حوار الحفله

من طرف علي عامر 7/6/2010, 4:40 pm

اخواني هيدا قسم من حوار حفلتي الاولى مع الشاعر بلال ابو غوش

علي
يا شعر فيّق ليل احلامك نسي = بنغمة حنيني وقول يا نسمه انسي
الغيم انجلى بصفوة قوافي مقدّسه = ونور المبادي بهيبتي عم يكتسي
وشمخة زجلنا ال ع التآخي مأسّسه = من بيدر الالهام غلّه مكدّسه
وبوغوش يا شاعر بفنّ الهودسه = صرلك عمر عايش دموع بتحتسي
جاييك شاعر فذ مبدع لو قسي = م بيعرف يسامح طفالى مشاكسه
ورحمه قصد ت يعلّمك نظم الزجل = حيثك ولد فاشل كنت بالمدرسه

بلال

نظم الشعر هيدا الي منّو الك = بيني وبين مواهبي شو دخّلك
متلك مرق مغرور عا دربك سلك = ت يحاور الشعّار ل تحدّو الفلك
وصل القمر وصل السما وصل الملك = غاص واذا بتريد مثلو بنزلك
وعامر انت بالاسم عامر منزلك = سميّك علي بالاسم ذاتو كللك
نهج البلاغه كتاب جمهور امتلك = لكن قصيدك انت هوّي البهدلك
وكل شاعر بيجتاز حدّو يا علي = بيدخل حقل بو الزين آخرتو الهلك

علي
بو الزين شو صابك ت ضيّعت الطريق = تا دايخ وعم تكفر بشرع الحقيق
وشو مواهبك يا مدّعي وعامل انيق = غير العلك واللتلته وشغل النعيق
شاعر قصيدي تبر وحروفي عقيق = باسمي شمخ مجد الزجل صفّى عريق
وغايص بوهمك انت ت تخفي البريق = جهلك عماك وم فهمت سرّ الحريق
نهج البلاغه ل كان بغبارك غريق = بلمسة نبوغي تروحن بظرفو الدقيق
وحقلك حرقتو بنار م بتعرف حدود = وهاجم ت تطفي النار وبإيدك بريق

بلال
[b]عندي انا غيمات من سابع سما = منهن شتي للخلق ع الارض ارتمى
تغلغل بتربه وفات تا زرعك نما = فاض ودفق ينبوع تا يروي الظما
وسرّ الحريق الما الي فيّو وما = بجهنّم الحمرا اندفن فيك احتما
وصاير لهيب النار شرّ بينسما = حيثو ظهر بالحرب عم يسفك دما
المي بمقام شعيب في اشرف حمى = ومكّه الشريفه المي بهجة زمزما
اتركني خرير المي تا اروي البشر = وانت عمود النار دخّانك عما

علي
غيوم الألم بعيونك قبالي بكو = وسمّ الدمع خلّى الزنابق يشتكو
تغلغل ت جنّ المحل حتّى تملّكو = هموم العقم طهر التراب وشوّكو
ومنطق لهيبي ل في جهنّم حرّكو = بطشي لأجل اهل التقى يتباركو
شرّ انسما من ولاد عم يتفذلكو = حيث الوفا بخيري بعد ما ادركو
وقال المويّه مقدّسه وال اربكو = حرقه بقلب هـ اللي بالله شكّكو
وبأمر لوعات الهوا بيمشي الخرير = ودخّان ناري الكفر عامي بمسلكو

بلال

[b]دخّان نارك قب عا غيمي علي = بيستنجد بميّات شعري يا علي
وسرّ الايمان الفي قلب شيخ وولي = مش خوف من نيران عم تغلي غلي
نارك حرب خلّى الاراضي مزلزله = وحمرا بلون الدم مطليّه طلي
وياما الحروق تسببو بالبهدله = وميّاتنا جوكن ت حلّو المشكله
شوف البحار الملّت الدنيا حلي = متل القصيده شطوطها متواصله
لوما المويّه الفي عمق قلب البحور = بتحرق ربيع بلادنا نار البلي

محبّتي
[/b]
[/b]

من طرف علي عامر 7/6/2010, 11:00 pm

يا خيي ليش ما في مجال للتعديل

من طرف **عمار البراضعي** 7/7/2010, 5:10 am

حلو كتير هالحوار ويعطيكم العافية
اما بالنسبة للتعديل مننطر رد حرف

من طرف علي عامر 7/7/2010, 8:39 pm

شكرا اخي لعطر مرورك
تحيّاتي

من طرف **7arf** 7/8/2010, 10:55 pm

أخ علي يعطيك العافيي وشكرا على نقل الموضوع

اما بالنسبة للتعديل اعتذر منكم جميعا
وهذه الخاصية لا يمكن فصلها عن خاصية الإدارة
وان منحنا التعديل للجميع من الممكن ان يتعرض المنتدى
للإنتهاك وهذا ليس لصالح احد منا دمتم بخير
==================

