عارف شو عم يعمل ..
وحتّى مرّة علي الحاج القماطي بتسجيل قديم عندي هوي وأنيس روحانا
قال بختمة ردّة معنّى
((ما خلق شاعر ألو كلمة معي))
وكان خليل روكز أكتر شاعر يستعمل هالجواز هاد ..
وجوابا على شو حاشرني استخدم الجواز ..
أنا برأيي استخدام هالجواز هاد متل المرور بحقل ألغام وبرأيي من يجتاز حقل الألغام بنجاح ألو فضل أكتر من اللي ماشي درب سهلة
فكرتك صحّ وفكرتي صحّ والشعر اراء وتاريخ ..
وأنت عالراس ولولا خبرتك وحنكتك الشعرية ما كنت انتبهت على هالنقطة
بهنيك على صدرك الرحب وإنسانيتك وشاعريتك
وشكرا كتير يا استاذ حرف الغالي
وتأكد النقاش لا يفسد في الود قضية
كل عام وأنت بخير

7arf
7arf
admin

عدد الرسائل : 1125
العمر : 53
تاريخ التسجيل : 01/11/2006

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى