البداية مع الشاعر محمد ابو حمدان

من طرف **عمار البراضعي** 5/27/2007, 6:24 am

منذ مدة زرت الشاعر محمد ابو حمدان على موقعه الزجلي ووقعت في دفتر الزوار, واخذت بعض الصور الشمسية للشعراء الكرام وعندما زارني على موقي الزجلي وجد أن بعض الصور في موقعي مأخوذة من موقعه الزجلي...فأرسل لي أول قصيدة , وكانت محاورة زجلية بيني وبينه اتسمت بالروح الرياضية الشاعرية...فأهلا بالشاعر محمد ابو حمدان الذي أفتخر به كشاعر وصديق...وإلى من يرغب في زيارة موقع الشاعر محمد ابو حمدان فهذا هو العنوان

[ندعوك للتسجيل في المنتدى أو التعريف بنفسك لمعاينة هذا الرابط]
ايضا المحاورة موجودة في موقعي قبل نقلها الى المنتدى
[ندعوك للتسجيل في المنتدى أو التعريف بنفسك لمعاينة هذا الرابط]

*****************

يا براضعي يا شهم انساني
يا غصن من أجمل سندياني
ما كنت متلي عالشعر بتغار
لولا ما عندك دم لبناني
بتعرف أنا من معشر الشعار
مجمع صور ودفوف رناني
ووضعتهم بخزانتي بالدار
ومسيج عليهم بأجفاني
لكن ولما شاحت الأنظار
عا موقعك عا زرعك الجاني
شفت الصور في موقعك يا جار
نسخة عن العندي بالخزانه
من هون حتى نكمل المشوار
وما تكون عا غيرك انت جاني
روح اعترف بيناتنا شو صار
تا يضل اسمي الموقع الأول
وتكون انت الموقع الثاني

محمد أبو حمدان

***************************************

إلك يامحمد الشاعر تحيــــــــة
** تحيـة صـادقة عن طيب نيــــــة
كيفك وكيف الجالية ياجــــــــار
** انشـالله تكونوا بخير ياخيــــــــي

ومن نفحةّ الأرزات والأزهـــــــار
** باعث إلك وردات جوريــــــــة
أما بعد ..رح رد عالاخــــــــبار
** اللـّّي . بعثـتلي إنت هيــــــــي

بعرف انا ويّاك بالأشـــــــــــــعار
** إلنا مواقع شعر بكريــــــــــــــة
مين ابتدى ؟مش هم او معـيار
** يجمّع صور شعــــــّـار شمـسية

المهم صورة تكون للتذكـــــــــار
** ومش ع حدا من الناس حكرية
والفرق حتى يوضّحو عمــــــــار
** جمّع الناس وينتقوا سويـــــــــة

في موقعك شافوا صور شعّــار
** وبموقعي أبيات دهريــــــــــــــة
وتانشوف فينا مين أول صــــــار
** من موقعك نقوا صور الرجـــال
ومن موقعي الصورة الشعرية

عمار البراضعي

***************************************

يا عمار وحياة اللي قدر
هدفنا يلتقي عا فرد محور
انت خيي وما فيك تكون ضدي
لأنو قمحنا من فرد بيدر
وعلى ذكر المواقع كان بدي
تسأل مين بالموضوع أخبر
أنا اللي موقعي صمود وتصدي
يما الموقعو واقع محير
أنا ما زعلت يا ورد المندي
الصور بدلت من منظر لمنظر
زعلت ليش ما قلت لنو بردة
مين الهالصور بالأصل صور
ولا ناوي عالتحدي وكل مدة
نعمل معركة وعالدم نسكر
ولا تفكر ما بدي اياك حدي
وأنا بعتز فيك بكل محضر
واذا بيناتنا في من تحدي
التحدي بيننا المفروض يكبر
عا تشجيع التراث بشكل جدي
والو نبني بكل مجال منبر
ونحافظ عليه من التعدي
تا يبقى الشعر متل الأرز أخضر
وكل ما هالتحدي عن مودي
فينا بيكبر,بيكبر زجلنا
وفينا بينتصر أكتر وأكتر