من طرف علي عامر 7/9/2010, 5:49 am

اوكي اخي حرف
ولا يهمّك وشكرا على المرور
تحيّاتي

من طرف **nawef** 7/9/2010, 11:35 am

حلو وياليت بتنقلنا القصائد والباقي اذا مافي ازعاج ولك جزيل الشكر

من طرف علي عامر 7/10/2010, 6:05 am

تكرم عيونك خيي نوّاف
تسلم يا مذوق

من طرف علي عامر 7/10/2010, 6:09 am

علي
من بعد م الدخّان عرّم ع الاثير = وشرقط قوافي من جمر شاعر خطير
حوّل على الايمان ردّك والعفير = غطّا سماك وقلبك تمرمر كثير
ناري حرب ت تصد مستعمر حقير = من قلب وزنود المجاهد هـ القدير
والبهدله اللي حكيت عنها من الضمير = هي نار من حرق الندامه ع المصير
افهم بانّو كنوز بحرك بالاخير = لوما نفيري يصوغها بعدك فقير
وناري شمس جايي ت تقضي ع البرد = منها الربيع بيكتسي ثوبو النضير
بلال
شو فحو شعرك يا علي بهذا الزمان = تا يفهمو الجمهور بدّو ترجمان
نارك شمس حرقت زهور البيلسان = وخلّت ربيع الارض قحل وصحصحان
ولوما مياه بلادنا الفيها حنان = م بترقص خيول المجاهد بالميدان
الشعب الابي المغوار م بيرضى الهوان = جاهد ت يخمد نار حمرا من الشيطان
بتقدر تعيش شهور من دون النيران = خذ آب تمّوز ومعاهن حزيران
وعيشلك شي عشر سنين من تسعة شهور = وحوّل قفار الارض فلّ وارجوان
علي
شعري حلم سهران ع حدود الكمال = وشو فهّم القاصر بأسئلة النضال
وناري ان حرقت هـ الدني عا كل حال = بتعطي مثيله ع الفدا رغم الزوال
بتزرع امل بيشيّب السحر الحلال = وبترمّد الخوف بجماعه مش قلال
بقوّة رماحي النار وبروس النصال = حتّى الابي المغوار يمحي الاحتلال
وحتّى جنابك تنتعش لو الطل سال = عا شفّة الزنبق وتنعم بالدلال
من دون فصل النار كيف بدّك تعيش = ما في دفا ما في عفا ما في بلال
بلال
قاصر انا رح عود لو مش مستحيل = هيدا ي ابن الناس ماضينا الاصيل
كنّا من الينبوع نشرب سلسبيل = ونواعد المحبوب عا صوت الهديل
لكن بنارك انت حرقه يا زميل = ونغصه على ميّات ما الهن بديل
وين الجهاد بنارك وصوت الصليل = ما جبت منهن شاهد وما في دليل
ولمّا على خيراتنا استولى القبيل = شو فادنا من نار شو لسانا طويل
نارك مكينة شر قدحت بالصخر = وسلبت عيون المي من ارض الجليل
علي
شو صايبك ضايع وغرقان بوجل = غيم الوساوس والقلب طافح خجل
بتقدر تعود بنار لهفه وبعجل = صوب المضى بجنح الخيال الما رجل
وما في دليل عا خط ناري هـ الدجل = انسى ولا تكرج ع الخرف كرج الحجل
وخدلك شهاده من صليل المرتجل = بحرب الجهاد بعزم سلطاني اجل
ركّز باخر جولة جمار الزجل = وع لسان ناري حقد نبعك لو سجل
من شر ناري توصّلت نعمة المي = تا ترحم الانسان من برد الاجل
بلال
باين صاحبنا بنار فكرو م اقتنع = لازم نزيدو مي ت نطفّي الولع
جبلي سوى الانسان مخلوق انبدع = عينو تشوف النار قلبو ما فزع
جبلي طفل عطشان قلبي ما شلع = كيف بحريقك انت بتزيدو دلع
بدّو المويّه بعد ما جمرك بلع = ت يقول كان الشوب حامي وانقلع
وت نقارن النوعين من ايّا سلع = وفي قيمة الموضوع شو اللي بيندفع
الله صنع هـ المي من علم اللاهوت = ونارك ع ايد الخلق سهله تنصنع

