طليع حمدان وخليل شحرور ( رجال ومرا )

من طرف hiam 12/26/2009, 6:16 am

طليع حمدان وخليل شحرور ( رجال ومرا )

------------------------------

من أروع الحوارات لي سمعتها كل عمري

------------------------------

خليل شحرور

بلادي الجميلي سهولها وجبالها =.وينك يا متباكي عا إستقلالها
مهما السحر غنا شعر كرمالها = أكتر من الشحرور ما غنالها
وحمدان حفلات الزجل بمجالها = بيحط كتفو حد كتف الآلها
مع كل شعار الزجل إلا معي = متل المرا لبتخاف من رجالها

طليع

رجعنا نغني مع شموع منورا = ونهدي النسيم على ورود معطرا
ومع كل شعار الزجل يا عنترا = ما بخاف إلا من كلام الثرثرة
لما المرا بتكون ست مقدرا = بتخاف من رجال عندو مقدرة
هيدا دليل الإحترام مسوكرة = تاتضلها فيها الإنوثة مصورا
حلوة المرا لبتخاف من رجالها = ولا يكون رجال وبيخاف من المرا

خليل شحرور

بيناتنا عالخوف ما في إختلاف = لكن بقلك كيف عقلي الخوف شاف
سر المرا مهما تغلف بالعفاف = بيبقا متل حمرا على روس الشفاف
ومش خايف تصفي مرا ومني تخاف = خايف على حرف القاف تا ما يضل قاف
وساعة ما بتصفي مرة بدو يصير = عاشفافك الحلوين حرف القاف كاف

طليع

عرفت المرا بتنقاس عا ألطافها = مش على لفظة قافها ولا كافها
وهالكاف عندي ليش عقلك شافها = هي مش إلي صرفها عند صرافها
داعيك بيحب المرالأوصافها = من هالصبايا لحافظت عا قافها
ن قالت بحرف القاف عا حدك وقاف = بتحس طلعت قنبلة من شفافها

خليل شحرور

مهما المرا بالقاف كانت شاطرا = بتفقع متل القاف منك يا درا
ومهما المرا بكلماتها اهتز الورا = بتبقى مرا قدام رمز المقدرا
ويا مفتكر رجالها عليها افترى = بجبلك من الحكمة دليل ومسطرا
لكون مرا ورجال رب العالمين = أعطى الرجل ضعفين ما أعطى المرا

طليع

من دون ما تجبلي من الحكمة دليل = إنك ورتت كتير والحرمة قليل
مال الدني والرزق عاكفوف البخيل = ما عادلو الغـمزة من الطرف الكحيل
وشوف الحلا والخصر والشكل الجميل = والسيطرة بالحب والقد النحيل
هو كلهن الله عطاهن للمرا = وإنت شو عاطيك الله يا خليل

خليل شحرور

لا تقول إنو المال مش قد الجمال = لعم ينشرا بالمال يا إبن الحلال
وبعد الدلع والغنج والسحر الحلال = بيميل كيف ما بيقشع الجزدان مال
وبتقول الله شو عطاني من الكمال = لو كنت عاقل ما بتئسل هالسؤال
بيكفيك رب الكون أعطى للمرا = ربع العقل والعقل كلو للرجال

طليع

لا تنتقد عقل المرا وعاداتها = أعظم رجال بيحلفو بحياتها
يومين لولا بتحرمك نظراتها = بتقول يا الله دخيلك هاتها
والحزن ما تفجر بلا دمعاتها = والعرس ما بيكمل بلا غنجاتها
والبيت ما بيعمر بلا دياتها = والكون ذاتو بينطلق من ذاتها
ومازال ربع العقل سيطر عالدني = يا ريت عقلاتك متل عقلاتها

خليل شحرور

وحياة كحلتها ولوحة شالها = لبتركّع قلوب السباع قبالها
بتعمّرالبيت بكرم أفضالها =.وبتخربو لولا خطر عا بالها
الست لي بتحفظ زوجها وعيالها = ومن قلبها بتغار عا رجالها
مين لي بينكر فضلها وأعمالها = لكن ما صارت هيك منها لحالها
مش بس وحدي الكون كلو عم يقول = المهرا الأصيلي من ورا خيالها