محمد أبو حمدان

**************************************

يا موقع الاول يا حمـــــــــــــداني
يا بو صور جوات الخزاني
نحنا صورنا براضعــــية صرف
صورة خيال وشعر وجداني
صورة وطن ناطر باصعب ظرف
صورة ثبات بشعب لبناني
صورة نبع من نـــــبع يغرف غرف
منشان يسقي قلوب عطشاني
صّور بشعرك مــــــا تغظ الطرف
ولا تعد انك انت وحداني
رب المعاني والمواقـع حرف
نسّى الخليقة الموقع الاول
بلحظة ما شافو الموقع التاني
----------------------------------
واذا بالشعررح نعمل مهـمة
بفضل اللي عطي للشعر همة
ونسمع مرتجل قلبي ووريـدو
من نبضات لصحابو المهـمي
أنا درب المعارك مابريدو
السكر ع الدم بعتبرو مذمة
أنا بحب الشعر إهدي شريدو
لتراث بلادنا لربي بسمي
وتاموقعنا سوا يكبر رصيدو
تساوينا بمواقعنا الملمي
تافينا الشعر يعتز بقصيدو
ودرر تايشيل من يمك ويمي
وتإسمع صاحبي الشايف جديدو
التجدد فيّقو في خير أمـة
محمد شايفو للشعر سيـدو
الوفا بي كلمتو وصدقو منمّي
وأنا تابادلو اللحـن ونشـــيدو
وهمو إفرج بشعري وهمّـي
حابب عيّدو من قبل عيـدو
بعام جديد والاضحى المبارك
ومتل كبش الفدا ضحّي بدمي

عمار البراضعي

***************************************

شو قصتو سيفك تحداني
متل الكأني عالشعر جاني
يما لأني غمرتك بتحنان
كسرت الصحن ونسيت تحناني
بتعرف أنا محمد أبو حمدان
حبي لجمال الشعر خلاني
حبك مثل خيي, وعلم لبنان
يرفرف علينا بأجمل غناني
ما بنكرك شاعر الك ميزان
لكن لا تنساني بميداني
مش عا ظهر أحمر,اذا عا حصان
بتوقعك دعسة من حصاني
الموقع الأول بعدني وسلطان
نجوم السما جواهر بتيجاني
جميلي عا أهل الشعر بالألوان
الحطيت فيهم دم شرياني
وبالمهجر وجودي وطن عمران
لكل مطلع شعر لبناني
ويللي عا بالو بيخطر النسيان
ويترك الأول يلحق التاني
قلو أنا متل الأرز خلقان
وغير البينسى الخبز والملح
مش ممكن ولا يوم ينساني
---------------------------------
تعا بسلاح كلمتنا نعارك
وفيه نحارب سلاح الفبارك
وغير اللي معو من هالسنابل
ما نقبل بالحرب معنا يشارك
تعا من ظهرك الأحمر القابل
عجين الملتقى بأيدو يبارك
تا نتلاقى بغريفه ببرج بابل
البقلبو محل للأحباب تارك
تعا تنينا نوقف مقابل
معارك وضعنا مش عم تدارك
ومن بوساتنا نفجر قنابل
ويجو يتفرجو الحكام عنا
بأيا سلاح مندير المعارك

محمد أبو حمدان

*************************************

رجال الشعر ورجال السياسي
*** الفرق بيناتهم لا تكون نـــــــــــاسي
هني فرقوا العيشة الأليــــــفة
*** ونحــــــــــــــــــنا مامنطمح للكراسي
نحنا طموحنا الكلمة الشريفــة
*** المن حواسك بتــــــــنـبع أو حواسي
نحنا منابر الكلمة النظيــــــــفة
*** العم تجمع وطن بعد التــــــــعـــاسي
هني استأجروا عالم خفيـــفة
*** وجابوا سلاح ع لبـــــــــــــنان قاسي
ومنا كلمة الشاعر قذيفـــــــة
*** انحكي عن موطنو بشعرو الحساسي
لها الأسباب بتضلك حليفـــي
*** وخيي وراسك بيركب ع راســـــــــــي
واذا مامنلتقي بكرة بغريفــــة
*** انشالله منلتقي في ضهر أحــــــــــمر
****** ونخبك نشرب وكاسك بكاسي *******

