حالة وطنا مع الشاعر محمد ابو حمدان

من طرف **عمار البراضعي** 5/27/2007, 6:04 am

--------------------------------------------------------------------------------

Name: محمد أبو حمدان (Friday, April 20, 2007)
كندا تورنتو
Poem:

حالة وطنا - الأوضاع في لبنان .............

************************************

ما بين حرب لبنان والشعب البري
عمار... شو رأيك بوضع المهتري
رح ينوجد حلة لمشكلة الوطن
أو هيك بدنا نضل دبي واعصري

مع تحياتي ..

محمد أبو حمدان تورنتو - كندا

-----------------------------------------------

لبنــــان أجمل زنبقة وبدنا بقى
عنو يحلوا الفيه حبّوا التفرقة

شعبو البري واقع ضحية مّطبقة
فيها بتتحكم مصالح سابقة

ومدّة وهيي بوضع إقليمي كبير
بتضلها لا معلقة ولا مطلقة

تحياتي إلك
عمار البراضعي

-------------------------------

قصة وطنا حل جذري بدها
وبحياتك الحكام شو عم يعملو
يما يكونو المسؤولية قدها
يما الكراسي يتركوها ويرحلو

محمد أبو حمدان

-----------------------------------

الحل الطرحتو مش بإيدي حلّتـــــــــو

بيكمن بشعب الباع صوتو ومــرتشـي

وحاكم الخلفو مابتمــشي ملِّتـــــــــو

كل الكراسي كان دشّـــرها ومشي

عمار البراضعي

--------------------------------------

حكامنا حطو وطنهم عا حدا
ومشو مصالهم على دروب المدا
وهيك ان بقوا الحكام بيروح الوطن
ولما الوطن بيروح ما بيبقى حدا

محمد أبو حمدان

-----------------------------------------

حكـــــــامنا مش كلهم فيهم غلـــــــــط

وتانقول غلطوا ومصلحة مشّـــــــوا بفطن

خذلك مثل كم حــــــــــــاكم وراحل قلط

وذكرو انطفى ومابينطفي ذِكـــــــر الوطن

عمار البراضعي

------------------------------------------

الناس لازم يعرفو بموقف عصيب
من ايدهم لو ضاع لبنان الحبيب
الشعب البيصفي لا هوية ولا وطن
لو احتل كل الكون بيضلو غريب

محمد أبو حمدان

----------------------------------------

حب الوطـن مش بس كلمة ع الورق
والناس عنا ثلث سلاّفــــــــــا احترق

وكيف رح بتجمعنا الهويـــــــــة ياوطن
انصرنا نقاتل بعضــــــــــــنا وع مفترق

عمار البراضعي

------------------------------------------

كيف بدك الشعب الوقف عا مفرقو
بكلمة ما بدنا الحرب يرفع بيرقو
وناس الما الها مصلحة بهالاتفاق
بترجع تودي الطائفية تفرقو

محمد أبو حمدان

-------------------------------------------

طاست الرعبة اللي انوضع فيها حبوب
ومعهم سبع بحصات عن مفـرق دروب
كانت بتشفي الكل خوفن بالقــــــلوب
ونحنا تانشفي شعبنا ونلغي الحـروب
غير طاسةّ الرعبة القديمة مـــــا بقي
تحنن ابن الشمـــــــــال ع ابن الجنوب

عمار البراضعي

-----------------------------------------------

عيبه على حكامنا بهالتجربه
بالطائفية يفرقو الشعب الأبي
وحكي البيلغي شعب وبيهدم وطن
ما بيقبلو فيه المسيح ولا النبي

محمد أبو حمدان

--------------------------------------------

مرة إبن ملجم غدر سيدو الأمين
ويوضاس باع معلمو المشّى الكسيح

وذات الصفة اللّي وطنهم بـايعين
لا بالنبي بيئـآمـــنـــــــوا ولا بالمسيح

عمار البراضعي

------------------------------------------

وين النبي ووين المسيح المستريح
وأهل الحكم صارو بلبنان الجريح
صارت الكرسي عندهم بدل النبي
وصار عندن الدولار أغلى من المسيح