طليع

يا بو متل مين قال مين الهيك قال = عقال يا رجال بحياتك عقال
مش كل رجال نسمى خيال جال = أحيان يا خيالها بتبقى خيال
وبتشوف ست البيت جالت بالمجال = ما بتخربو للبيت بتزيدو دلال
بالعكس يا رجال لخطفتو جياب مال = إنتو لخربتو بيوتنا وهنتو الجمال
رحتو نشلحتو بحضن فيكن للدلال = وكل واحد صوب دولة راح مال
عملتو التجارة بالصليب وبالهلال = بعتو الجنوب ويمكن تبيعو الشمال
لك يا ريت كانت حاكمتنا شي مرا = ولا تحرقو لبنان يا هاك رجال

خليل شحرور

بدك مرا تحكم بلبنان الجديد = وعا زوقها ترتيب هالمنزل تعيد
الأوطان بدها زنود بتفل الحديد = ورجال تستشهد على دق النشيد
ومن الحرب تاتشوف مين المستفيد = بعطيك مشهد عن عيونك مش بعيد
الأم لي شفت دموعها جمرة وقيد = بعرس الشهادة عم تزلغط للفقيد
مش بس مرة ألف مرة شي أكيد = بدو عا مجد الكون مركزها يزيد
مرة لأنها للوطن جابت صبي = ومرة لأنها أصبحت أم الشهيد

طليع

لما الشهيد يكون عالي المرتبة = بحطو بقلبي متل كلمة بمكتبة
ولبنان هالأرض الكريمة الطيبة = مش بس من دم الشباب مطيبة
تفاخر بلونا لياس عبود الأبي = ومين لي أشرف من دلال المغربي
والست نصيرة لمتل شمس مدهبي = بيكفي إلك جابت كمال اليعربي
وعنا بساحتنا بنات مدربي = عالمعركة بتسبق شباب الطيبة
وبتكون أكتر بالقتال مهذبة = لا بتسرق ولا بتقتل الطفل الأبي
وشو هالفخر للإم يا بو الموهبي = من هالصبي لعالقتل والسرقة ربي
مازالها جابت صبي يأذي البشر = يا ريت جابت بنت ما جابت صبي

خليل شحرور

يا ريت جابت بنت ما جابت صبي =ما بتعرف بيوم الولادة المتعبي
بتسود وبتبقى الوجوه مقطبي = بالبنت لولا تبشر البيت الأبي
البنت لي كانت بالبيوت محجبي = بتقول صارت بالشهادة مطيبة
إسئل سناء إسئل دلال المغربي = ولولا لعلى يد الرجال مدربي
وما زال بالحلوين نفسك معجبي = ومش عم تميز مرتبي عن مرتبي
من كل تاريخ البشر جبلي مرا =.حملت رسالة خير أو عملت نبي

طليع

يا ست شعواني يا شمعة مولعة = بمزارك شموع العذارا مولعة
ويا مريم العذرا يا شمعة مشعشعة = من شعاعك جروح المسيح مشبعة
ويا فاطمة الزهرا الطهر منك سعا = حتى يعلمنا الطهارة والدعا
قولي لخليل لبرسالات ادعا = هلق أنا بعطيه حجة مقنعة
نكان المرا مش صالحة بشرع الرجال = ليش النبي محمد يحلل أربعة