---------------------------
ياموقعي يامفضل عليـــــــــــي
***بـّــعمّــــــــــــار عمرتك بايديي
وفضلك عليي صار كل نهــــــار
***العرفتني بالشـعر ع خيـــــــي
بنيتك لحتى اسكب الاشــــعار
***بشهقات روحي العايشة فيي
بنيتك تاتبقى ملتقى الشــــعار
***وموقع قوافي تصير شعريـــــة
موقعك عملتك متــــل أكرم دار
***بوابك على التسكير منسيـــة
شرعتها تــــــــــــــاتدخل الزوار
***تكتب قوافي الشعر ليليـــــــة
ويامحمد القلبي ع شعرك غـار
***وشاحوابسطورو رموش عيني
طمتني الشعار عنا كـــــــــــثار
***والشعر بعدو بخير يومـيـــــــة
وساعة ماشرّف شعرك المغوار
***بأول وتاني عن صفى نيـــــة
حسب العوايد جاوبك عمـــــــار
***بوجهك ماسل سيوف محنية
وتانقول ناوي اسحب البــــــتـار
***شو فزعك وحفاظ الوصــــيـــة
سيوفي قواس يــــــرحبوا بالزار
****تايأهلوا ويرحبّوا سويــــــــــة
لكن اذا شي ضيف منا صـــــار
***وحب التحدي بكل حريـــــــــة
راسو عن كتافو بشوفو طــــــار
***انشفتو كتبتلي بيوت حربيـــة
وع سيرة الأرزة وحكي الغــــيار
*** لاتلوم مين اللي نقل ليـــــي
للأرز عنا شي الف تيـــــــــــــار
*** بيدعوا تعود الحرب أهـــــليـة
بميل الحكومة مجمعة أنـــــصـار
***والعارضوها قبالها هـيـــــــــي
بيتحاورا مرة.الزعل أمـــــــــــرار
*** وحالة وطنا اليوم مزريــــــــة
ومازال متلي صرت مافي غـبـار
*** حامل الكلمة بخير عقليـــــة
انت وأنا سلاحاتناالأفــــــــــكار
*** وخوفي اذا بيفشل حوار العـمر
تقلي حكومة غير شرعية

عمار البراضعي

*************************************

يا براضعي وحياة عينيي
شعرك دخل مثل النعس فيي
بتعرف أنا مني أناني وصار
لمحبتك عندي أنانية
زكزكتك وزكزكتني بأخبار
بالورد مش بالسيف ممضية
تا نعلم الفيهم وطنا احتار
ما أعظم الروح الرياضية
الريشة عندما تحدت الأوتار
منها طلع نوطة موسيقية
ولولا ما نتحدا الذهب بالنار
خدودو ما صارت شمس مضوية
وشو موقعي وشو موقعك يا جار
وجهين للعملة الأساسية
العملة اللي فيها تداولو الشعار
وخلو الكرامة متل ما هيي
البيهم انو بنهج هالأفكار
نكفي الطريق بكل حرية
مش من أجل غاية ولا استئثار
كرمال هالنعمة السماوية
اللي خصنا فيها الكريم البار
ونحنا منستاهل هالهدية
هيدي حكومتنا بوطن أفكار
دستورها نور الألوهية
ولا تخاف قلك يوم يا عمار
هيدي حكومة غير شرعية
ما في فشل بالكون,في أسرار
بالناس بالنظرة الحقيقية
يعني اذا فشلنا بهالمشوار
عليك الفشل بيكون وعليي
وهلق اسمحلي ألفت الأنظار
لعيونك البتذوب حنية
اعذرني اذا ما برد عالأشعار
فترة طويلة شوي يا خيي
عليي الشغل بيحتم بإصرار
أوقف معو عن جد يومية
وبياخذو الأعياد والزوار
كل الوقت من بين أيديي
من هيك باعث بوستين زغار
مني الك بالعيد عيدية
عندي أمل يرجع يجينا نهار
مطرح ما كنا في مواقعنا
ببيت القصيد منلتقي سويه