محمد أبو حمدان

-----------------------------------------

نوعين من حكــــام شفنا حاكمين
وتعربطــــــوا بمقعد كراسي للأبد

حاكــــــم بيطلع متل قايين اللعين
وحاكم متل يوضاس والفضة الزبد

عمار البراضعي

-----------------------------------------

الباع الوطن تالناس حاكم تقشعو
وما ضل بالايمان مرجع يجمعو
بيموت والسلطة بموتو بتنتهي
وغير لعنة التاريخ ما بياخذ معو

محمد أبو حمدان

----------------------------------------

لــــــو لعنةّ التاريخ فهموا بالومـــا

بقطعةّ سما ماتاجروا بّيع الدمـــا

ياخوفنا من التاجرو بدم المسيـح

يخلوّا الوطن لبنان يرجع عالسمـا

عمار البراضعي

----------------------------

من قبل ما نخسر أرض أجدادنا
بجرم السياسه الشردت أولادنا
صرنا غرب ببلادنا من دون قرار
والغرب صارو يحكمو ببلادنا

محمد أبو حمدان

-----------------------------------------

حالةّ وطنا عم بتبكي رجــــــــالها

انضلو الأمن والحكم شاغل بــالها

كل يوم دُفعة تهاجر وخوف الوطن

حكّام تبقى حاكمي ع حـــــــالها

عمار البراضعي

-------------------------------

ما أعظمك لبنان يا فجر الهدا
التكوين لما كان كنت المبتدا
لولاك ضل العمر زهر بلا ندا
ولولاك ما في طير عا غصنو شدا
الله يجازي اللبسك ثوب الردا
وخلاك يا لبنان صوت بلا صدا
حضرة المسؤولين عا دروب المدا
شو بدهم خلوك ساحة للعدا
فل اللي فيك تفاخر وفيك اقتدا
وصار صعبة الغايب يلبي الندا
مثل الكأنو مؤامرة وسع المدا
حتى وطنا يصير واقف عا حدا
لابدهم الغياب ترجع عالوطن
ولا بدهم يخلو بموطنا حدا

الأخ عمار ...دائما الحوار معك رغم ضيق الوقت في الغربة ممتع ومشوق,على أمل اللقاء بك قريبا في أرض الوطن...مع تحياتي للجميع.
محمد أبو حمدان تورنتو _ كندا

-----------------------------------------

لبنان من فجر الدني حكاية خـــــــــلود
مرسوم لوحة من الوحي بأطهر زنــــود
ترابو كأنو نبيذ سحري بالوجــــــــــــــود
جبالو السمرة بالسما إلها قيـــــــــــود
وروعة مناخو متل جنة بلا حســــــــود
مسامح كريم العدل منــــــــــو للوفــود
وغيـــــــــــــــابنا بكرة انشالله رح تعـود
الفيهم أصالة ومكرمة وعطـــــر الجدود
ومهما جنوا الحكام ع طيفـــــــو الودود
وحكموا بشريعة غاب ع شرع الأسـود
لبنان رح بيضل ومنبقى جنــــــــــــــود
بأرواحنا نفديه تــــــــــــانحمي الحدود
وكل الخلايق بعد في الها وعـــــــــود
يوم القيامة الشوك تعــــــــرب والورود
وجنةّ عدن لبنـــــان الله خـــــــــالــقو
جايي القيامة وفيه تعريب الحشــــود

********
تسلم يا أخي محمد ولولا من جوهر عباراتك لما كان الحوار ممتع
ونتمنى ان لا تطول غيبتك عنا لعدم ترك فراغ لشوقك ولشعرك
على امل اللقاء القريب انشاء الله ودمت الى اخيك عمار البراضعي