من طرف علي عامر 9/16/2010, 7:52 am

علي

تعا ي مزوّر تنزّه ع يدّي = انا طهر المحبّه والمودّه
ولانّي نار لوعه في صميمي = لا تظهر عا مجالي شر حدّه
قبل ما تدّعي بنبره رخيمه = بانّك شاعر الورد المندّي
لا تسكب دمعة النفس السقيمه = اتحمّل نار اوجاعك وهدّي
بنار الصبر آمال العظيمه = على جنّة سما الرحمه تودّي
وبميّة عينك وكفر الرجيمه = روحك ما الك توبه مجدّه
ياللي بيرهب عواقب وخيمه = لا يتخطّى حدودو بكل ردّه
بناري بحرق عظام النميمه = بنوري بكلّل جروح التصدّي
الطفل ملهوف بعرف يا نديمي = الجمر بجوارحو بيشعل بشدّه
بدّو بالدفى امّو الكريمه = تضمّو بعيد عن برد المخدّه
حنين بيرتوي بنيّه سليمه = ت ما الآلام تتمادى بيقدّي
وسلع لا تبيع بقوافي الجريمه = وبدل ما تدفع بطوف التردّي
ومن ميّة ضميرك هـ الأثيمه = تغشّ الناس بمواج التعدّي
قصيدك كثّفو ونار العزيمه = كرم اخلاق مش قصّة تحدّي
بمعاني ترمّد الشمس الزعيمه = ل جفّت ميّتك منها ي ندّي
وقلت المي من ربّ العزيمه = قداسه خلقت ونار الطبيعه
مداها جاب ثوره مستبدّه

بلال

اطربي ي نهور عا صوت الربابه = وع جدول ميّتي ل بالطهر رابي
لأنّو ثنينهن فنّ الطبيعه = وثالثهن شاعر الحبّ الكتابه
والهي خالق الدنيا البديعه = غمرها من الحلا وزادا طيابه
ولحتّى ترتوي زهور الربيعه = سقاها خمرة ثلوج الروابي
وقلّي كيف بالنار الفظيعه = ي سوس الشر بتطفّي عذابي
بس ان كنّك مغيّر شريعه = واله النار بتجلّو اهابه
انا ميّة تقى قلوب الوسيعه = حضنّي الطهر بصدور الرحابه
ورقاني الشيخ بالآيه الشفيعه = وشفيت معثّره بعينك مصابه
انا ميّة عزم راس الطليعه = انطلقت وتارك بخلفي سحابه
بدرعي مخمّد النار الشنيعه = وبسيفي مفتت صخور الصلابه
وبميّة سهم افكاري السريعه = سقيت الشعر رجّعلي شرابي
وعليي تعمّرت قلعه منيعه = ولكل محتاج مفتوحه بوابي
وهلق بعد م الميّه الوديعه = طفّت نارك وبلّت ثيابي
وظلّ رمادك بثوبي وديعه = عصرت الثوب عبّيت الخوابي
الامانه بصونها ان كانت وضيعه = بغيابي حاطط عليها رقابه
واذا مستعجل وناوي تبيعا = ت حطّ مذكّره بسوق الخرابه
ولانها نارك مليحه ومطيعه = ولانّو بينك وبينا قرابه
روح واطبع البوسه بنيعا = يمّا بترجع مبشّع مشوّه
يمّا بتنطق زغيّور حابي

من طرف salomon 9/20/2010, 3:31 am

خذ آب تمّوز ومعاهن حزيران
هيدا بيت مكسوووووور يا علي ليش ما الفتلو نظرو

محاورة حلوة

من طرف علي عامر 9/20/2010, 7:19 am

يعني بتصير يا بو شربول هفوه ما انتبهنا

امّا هـ الشب شاعر جميل على كيفك

تسلم على المرور الحلو خيي

من طرف ghazi saraya 5/28/2011, 1:07 am

بهنيك خي علي على هيذا الحوار وبتمنالك التوفيق

من طرف علي عامر 5/31/2011, 3:04 am

بحرب الشعر فرض يكون غازي
الكلام بكل لغم للفكر غازي
برأيو منوّر الدكتور غازي
حبيب القلب يا اوفا الصحاب

من طرف ghazi saraya 6/1/2011, 12:56 am

يسلم تمك يا شاعر

حوار الحفله

حوار الحفله

رد: حوار الحفله

رد: حوار الحفله

رد: حوار الحفله

رد: حوار الحفله

رد: حوار الحفله

رد: حوار الحفله

رد: حوار الحفله

رد: حوار الحفله

رد: حوار الحفله

رد: حوار الحفله

رد: حوار الحفله

رد: حوار الحفله

رد: حوار الحفله

رد: حوار الحفله