محمد أبو حمدان

*************************************

ضلك يابو حمدان سليــــــــــنا
*** ومن نبع شعرك صب وسقيـــنا
أنا البمحبتك صاير أنــــــــــاني
*** كأنو تنيننا إخوة ربيــــــــــــــنا
حبيتك على صقل المعـــــــــاني
*** ووجودك عز بالغربة عِطيـنـــا
وصفا قلبك حمل صدق الامــاني
*** برسالة شعر من مينا لمـــــيــنا
انت بالقلب باعثلك لســـــــــاني
*** ومهما تغيب للباري دعيـــــــنا
علينا يردك بمشوار تانــــــــــــي
*** قبل مايصير طعم الشعر كينـا
انشالله الشغل من قلبي وحنــاني
*** بيعطيك الهنا وخيرو نبيــــــنا
وخلفك كل أرزة وسنديــــــــاني
*** بتنده عود شعرك مانسيــــــــنا
ولأنو عليك بتأشر بنـــــــــــــاني
*** وعلى ذات الخطى سوية مشينا
تأربح خيي في أول زمـــــــــاني
*** على لبنان بزيارة دعيـــــــــــنا
يابوحمدان تفكيرك دعــــــــــاني
*** وقدر مامنعرف سوية حكينــــا
أنا وياك زكزكنا الغنانــــــــــــي
*** وضهرنا مرجلة بالشعر حتى
نحــرّم شي خصم يحتك فينا

------------------------------------------------------------------------
ومعليش يامحمد ابو حمدان
*** عشرين عام كتير بالهجران
المتلك خسارة كل لحظة يغيب
*** كيف العمر صارلو ترك لبنان
وظرف العمل ماطلبت مرة تسيب
*** لكن مابدي تترك الشجعان
ترم الفضاوي بس غيب وجيب
*** وإيـّاك تحرمنا فكر جبران
بتعرف الشعر بمرحلة تعذيب
*** عصر الخنافس والجكل برهان
وحصرم زجلنا مابيبقى زبيب
*** مازال متلك بعد في انسان
ومتلك على لبنان كيف بجيب
*** شاعر وشعرو تبر بالقصدان
مرصّع حروف القافية بترتيب
*** مهاجر وداعي الناس ع الأوطان
ولما على الموقع بكل بكل تأديب
*** فتت وكتبتلي الزجل ألوان
حكّيتني وحكّيتك بتهذيب
*** عن قلب صافي وممتلي تحنان
حتى ليالي الشعر منا تشيب
*** القوة ظهرنا معادلة بميزان
من ميل كفة عطرها بيطيب
*** ومن ميل كفة طهرها إيمان
وحتى بمواقعنا ظهر تقريب
*** وحتى ماننسى الرابح وخسران
بخسر أنا عني اذا بتغيب
*** وخي بربح وقت مابتعـــــــــود
ومتلي وطنا بعودتك ربحان

عمار البراضعي

************************************

يا عمار يا شاعر معنا
يا سيد من حكي وألف وغنا
ما أحلاك بحياة الشاعرية
عمار وعلى المدماك بنا
بعد أول لقا وأجمل تحية
وبعد ما بشعرنا الواقع تهنا
وبعد ما الشعر جمعنا سوية
وبعد ما بين المقصود منا
وبعد شوط التحدي والحمية
وبعد شبك الأسنا بالأسنا
ما عدنا رفاق صدفه بهالقضية
صار في شعر في دمو انعجنا
تا اخوي تنين وبذات الهوية
صرنا والوطن مسؤول عنا
وأنا فيك بحنيني وانت فيي
ونحنا تنينا بخدمة وطنا
وعا ذكر الخصم بالكلمة الوفية
تا قلك نتف يا خيي استنا
أنا وانت بطريق المعنوية
دعاة الخير والدهر امتحنا
ما عنا خصم ما النا اذية
واذا شي جاهل علينا تجنا
ضروري كلنا نعرف يا خيي
ما بدنا مع خصم نعمل عداوي
بدنا خصمنا نجيبو لعنا

محمد أبو حمدان

*************************************

يامحمد يبو الروح النبـــــيـــلة
*** ياخيــي يـاصديقي يـــازميلي
لوما فيك ليل الشعر يجــــــمع
*** ليالي الشاعريـــة مش جمـيلة

بعد أول لقا اللي كـــــان أوسع
*** بدينا بالحــــــوارات الطـويلة
وعدنا نفوســـنا من جديد نرفع
*** تانشفي البشعر نفـسو علـيــلة