خليل شحرور

يا حمدان بمجال الشاعريي = نصحتك لا بقا تحتك فيي
أنا بالشعر فارس فوق أبجر = وإنت متل الصبيي المستحيةِ
إنت بتحب تتغزل وتسهر = وتغنى قصايد عاطفيي
وأنا بحار قبل الفجر أبحر = ونشر مجد الحروف الأبجدية ِ
صعب بين المؤنث والمذكر= معي تبين لمين الأفضلية ِ
لأنهم بالقصايد يا معتر= أنجق يطلع الواحد بمية
وعاذكر الست شعواني المقدر= ليش مقامها تعزز يا خيي
لأنها أم للعقل الموقر = والعقل بمقام الأوليي
ومريم قبل ما الفادي تصور= بشرها بصبي رب البريةِ
وبعد ما عطر عيسى الزهر عطر = انتشر عطر الورود المريمية
وولد طه النبي لهلل وكبر = الزهرا المؤمنة الحرة التقية
هي زوجة أبو الصبتين حيدر = والصبتين عنوان الحمية
وعلى الحالين بالدنيا يا أسمر = المرا أم الحلا والجاذبيي
ومهما مقامها بالكون يكبر = بيسموها تقيي مش نبية
ونبينا ليش تاللأزواج كتر= بدلك عالقضيي وين هيي
إذا شرط العدالي ما توفر = مش مسموح تجني عالبريي
نبينا عند ما بالدين بشر = تا يقضي على الجهل والجاهليي
زمان الجاهليي الحرب قرر = على الإسلام والدعوة القوية
ومن الجيشين صار الشعب يخسر = ضحايا من الشباب الأشبهية
وصار بوقت هالعركي يا عنتر = الأرامل واليتامى الأكتريي
ورح بعطيك صورة عالمكبر = عن لبنان هالجنة الغنية
بعد ما كان كلو مرج أخضر = احترق كلو بحرب الطائفيية
جبلي شخص منا ما تأثر = أو شي بيت خالي من ضحية
وإذا ضفت العدد والعقل فكر = ما بين الشب والبنت الأبية
متل ألمانيا وأكتر وأكتر = الشب بيلحقو 12 صبيية
كرامة نسل هالشعب المحضر = نبينا حلل الخمسة سوية
حتى ما مقام الأم يصغر= بهالتشريع حافظ عا شرفها
وشرف أجيالها وحل القضية

طليع

يا خلو عقلك من الجهل صفي = لا تجبرني حساب الشعر صفي
مين بيعرفك شاعر غناني =.لولا ما أنا حطك بصفي
يا بحار استحي من عنفواني = أنا البحر وأنا قائد الدفي
وإنت بالبحر آخرة العياني =..ما فيك تروح من ضفة لضفةِ
جايي تنتقد خفقة حناني = وصوتي وسكرتي وخشات دفي
انتقد شي شخص مجرم أولاني = حرق هالشعب تا حالو يدفي
تعي يا عايشة بروضة حناني = عليي بخصرك الغنوج لفي
ومتل حفة وراق البيلساني = عاخدي خدك الشعلان حفي
المرا أشرف من رجال الجباني = البها الناس البريئة مستخفي
هني لوصلونا للإهاني = عنهن سا م شانق لا تعفي
ونبينا لبشر بأشرف دياني = حلل أربعة بعصر التخفي
عا حبة تمر كان العيش هاني = وعشرة ياكلو من فرد قفة
ومهما الشب كان اليوم جاني = مرا ما بيقدر يكفي بخفي
حمرا وبودراوفرحة وتهاني = .والكوافير للعيلي يصفي
كيفن أصبحو سبعة تماني = كيف بيقدر عيونو يغفي
حسبو من الخمر شي كركي ملاني = أنجق كل كاسة يشف شفة
وشو نفع الحب لو صار المعاني = متل واحد سكرجي عم يقفي
بيلطش من أبو سعدا قناني = وبيعود يروح بالويسكي يطفي
دخلك ليش تالست المصاني = بحب بتكتفي وبتهف هفي
وبتصون الأماني بالتفاني = لولا روحها بدها تهفي
اعزروني نقلت ما إلهم أمانة = رجال بيتكو عا كل حفي
وبيصيرو يتهموها بالخيانة = لولا جفنها بيرف رفي
وهني بيقطفو كل المجاني = وبيعيشو بين كاس وبين شفة
ولما ضهرنا بيصير حاني = يا منحج يا منلف لفي
وإنت لقال عامل برجواني = وبيقلبك من صبايا الشقر عفة
لازم يا حلو يا أشقراني = بأرض ألمانيا سنينك تكفي
وإذا بلبنان شفت الظرف جاني = وشفت الحرب منا عم تشفي
منك ما حدى طالب إعاني = تانشوفك عريس بكل زفي
لأنك إنت طميع وأناني = ومعك ب 12 مش ممكن توفي
لازم بعد تعلق حرب تاني = تا تاخد 24 حرمي
. وقلو بس يا الله بيكفي

. منقولة
وبتمنى تعجبكم
__________________