سوا شبكنا الأسنا ومــــامنفزع
*** وغليلك بالزجل يشـفي غليلي
تافينا مايحركش شخص يرجع
*** ان كـــــانت خبرتو عنا قليـلة

لها الأسباب ناوي الخصم إمنع
*** بعالم عالزجل صارت دخيلة
ولأمثالك تا إبني كل مهـــــجع
*** لأنك فارس بمتن الأصـــيــلي

وتايبقى الشعر للشعار مرجــع
*** ودليلك مابيفرق عن دليـــــلي
بدي اياك من عمّار تقنـــــــــع
*** مافينا خصمنا نجيبو لعــــــنا
اذا كنو يهودي اسرائيلي

عمار البراضعي

**********************************

يا عمار ان كنت عالخير ناوي
ضروري تكون للعلة مداوي
الذكي ما بيفتح جروح الغميقة
الذكي من دون دوا العلة بيداوي
لا تحكي باليهودي بهالطريقة
هيدا بيننا وبينو مهاوي
لا في بيننا حجة ووثيقة
ولا صفقة سلم ممكن نساوي
لكن خصمنا خصم الحقيقة
بوطنا الصارت جروحو بلاوي
الخصم,خصم الفكر,خصم الموسيقى
برنة صوت شاعر عالهداوي
وضد الضد حرية طليقة
بكلمة شعر ما فيها قساوي
الشعر متل الوطن دولة عريقة
بتؤمن بالمحبة والتساوي
وكل عمرو الوطن يمرق بضيقة
بعداوة خصم عا عينو غشاوه
وترجع حكمة الكلمة الرقيقة
تهدي الوضع وترد الصفاوه
ويرجع يهتدي الخصم بدقيقة
ويمشي بمنطق العقل السماوي
ونحنا لازم نطفي الحريقه
بثلج بكتير أقوى من الحماوي
وسوا نستوعب ظروف الدقيقه
وصداقة من العداوه نضل نخلق
ووطنا يعيش وتموت العداوه

محمد أبو حمدان

**********************************

طبيب الشعر من أول دقيــــــــــقة
** إلو وصفات مدروسي ودقيــــقة
ندهني إكتب وسطـّـــــــــر بنودي
** مش كل العلل إلها طريقـــــــــــة
صرت إكتب صرت مشّي بنودي
** ودروب الخـيـر عبّدلا طريــــقا
وكثر ماكتبت تعبلي زنـــــــــودي
** بغزارة مارد فكاري الرشـيـــقـة
ويابو حمدان كيف بدك جهـــودي
** يجمع بالعدوة والصديـــــــــــــقة
أنا خط السياسي مش عهــــــودي
** ولا ع موطني بعمل طبـيــــــــقة
ياريتو خصمنا مخـــاصم ردودي
** خصم بالشعر وبعزف الموسيقى
كنت بهديه أرزة ع جـــــــرودي
** بإسمو تنزرع شجرة عريـــــقة
لكن خصمنا زعزع صمــــودي
** وزاد جراح موطنا الغميـــــقــــة
وقلنا الحرب كرهوهــــا جدودي
** لأنها شرذمت كل الخليـــــقــــــة
تعوا تاكلنا نزت البـــــــــــارودة
** ونتحاور سوا ونمضي الوثيــــقة
إجانا رد شرّاني حقــــــــــــودي
** الشيحة يولّع ينادي الحريــــــــقة
انقسمنا ناس تتهم اليـــــــــهودي
** وناس بتتهم جـــــــارة شـقــيــقـة
احترتت وعدت ع غابــةّ شرودي
** بعدل حكم السما وفكرة طليـــــقة
بوجهي زمجروا كل الأســـودي
** وقالوا من اليهودي كتير أخطـــر
البدو يطالب بكشف الحقيقة

عمار البراضعي

*********************************

يا عمار السياسه الناس قالو
قضية شرحها واسع مجالو
فيها بدون ما تشغل حواسك
لأنها بتفسد العيش وجمالو
كتار الثوبهم مش عا قياسك
ولا عاشو مع وفاك وراسمالو
لأنو طعم كاسن غير كاسك
ولا بيقدرو الشعر وخيالو
الحقيقه انطالبت فيها بحماسك
حقك بعد ما الأيام طالو
لأنو مش عدل دقة جراسك
تضل تدق حزن بانفعالو
ولا صوت الميدني يغير مراسك
ببكي كل يوم عا شهم بنضالو
وعا كيف وليش واقع التباسك
ووطنا ضايع ومشغول بالو
بفرد المطالبه وجه قواسك
على العا ذوقهم صالو وجالو
حتى تشوف تم الحق باسك
وحتى يضل يقشع فيك حالو
ولو أخطر عليهم ضرب فاسك
من جيش اليهودي واحتلالو
الحقيقه قول لو عا قطع راسك
ولا تفزع غير من الله الخلقنا
والله مع الحق ومع رجالو

محمد أبو حمدان

*********************************

وطنا الغايص بحملةّ عذابــــــو
** لاتجبر شاعرو أو سبع غابـــــو
الحقيقة يقولها ويكون أشـــرس
** من البيعيش عنو بإغترابـــــــــو
بعرف شعرك الغالي منـــبرس
** وحمل لبنان في نهدةّ غيـــــــابو
وبجنب الحق مستأسد ومـترس
** بنبراس الثقافة الرب جابـــــــــو
الشاعر كلمتو للنـــــــاس درّس
** وجمع بين الأهالي في كتابــــــو
وكلما بمنبر الكلمة تمـــــــّـرس
** كلما للوطن جمّع قطـــــــــــــابو
وإذا وقت السياسيين كـــــــّرس
** ردد بالمـــثل صفحةّ صــــــوابو
العن حقو سكت شيطان أخـرس
** السياسي بيعرف وحضرة جنابو
ولأنو قمحنا كلما تــــــــــــدرّس
** سكت للمورج الفرفط حبابــــــو
علّمنا السكوت بصمت نخـــرس
** وإذا فضة الحكي نذهّب جوابــو
لها الأسباب كلما غال عتــــرس
** لافينا نخلعو ولا نسيب بابـــــــو
ولافينا نساير الوضع المغطرس
** المش من كاسك وكاسي شرابـو
تعا نبيع السياسي . الشعر أفرس
** ووطنا بالزجل نحمي ترابـــــــو
وإذا بيحكوا السيـــاسيين إحرس
** عند ما كلهم يحكوا الحقيــــــــقة
الوطن بيروح ومنخسر شبابو

عمار البراضعي

*****************************

يا براضعي لبنان غنيلو
وحتى يضل بخير صليلو
وحتى السياسة ولعبة الحكام
ما يجبرو العالم عا تدويلو
ما زال أهل الحكم والأحكام
هني أساس اللغم وفتيلو
وحدو سلاح الشر والألغام
خلا الجروح بشعبنا يسيلو
لازم الشعب يحطم الأرقام
ويعرف يشق الصخر بزميلو
ويختار للكرسي بأعلى مقام
شاعر وفي صادق بتمثيلو
شاعر بلا سياسة وبلا أوهام
ومش فالق العالم بتدجيلو
شاعر سكوتو عطر حكيو خزام
شاعر متل ناسك بترتيلو
شاعر بقلبو كعبة الاسلام
وبيغار عالحكمة بإنجيلو
لا بالسياسة في الو إلمام
ولا عالكذب غنى مواويلو
شاعر سلاحو الحب والأحلام
شاعر الورد بيربح جميلو
شاعر يحس بدمعة الأيتام
شاعر بأفكارو سبق جيلو
لا الطائفية بحضنها بينام
ولا العنصرية ضو قنديلو
يا براضعي سلاح الحقد اعدام
لكن سلاح الشاعر ستيلو
ودخلك سلاح الشر والإجرام
المفروض من بيناتنا نزيلو
وينشال من ايد البشر ما دام
الشيطان قوة عم يوديلو
وما زال نحنا سلاحنا المقدام
الفكر والنور ومشاعيلو
ومن عند الله الوحي والالهام
سلاح للشاعر بتحليلو
وسيفنا الكلمة مدا الأيام
وغير اللي حط بايدنا هالسيف
من ايدنا ما بيقدر يشيلو

******************
محمد أبو حمدان
تورنتو - كندا
[ندعوك للتسجيل في المنتدى أو التعريف بنفسك لمعاينة هذا الرابط]